Неть читнестэ Московонь госпитальтнестэ вейкесэнть ютавтовсь концерт тосо лецявиця специальной военной операциянь участниктнень туртов. Анокстыцякс-ютавтыцякс кармась «Мордовское землячество» регионъютконь общественной организациясь Мордовия Республикань Прявтонть Артём Здуновонь лезксэнзэ пингстэ.

Концертэнтень сакшность военнослужащейтне, минек соотечественниктне, земляктне, эрьвась эйстэст примась участия Тиринь масторонь мельтнень-вановттнэнь ванстомань коряс специальной военной операциясонть. Воинтнэнень савсь ламо печтямс, ансяк сынь эзизь ёмавто паронтень кемеманть, покш мельсэ цяпасть артисттнэнень, конат састь тей вейке тев марто – неемс мизолдома Отечествань ванстыцятнень чамасост…

Мордовиянь Прявтонть Артём Здуновонь пельде шумбракстнемань вал марто пурнавозтненень пшкадекшнесь РФ-нь Президентэнть юрсо МР-нь Полномочной представителесь Светлана Федонина. Сон ёвтась сюкпря госпиталень медицинань персоналонтень боецтнэнь шумбрачист ванстомань коряс бажамотнень кисэ. «Арсян тенк седе курок пичкамс ды велявтомс кудов, эсь семиятнес, малавикстнэнень!» – мерсь сон.

СВО-нь участниктнень туртов седясть-морасть «САДко» содавикс группась, юткстост вейкесь – Краснослободской районсо чачозесь, Мордовия Республикань заслуженной артистэсь Александр Бардин; шансоньесь Гриша Петров ды Мордовиясто «Эх, мордовочка» раськень коллективесь. Военнослужащейтнень туртов Ине Отечественной войнадо морась Россиянь народной артистэсь Бедрос Киркоров.
Весе военнослужащейтненень истя жо явшевсть казнеть. Теде башка, боецтнэ чайде симемстэ кортнесть артисттнэнь марто.

Эряви тешкстамс, Московонь госпитальсэ истямо мероприятиянть ютавтомадо меленть землячествань активисттнэнень ёвтызе Ковылкинань райононь содавикс гармонистэсь Владимир М. Ютазь сёксня мобилизациянь коряс сон саезель Тиринь масторонть ванстомо, ней юты лецямо медицинань те учреждениясонть.