Россиянь полициянть юрсо кинологонь службась теевсь 112 иеде икеле. Те шканть перть эрьва кинологось ды сонзэ малавикс ялгазо – кискась, тейсть покш путовкс закононь коламотнень киртямосо. Аволь умок минь вастовкшнынек Мордовия Республикава МВД-нь кинологической службань куншкакуронь прявтонь тевтнень топавтыцянть, полициянь майоронть Александр Михайлович Бикеев марто. Сон ёвтнесь службанть важодемадо ды лиятнеде сонзэ явовома ёнкстнэде.

Кода пачтясь Александр Бикеев, кинологонь службанть икеле кодаткак башка аравтлувт а аштить, весе истя жо, кода целанек полициянть.
– Полициясо седе ламо немецень овчаркатнеде, – тешксты Александр Михайлович. – Те породась универсальной ды важоди полициянь весе службатнесэ. Теке марто, Мордовиянь полициясо истя жо улить восточноевропейской овчаркат ды фокстерьерт. Меельцетне парсте марить чине, кеметь ды аволь покшкеть. Ванстомасо парсте важодить среднеазиатской овчаркатне.

Истя жо полициянь майорось тешксты, кинологонь профессиясонть прявтокс ашти кискатнень вечкемась, ансяк те аволь весе. Васняяк истямо ломанентень эряви улемс психологокс, конась чарькоди кисканть обуцянзо, содасынзе сонзэ лавшо ды виев ёнксонзо, чарькоди, кода ветямс тренировкатнень ды парсте кирди эсь ёжонть, эдь кискась весементь мари.

Седе сеедьстэ эрси истя, кинологось ды кискась свал вейсэ. Лиясто жо лисни, кинологось туи пенсияс, кискась жо эштё служи. Сестэ сон максови лия кинологнень, конанень муема мартонзо кель-вал, тень туртов эряви шка.

Нама, неень шкане полициясо ули эрьва кодамо техника, ансяк кисканть ваксс сонзэ путомс а кода. Кискась малав зярдояк а манявкшны, техниканть марто истят тевть эрсить.

Ёвтнесь Александр Бикеев кискатнень анокстамодояк. Истя, киска левксэнть ушодыть анокстамо кавто-колмо ковсто саезь. Кинологось мартонзо тееви содавиксэкс, якси мартонзо ушова, тонавты ломантненень, гайттненень, машинатненень. Кискинесь, кода эйкакш, вишкинестэ саи весементь, ды те шкастонть кинологонтень эряви максомс тензэ весе эрявиксэнть. Тренировкатнень жо ушодыть пельиесэ, иесэ. Ветявить сынь кото ковонь перть. Косо-бути кавтошка иень ютазь кискась анок службантень.

– Полициясо кискась службанть канды малав кавксо иеть, – тешксты Александр Бикеев. – Мейле комиссиясь ванносы сонзэ вадрячинть. Сеедьстэ эрси истя: се кисканть, кона кучови оймсеме, кинологось сайсы эстензэ. Эли жо тензэ муеви лия азор. Минек кискатнень саить покш мельсэ.

Содамга:
Мордовия Республикава МВД-сэ лововить 70 кискат, кинологонь службасо малав 40.
2021 иень 5 ковтнень перть кискатне саевкшнесть 541 тевс.