Ёроков эйкакштнень туртов республиканской лицейсэ ютавтовсь «Кемечинь урок». Кавксоце классонь тонавтницятненень инжекс сакшнось Юрий Семенюк, кона эсь олясо ульнесь специальной военной операциясонть. Мероприятиянь арсицякс-ютавтыцякс кармась Мордовиясо «Защитники Отечества» фондонь филиалось.
Кочкуровань райононь эрицясь Юрий Семенюк ламо иень перть ветясь бизнес. Частичной мобилизациянть ютавтомадо мейле явсь мель лездамс фронтонтень. Социальной сеттнесэ яволявтсь боецтнэнь туртов эрявиксэнть пурнамодо. Васенце жо чокшнестэнть велень эрицятне сонзэ кудонзо перька тарканть пештизь мобилизованнойтнень туртов пурназь оршамопельтнеде ды весе эрявикстэнть. «Зярдо мон весементь ускинь фронтов ды неинь минек ванстыцятнень сельмесэст сюкпрянь арсематнень, чарькодинь, карман лездамо тенст свал», – корты Юрий Семенюк.
Гуманитарной лезкс марто эсь автомобильсэнть Юрий сисемксть ульнесь СВО-нь таркатнесэ, февральстэ жо эсь олясо тусь фронтов ды сёрмадсь контракт. Пельиень перть ульнесь передовойсэ.
Боецэнть марто кортамсто эйкакштне кевкстнесть, мезесь сехте пек кадовсь героенть мельс. «Сэтьме эрямонть тона ёно весемесь кадови мельс. Васенце ледезь танкось, конантень чият ваномо, ули-арась кияк жив. Соледарсо яжазь церьковась. Снарядто пешксе ламо этажсо кудось… Фронтсо кавто прявт аравтомат: эряви кадовомс живстэ эстеть ды ванстомс лиятнень. Леднематнеде мейле, эсь прянть апак ванкшно, кевкстнят ялганть: кода тон? эзить понго? Ды теньсэ службань прявт тевесь – вейке вейкенень лездамось», – корты боецэсь.
Эйкакштне макссть Юрийнень сёрмат, конатнень сёрмадызь сонзэ сослуживецтнэнь туртов. Маласо читнестэ сон макссынзе сынст цёратненень.