Истямо лем ало сёрмадовкст минек кулялопасо ютазь иестэ лиснесть аволь весть. Васенце пачтямось теезель сестэ, зярдо Интернетсэ лиссь видеоурок, косо кортамось мольсь физикань вейке пелькстэнть – кинематикадонть. Ды кортамось ветявсь эрзянь кельсэ! Монень сестэ те марявсь ёвксокс.
Ютазь иенть прядовомсто таго срадсь паро куля: эрзянь кельсэ лиссь книга, ков совавтозь физикань вейке пельксэсь – механикась. Сон зярс апак печата, путозь Интернетэнь зярыя сайттнэва. Сеске мерян, Интернетэв совсицятне паро мельсэ вастызь те книганть, ёвтыть седейстэ молиця лембе валт сонзэ теицянтень. Миньгак сюконятано те ломаненть икеле ды арсетяно тензэ а лоткамс тень лангс, поладомс седе товгак.
Шка сась ледстямс те ломаненть лемензэ. Те – Арпад Валдаж. Те сонзэ од лемезэ. Чачомстонзо максозель тензэ лия лем – Андрей, конанть эйстэ цёрась истя жо эзь яво, полавтызе ансяк эрзякс – Андю. Фамилиязо Илялетдинов.
Сон чачсь Московской областень Сергиево-Посадской буень Пересвет велесэ. Чачомадонзо мейле колмо иень ютазь кудораськезэ тусь Москов ошов, косо цёрась эрясь покшсто касомазонзо. Тонавтнесь васня школасо, мейле прядызе МАИ-нть, кода тетязояк, конадо Андю ледстни истя: «Монь тетям инженерэль. Сон ульнесь сетнень ютксо, кить тейсть Буранонть туртов двигательть. Сонзэ санга чуди ламо раськень верь: рузонь, эстэнь, литовецэнь. Сонсь эсь прянзо лови татарокс».
Андюнь тетязо эсь прянзо лови татарокс. Косто эно сась татарэйденть оймесэ эрзянь келентень вечкемась? Таго кевкстинек эсензэ Андюнь. Вана мезе мерсь сон тень каршо:
– Мелесь тонавтнемс эрзянь келенть монень сась аволь вейке чис. Васня карминь тонавтнеме мадьяронь (венгрань) келенть. Тувталокс ульнесь вана мезесь: мон ульнинь «Драм энд бэйс» киштицякс. Киштемань вейке пельксэсь саезель Мадьяронь масторсто. Ушодынь ловномо комментарияст ды эзинь чарькоде мезеяк. Эрявсь кунсоломс мадьяронь кельсэ патриотической морот. Вейкесь пек вечкевсь. Монень марявсь, мадьяронь келесь – пек мазый ды «тантей» кель. Ды те «тантей» кельсэнть морыть патриотической морот! Се шкастонть саезь карминь вечкеме мадьяронь келенть. Мейле монень марявсь – те аламо. Ды мелем сась тонавтнемс мансинь келенть. Теке шкастонть карминь содамо эсень эрзянь юртнэде, ды сестэ ушодынь тонавтнеме эрзянь кель.
Эрзянь юртнэ аванзо пельде. Сонзэ родсо, келя, ульнесть ломанть осетинэнь ды эрзянь раськестэ. Сонсь авазо лови эсь прянзо рузонь ломанекс ды а кеми эсензэ эрзянь юронтень. Андю арсесь содамс, косот неть юртнэ. Аванзо покштянь покштятне, келя, эрясть та-кодамо велесэ. Кодамо те веленть лемезэ, те шкас эзь саво содамс. Тень лангс апак вано, цёрась эсь прянзо седе пек кармась ловомо эрзякс. Текень кувалма сась эрямо Саранскоев.
Кармась седе домкасто тонавтнеме эрзянь келенть. Ды вана тенк – ютавтызе эрзякс «Механиканть» ды путызе Интернетс.
Чарькодеви, те тевенть сон топавтсь аволь ськамонзо. Ульнесть лездыцянзояк. Пек покш лезкс тензэ макссь Александр Данильчев (Зинёронь Сантяй). Моньгак ули путовксом эйзэнзэ. Варчия вием истямо тевсэнтькак. Ванкшнынь Андюнь мельга эрзякс ютавкстнэнь, витнинь-петнинь валрисьметнень. Сеске мерян, монень пек а шождаль. Сехте покш стакачись ульнесь се: физикась – те аволь ёвтнема ды аволь валморояк. Тосо ванькс койть (законт) ды аравтовкст (задачат), лият-мезть. Сынст эрявить чарькодемс ды видестэ толковамс. Тевенть стакалгавтсь физикань терминтнэнь эрзянь кельсэ арасьчись. Сынст савсь арсемс эстензэ авторонтень. Монгак зярыя валт тензэ лездынь муемс. Совить-а совить сынь эрямос, невтьсы шкась, кода эсензэ книганть уцясканзояк. Пелян, сон истя жо карми стувтозь, кода лия книгатнеяк, конатне эрзянь кельс ютавтозельть 1937, 1940 иетнестэ.
Ламот эйстэст ванстовить ней А. С. Пушкин лемсэ раськень библиотекасо. Кой-конатнень эйстэст эсень сельмесэ неинь, эсень кедьсэ токшинь. Ды таго сынь секеть арсемас: кодат валдот ульнесть бажамост се шкасто эриця эрзятнень, зяро вий сынь путсть, превть тапасть, зяро шумбрачи макссть, лиясто эрямосткак алтасть ансяк вейкенть кисэ: ванстомс тиринь келенть, теемс сонзэ эрявиксэкс весе эрзятнень туртов.
Истят жо валдот бажамонзо Арпад Валдажоньгак: невтемс весенень, «вишка раськень кельтнесэяк сёрмадовить тонавтолмань (наукань) книгатне». Лисни, минек кельтне эзизь ёмавто сюпавчист ды питнейчист. Ансяк ней эстенек а сравтнема те сюпавчинть варма мельга, а тапама сонзэ пильге алов, кода теить эйстэнек ламот. Миненек ули, кинь лангс ваномс, кинь пельде тонавтнемс, кинь мельга молемс. Неть ломантнень ютксто вейкесь те – Арпад Валдаж, кона весемесэ бажи кандомс лезэ эрзянь келенть (ды аволь ансяк: мансинь келентькак) ванстоманть туртов. Теде башка, цёрась сёрмали морот. Нолдась эрзянь кельсэ альбом. Снимась эсензэ сёрмадовт моро марто клип. Топавтсь зярыя од проектт программированиянь коряс. Те аволь весе, мезе кенерсь тееме ансяк вейке иень перть. Арсетяно, од иесь сонзэ туртов карми седеяк сюпавокс ды сон таго кенярдовтсамизь од ды лезэв тевсэ.
ТИРИНЬ КЕЛЬСЭ «МЕХАНИКАНТЕНЬ» СОВАВТОЗЬ ОД ВАЛТНЭ
Задача – аравтовкс
Волчок – штерялкс
Наука – тонавтолма
Движение – якамо
Длина – кувалмо
Самолёт – менельвенч
Точка – тешкспе
Ноль – чаво
Скорость – молевкс
Ускорение – капшавтома
Угол – ужо
Закон – кой
Маятник – чатынал
Фонарь – палывакан
Пуля – толуро
Объём – эчкелма
Плотность – эцевкс
Подробно исследуем – пензасынек
Напряжение – виень пурнамот
Предел прочности – нардечинь пе
Растяжение – таргсемань пе
Сжатие – кирьмамонь пе
Трение – ёзамо
Приспособления – кедьёнкст
Сила трения покоя – аштемань ёзамо
Сила трения скольжения – кирякстомань ёзамо
Сила трения качения – кеверемань ёзамо
Равновесие – вейкетьксвий
Бесконечность – сыркстэмечи
Устойчивое положение – сыркстэме аштемась
Центр тяжести – увтямонь куншка
Колебание – лыкамо
Угол собственного вращения – ёмболдомань ужо
Угол прецессии – эвтемань ужо
Сообщающиеся сосуды – вейсэндязь каксеть
Угол атаки – куродомань ужо
Раиса ЩАНКИНА