Стака куля сась Ицялонь райононь Селища велестэ – эрямосто тусь Мордовия Республикань заслуженной строителесь, Береговые Сыреси велень поселениянь прявтось Александр Константинович Пискайкин. Ковонь ютазь сонензэ топодевельть бу 69 иеть.
Те ломаненть лемензэ марто, кона ламо иень перть ульнесь Саранск ошонь зярыя покш предприятиятнень ды Береговые Сыреси велень поселениянть прявтокс, сюлмавозь пек ламо.
Эсь тиринь ёнкссо Пискайкинэнь лезксэнзэ вельде теезель ки, Береговые Сыреси ды Селища велетнень ютксо сэдь, Селищасо истя жо теезель ки калмолангонть видьс, тосо жо сонзэ мелензэ коряс теевсть Славань Курган ды Аллея, поселениянтень совиця велетнесэ витневсть ды вадрялгавтовсть Ине Отечественной войнасо маштовозтненень кеврунготне. Сон пек капшась теемс хоккейсэ налксемань кортонть ваксс кайсемань-оршнемань туртов лембе тарка – кудыне. Александр Константинович ульнесь а оймавиця ды паронь тееме бажиця ломань. Сонзэ туемазо – покш ёмавкс весень туртов.
Печтятано покш седейризкс роднянзо-раськензэ ды малавиксэнзэ марто.