Эрямо тык эрямо сась! Эрьва чистэ телевизоронь пачк, интернетэнть вельде ды газетатнесэ секе-тев тандавтнить эйсэнек: «Ванодо, манчицят!». Кить ловныть-а ловныть неть яволявтоматнень, лият, паряк, а варштытькак лангозост.
Ламот эйстэнек оймавтнить пряст: кадык, келя, манчить ношка прев ломантнень, мон аволь истяман, киненьгак а маняван.
Монгак эсь прям а лован чаулакс. Советской шкасто аволь берянь содамочить макссь тенек школась. Теде башка – каня, парс, каня, беряньс – тонавтымизь кемемс ломантненень. Паряк, секс се шкань ломантне а содыть, кода ветямс прянть, зярдо манчить эйсэст. Ды секс манчицятне весемеде пек вечкить «судодо усксемс» васняяк истятнэнь. Монгак сынст ютксто: кодамокс кастымизь, истямокс, нать, кадован свал. Секс секе-тев понгонян манчицятнень ульмапес. Весть энялдсть тень ютавтомс рузонь кельстэ эрзякс 80 ламо лопасто ёвтнема. Энялдыцятне – содазь ломанть. Келя, авторось сёрмадовксонзо кандынзе миненек, ансяк эстенек аютко. Паряк, лездат? Кода а лездамс эсенек ломантненень? Меринь, паро. Интернет вельде кучизь сёрмадовкстнэнь. Эсензэ авторонть сельме песэмгак эзия нее. Тень лангс апак вано, капшинь, нать, савтомс тензэ, лия тевеньгак кадынь, кундынь тевс. Ютавтынь кемень лопат, комсь… Ужо, мерян, гайневтян авторонтень (лемензэ а ёвтаса), эряви-а эряви поладомс. Васня, валозо кемель: эряви. Мейле та-ков ёмась, телефононзояк лоткась сайнемеде. Истя кадовинь, кода мерить, тапазь судо марто.
Омбоцеде манимизь «Одноклассниксэ». Тов совсемстэ монськак а содан, кода «казинь» колмо тёжадо ламо целковойть монськак а содан кинень. Се манявомадонть мейле малавиксэнь-ялган тонавтымизь улемс седе превеекс ды а кемемс весенень. Ней, келя, манчицятне истя тонадсть «угориявтомо» ломантнень, а фатяткак, кода «кайсевттядызь» прясто пильгс. Текень пес тонавтсть, кодамояк конёв алов кедьчелькень путомсто васня парынестэ ловномс, мезе тосо сёрмадозь, а менстямс тосто мезеяк.
Арсинь, весе неть тонавтоматне кеместэ совасть пряпотмозон ды ней, эсь койсэнь, зярдояк а понган манчицятнень кедьалов. Ды вана теть! Аволь умок таго лиссь мартон истямо тев, конанть кувалма нейгак а лотксян ацирьгалемадо ды эсь прям мурнемеде. Лемгак эстень од путынь – «автень курго».
Лиссь жо оно мезе. Ноутбуком, кона, видькстан, умок уш теевсь тень сехте малавикс оякс-ялгакс, кармась псилгалеме. Ловнынь, те пулиясь эли тапавсь коштонь паниця «кулерэсь» (вентиляторось). Пелинь, ноутбукось кирвази ды допрок тапави. Мезе мейле карман тееме? Икелеяк монень сонстемензэ а кодаль. Ней жо, тынсь содасынк, седе ламо шка сави аштемс кудосо. Сёрмадомадо башка Интернетэвгак совсян, косо ней эрьва кодат сайтт улить. Ялгат-оят муинь, конатнень марто сёрмат кучнетяно карадо-каршо – истямо ладсо шкась юты яла седе шождасто. Нурькинестэ, пек тандадынь: тапавиндеряй ноутбукось, одось тень а рамави. Ды превезэнь сась мель тердемс компьютерсэ чарькодиця мастер. Тердемс аволь сеть яволявтоматнень коряс, конат понгавтнезь ошонь кудокенкштнень ланга, муемс покш фирма Интернетстэ. Ды вана ансяк кенеринь панжомо эрявикс сайттнэнь, сеске эцесь сельмезэнь – ООО «КомпСервис». Мезть вешнят лият, весе сынь, келя, вейкеть – неть арсематнень марто панжия «КомпСервис» ООО-нть сайтэнзэ. Сеске лиссь вальмине тердема марто – сёрмадомс заявка ды алтамо: мастерэсь сы апак учовто. Паряк, текенть кувалма, сёрмадыя телефононь номерэм. Ды, алкукс, эзинь кенере сёрмадовксом прядомояк, сеске гайневтсть: «Эряви мастер? Кучтано нейке». Чись субуталь, шкась – венть малав. Мерян, течи уш кадык а сы, ванды карман учомо. Паро, келя, кода мертядо. Сёрмадызь адресэм, ды мон ойминь. Мезенть кис ней весемеде пек мурнян эсь прям – сень кис: кода уш превезэнь эзь са варштамс, мезе сёрмадыть те фирмадонть ломантне? Ловновлиньгак сеть пеняцямотнень, конатнень мейле уш, зярдо тевесь лиссь, муинь Интернетстэ, нама, аволинь варштаяк те фирмань сайтэнтень. Ансяк, кода кортыть, кенерепакаресь маласо ды а сускови.
Омбоце чистэнть сась од ломань. Чамаксозо арасель, максынь эсенсетнестэ. Ютась, варштась ноутбуконть лангс, аравтызе пилензэ сонзэ вельксэс – мезе, каня, бажась тосто марямс? Мерсь, эряви варштамс кулерэнть, паряк, сави полавтомс. Кевкстеманть лангс, зяро тень кисэ эряви пандомс, мастерэсь ёвтызе питненть: 500 целковойть – кулерэнть кис ды 300 целковойть – путомга. Ярмактне аволь пек покшт, секс апак кавтолдо ды берянде апак арсе меринь: «Паро». Од цёрась таргась конёвт. Келя, эрявить сынст алов путомс кедьчелькем. Тесэ сатотсть превень ловномс сынст, кармавтомс натой нардамс вейке строчканть, косо тешкстазель седе покш питне. Цёрась каршо апак моле нардызе, путызе эсензэ кедьчелькенть. Тень эйстэ мастерэнтень кемемась седеяк покшолгадсь. Секс апак пеле максыя мартонзо ноутбуконть, конань сон алтась велявтомс секе чистэнть. Ютасть зярыя част. Мастерэсь секе-тев гайневтнесь тень ды кевкстнесь яла: «Кодамо термопаста путомс? Ули седе дёшова, питней ды седеяк питней?». Мерян, мон а содан. Кевкстян киньгак, гайневтян. Гайневтинь вейке ломаннень, мерсь, мезекс питнеесь? Седе тов кевкстематне седеяк ламолгадсть: «Кодамо виндуз путомс? Кодамо антивирусник?». Теке шкасто, зяро весе тень питнезэ, эзь корта. Кодаяк эзь чарькодеве тень, мекс макснесь истят кевкстемат. Секс таго гайневтнить содазь ломаннень. Сон тень сеске мерсь: «Тонь эйсэ манчить. Питненть эйсэ кастыть».
Истя ульнеськак. Ноутбуконть велявтомадо икеле мастерэсь таго гайневтсь ды пачтясь истямо куля: «Весе сень кисэ, мезе савсь теемс ды полавтомс ноутбуконть эйсэ, питнесь кассь 5 тёжас». Тень марямсто ёжомгак эль эзь машто. Апародонть авардемас пачколинь. Васня арсинь а саемс ноутбуконть ды яволявтомс фирманть лангс прокуратурав. Ды тагояк кирдимим советской шкасто кемекстазь обуцям: а вечкан судга-кудга якамо.
Ноутбуконть велявтомо мастерэсь сась аволь ськамонзо. Нать, пельсь: киньгак тердян ды улян аволь ськамон, ярмактненьгак а макссынь. Эзинь карма седе тов сёвномо, меринь ансяк: «Беряньстэ ды аволь ломанькс сыргиде покш эрямов кинть ланга. Ванодо, илядо эшкеве козоньгак ды илядо понго а лисевема таркас».
Тень лангс тевесь эзь прядово. Зярдо озынь компьютерэнть экшс, нолдыксэлия Интернетэнть, сон эзь нолдаво. Таго гайневтинь секе фирмантень. Тосо мерсть: келя, кучтано лия мастер «по гарантии». Кевкстия, те карми, арсян, питневтеме? Тосто кемевтимизь, нама, питневтеме.
Лия мастерэсь ноутбуконть марто озясь пельчасошка ды секе шкастонть пеняцясь, кодамо стака сынст эрямост ды кода аламо тенст пандыть. Прядызе тевензэ, таргась эчке тетрадь. Мон, келя, аволь кода мондень икеле сыця мастерэсь, чавонь кедть а якан. Вана тесэ сёрмадозь питнетне весе сень кисэ, кодамо тев топавтан. Ды вешсь: «Тынк пельде кавто тёжат ветесядт целковойть». Неть валтнэде мон виде-паро чувтоминь. Кода истя? Фирмасто жо мерсть «по гарантии» ды питневтеме? Мастерэсь, теке мерят, эзь маря валон, секень «чавсь»: питневтеме, келя, мон а якан, пандомс сави. Сестэ, мерян, теске чавомизь, зняро ярмакон арасть. Тандадомадонть пурнынь, зяро кадовсть ярмакон – тёжа целковойть – венстинь цёрантень. Се «жалимим», келя, ознодо, паро ломанян ды кирьгапакшозонк а кундан. Цопадинзе ярмактнень ды тусь.
Зярдо мейле Интернетстэ ловнынь те фирманть лангс пеняцямотнень, сонсь стясь кевкстемась: мекс те шкас а варштыть те фирмантень правань ванстыця органтнэ ды кода эряви «а сэвтнесызь» тосо важодицятнень манчеманть кисэ? Теке шкасто ули мелем пшкадемс тыненкак, вечкевикс ловныцят: илядо уле монь кондямо «автень кургокс»!
Раиса Щанкина