Пятница, февраля 23, 2024
Важное

А. С. Пушкин лемсэ библиотекасо ютась «Их небо принимало с любовью» книгань презентациясь. Сон – авиациядо, Мордовиянь ды Россиянь лётчиктнеде, минек историядонть, сетнеде, кить чавовсть, ды сетнеде, конат ливтнесть ды тонавтсть тенень од ломантнень. Ламо иень перть книганть лангсо важодсь, пурнась ды сёрмадсь эйсэнзэ историянь наукань кандидатось, МР-нь культурань заслуженной роботникесь, трудонь ветеранось Валентина КОВШОВА.



– Мон ламо важодинь компартиянь архивсэ. Аламонь-аламонь кармасть пурнавомо материалон. Ушодынь вешнеме авиатортнэнь. Вастневинь ды кортнинь лётчиктнень марто, сёрмалинь ледстнемаст. Ламо лездась РФ-нь ВВС-нь капитанось С. Н. Устинов. Сон содавтымим военной лётчикенть-испытателенть М. Л. Попович марто, Советской Союзонь Героенть, РФ-нь ВВС-нь генерал-полковникенть, МР-нь Почётной гражданинэнть Н.Т. Антошкин марто. Николай Тимофеевич зярыяксть ульнесь 1941-1945 иетнень войнань ды трудонь подвигень мемориальной музейсэнек, казсь ламо экспонатт. РФ-нь заслуженной военной лётчикесь тусь эрямосто 2021 иестэ. Сон ды С. Н. Устинов ульнесть монь военной консультантокс. Сюпав материал лётчиктнеде пурнакшнось И. С. Бурнайкин краеведэсь, сынь улить книгасонть, – пачтясь Валентина Михайловна.

«Их небо принимало с любовью» книгась невти весе ХХ-це пингенть, се шкастонть саезь, кода ушодовсь минек масторсо авиациясь. Темниковань уездсэ чачозесь А. А. Васильев Россиянь авиациянь васенце теицятнень ютксоль. Чавовсь Мировой васенце войнасонть.

1935 иестэ Саранскойсэ панжовсь стратонавтонть П. Федосеенконь лемсэ аэроклубось (ней кандтни Михаил Девятаевень лементь). Те ульнесь виевдеяк виев школакс. Тей тонавтнеме сакшность Пензань, Ульяновскоень, Саратовань од цёратне. Ине Отечественной войнань шкане аэроклубось кастсь-тонавтсь Советской Союзонь кемень Геройть! Войнанть прядовомадо мейле Саранскоень аэроклубонть юрсо панжозель Центральной объединённой лётно-технической школась, сон ульнесь вейкине истямо масторсонок. 1963 иестэ тесэ жо панжовсь Саранскоень тонавтомань-тренировкань авиационной центрась. Комськавксово иень перть те центрась эрьва ие нолдась военно-воздушной вийтнень запасонь сядо лётчикть.

Книгасонть ледстявить Афганистансо служиця лётчиктне, Чернобылень зыянонь ликвидатортнэ. Тесэ максовить ламо ледстнемат. Сынь саевсть архивстэ, лезкс макссь МР-нь Правительстванть юрсо Гуманитарной наукань НИИ-сь, сынсест лётчиктнень ёвтнемаст. Башка пелькс саить фотографиятне. Максовить авиатортнэнь, Советской Союзонь Геройтнень ды РФ-нь Геройтнень – Мордовиясо чачозетнень фотографияст ды биографияст. Пурназь сюпав, покш ды вадря материал. Книгась туи мельс эрьва ловныцянтень, эйсэнзэ ветесядт лопат.

А зяро Саранскойсэ курот кандтнить лётчиктнень лемест! Гагаринэнь, Терешковань, Титовонь, Комаровонь, Николаевень, Чкаловонь, Серовонь, Девятаевень, Осипенконь, М. Расковань ды седе тов.

Малав кеветее иеть мольсь важодема книганть лангсо. Кувать арасельть ярмакт сонзэ нолдамс. Лезкс макссь РФ-нь Федеральной Собраниянь Федерациянь Советэнь сенаторось, РФ-нь Финнэнь-угрань раськетнень ассоциациянь прявтось П. Н. Тултаев. Сонгак сакшнось те вастовомантень. Валонзо коряс, книгась лиссь пек виев, сёрмадозь чарькодевиксстэ, сон пешксе мельстуиця эрямонь факттнэде, конат алкукс ульнесть минек историясонть.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».