«Депутатонь чись минек газетасо» проектэнть лувсо минь поладтано вастовомат МР-нь Государственной Собраниянь депутаттнэнь марто. Течинь минек инженек Покш Березникень-Кочкуровань избирательной округонь депутатось Евгений Ледяйкин. Евгений Евгеньевич аволь ансяк депутат, сон «Движение» ООО-нь генеральной директор, «Од веле» региональной общественной организациянь прявт.
Минек ловныцятнестэ ламот уш сонзэ содасызь, ялатеке макстано зярыя тешкст биографиястонзо.
Ледяйкин чачсь-кассь Покш Березникень райононь Парынзэле велесэ 45 иеде теде икеле, прядызе тосонь школанть, мейле тонавтнесь РУДН-сэ «Строительство» специальностенть коряс, прядсь истя жо Н. П. Огарёв лемсэ МГУ-нь аспирантура. Социологиянь наукань кандидат. Важодемань биографиянзо ушодызе Московонь частной компаниятнесэ кладовщикекс, мейле кассь микшнемань отделэнь прявтокс. Седе тов сонсь панжсь эсензэ тев ды кармась «Движение» ООО-нь генеральной директорокс, те ды лия должносттнесэ тосо роботась 2016 иес. Мейле сась эрямо ды важодеме тиринь велев, кармась сонзэ вельмевтемензэ кода эсензэ ярмакто, истя жо Президентэнь грантонь фондонть лезксэнзэ вельде. Казезель «За межнациональное согласие» медальсэ, Мордовия Республикань Прявтонть пельде Благодарностьсэ.
Евгений Ледяйкин сеть ломантнестэ, конатне а пелить ушодомс од тев од таркасо. Сонзэ велев самозо ламонь дивавтынзе. Мекс те од, превей цёрась кадызе масторонь прявт ошонть ды семиянзо марто вейсэ велявтсь тиринь велев, теде ды ламодо лиядо кортнинек минек редакциясо, зярдо сон сакшнось инжекс.
Ледяйкинэнь весе проекттнэнь васенце лувось – кастомс-кемекстамс велесэ ды ошсо эрицятнень, васняяк, од ломантнень, седейтнесэ тиринь ёнксонтень, масторонтень вечкеманть. Те прявт мелесь лездась изнямс зярыя грантт, конатнень вельде ды велень эрицятнень лезксэст вельде Парынзэлесэ одкстомтозельть да панжозельть зярыя коень-кирдань ванстома таркат. Велесь гайгезевсь масторонть келес, сондензэ кармасть содамо ламот, ней Парынзэлесь туристтнэнь туртов мельстуиця тарка. Ледяйкин тезэнь панжсь Ремеслань ды конюхонь кудо, «Пайчалго» ярсамонь тарка, инжень кудо, тесэ ютавтовить семиянь кенярксчить, школасо, университетсэ тонавтниця эйкакштнень ды од ломантнень марто вастовомат. Те практикась мусь ламо вечкицят ды эштё зярыя велеть республиканть келес совасть «Од веле» проектэнтень.
2022 иестэ Президентэнь грантонь фондонть лезксэнзэ вельде Ледяйкин ушодсь топавтомо «Приземление» теварсевксэнть, конань васенце бажамокс ашти – содавтомс од ломантнень велень таркатнесэ раськень эрямосодамочинть ванстовкстнэнь марто.
– Васняяк минь панжинек од, лия ёнов а молиця тарка – Артыцянь кудо, конась уш ушодызе эсь тевензэ: кармамс шкинемань куншкакурокс кода велень, истя жо ошонь од ломантнень туртов. Курок эйкакштне сыть оймсеме каникулав, велень оймень кундамо ды сынст туртов невттяно эрзянь алкуксонь веле, ломанть, ракшат, ванькс кошт. Арсетяно те лувсонть важодемс туристэнь группатнень мартояк. Од тейтертнень-цёратнень марто, конатнесэ ули артыцянь сяткине, ютавттано мастер-класст, пленэрт, фотосессият. Минек уш улить вадря ялганок С. Д. Эрьзя лемсэ музейстэ, Н. П. Огарёв лемсэ МГУ-нь архитектурно-строительной факультетстэ, Ф. В. Сычков лемсэ художественной училищасто. Университетэнь студенттнэ мельспаросо ушодсть анокстамо вишка архитектурной формань дизайнт, инжекс ардыцятнень туртов невтемань тешкст, ёвтамо марто неже лангсо сёрмадовкст. Те тевесь тееви, васняяк, сынст тонавтомань туртов, максови паро практика, ды, омбоцекс, минь поладтано совавтомо велень таркатнес лия ёнов а молиця ёнкст, сень, мезесь карми явовтомо сонзэ лиятнень эйстэ, тердеме одтнэнь, кастомо сынст васенце панжицянь виест.
Теде башка, од ломантнень туртов Артыцянь кудосонть Мордовиянь ды Россиянь содавикс художниктнень пельде ютавтовить, кода уш меринь, мастер-класст, лекцият, теориясь поладови практикасо.
Вана аволь умок ютавтозель мастер-класс фотографированиянть коряс Олег Романовонь пельде, седе тов арсетяно ютавтомс колмо тонавтомат артомань коряс. Кадык эйкакштне неить, кодашка шкинемань, мелень-арсемань таркат улить велетнесэ, ды те пек кепеди мельёжонть, тиринь масторонтень вечкеманть, – тешксты Евгений Ледяйкин.
Мартонь меельце читнестэ Парынзэлесэ ютавтозель эштё вейке мероприятия – «Герои рядом» патриотической марафон. Сонзэ анокстыцятне – Покш Березникбуень покш патриотось, «Сурский рубеж» военно-исторической клубонь прявтось Сергей Косынкин ды «Поиск» вейсэндявксось. Площадкакс те вастовоманть туртов кочказельть Парынзэлесь ды тосонь культурной объекттнэ. Кавто чинь перть республикань зярыя районтнэстэ ды Саранск ошсто малав ведьгемень од ломантне, тонавтницятне, конатне совить «Поиск» командантень, вейсэ наставникест марто ютавтсть арсевтиця кортнемат патриотизманть коряс, автоматонь калавтнемань-пурнамонь ды спортонь коряс пелькстамот, вансть фильмат, лездасть велень эрицятненень, кода Тимуровской командат, кепедсть Россиянь флаг ды путсть цецят Ине Отечественной войнасо ды СВО-нть ютавтомсто чавовозтненень кеврунгонтень. Омбоце чистэнть ютавтозель пелькстамотнесэ изницятнень каземась ды кортазельть икелепелев арсематне.
– «Поиск» патриотической вейсэндявксось теи пек ламо од ломантнень видестэ кастоманть коряс, сынь вешнить Ине Отечественной войнасо чавовозтнень лемест, теке марто сынст седейтнес кадовить весе неть историятне, конатне а максыть стувтомс фашизманть каршо тюремадонть ледстнематнень.
Мельспаросо ванынь од цёратнень ды тейтертнень лангс, кода сынст цивтёрдыть сельмест эсь тевдест, кода сынь кунсолыть тонавтыцяст, кодамо виде тонавтомань лув эри сынст покш коллективсэнть, васняяк, наставниктнень покш тевест кувалма. Минек эйкакштнень туртов те пек вадря эрямонь тонавтнема! – корты Евгений Евгеньевич.
Редакциясо вастовоманть шкасто истя жо кортазель депутатонть округсонть важодемадонзо ды седе, кода райононь, велень администрациятне лездыть семиятненень, конатнень цёраст, мирдест ней СВО-нь участникть ды тюрить минек масторонть сэтьмечинзэ ды олячинзэ кисэ.
Марина ДЕВЯТОВА