Маень 11-це чистэ 1941-1945 иетнень войнань ды трудонь подвигень мемориальной музейсэ панжовсь «Мир без экстремизма и терроризма» фотовыставкась ды ёвтавсть истямо жо лем ало республиканской фотоконкурсонь изницятнень лемест. Пелькстамонь арсицякс-ютавтыцякс кармасть Равчирень финнэнь-угрань раськетнень культурань куншкакурось ды МР-нь Культурань, раськень политикань ды архивень тевень министерствась.
Фотоконкурсонтень весемезэ кучозельть 80 роботат, конатнень ютксто жюрись, козонь совасть профессиональной фотохудожникть, кочкинзе сехте вадря комсь фотографиятнень. Пелькстамосонть эсь ёрокчист невтизь Саранск ошсто ды республикань муниципальной районтнэстэ школасо тонавтницятне ды тонавтыцятне, студенттнэ, культурань ды образованиянь ёнкстнэсэ важодицятне ды истя жо профессиональной фотографтне. Мероприятиянть панжизе МР-нь Культурань, раськень политикань ды архивень тевень министрань полавтыцясь, аволь коммерческой организациятнень марто важодемань коряс отделэнь прявтось Альберт Сявкаев. Сон ёвтась поздоровт МР-нь Культурань, раськень политикань ды архивень тевень министранть С. Н. Баулинань пельде.
– Течинь фотовыставкась алтави талновтыця кевкстемантень – терроризманть ды экстремизманть каршо бороцямонь тевтненень, – мерсь Альберт Борисович. – Неень шкасто сэтьмечинек ванстыть правоохранительной органтнэнь важодицятне. Нама, сэтьмечинь ванстомась ашти вейсэнь тевекс ламот сфератнень туртов. Тесэ исполнительной властень органтнэ, гражданской обществань институттнэ, тонавтнемань учреждениятне ды лиятне. Эдь эрьвась эсь таркасо путы вийть экстремизмань ды терроризмань тевтнень а нолдамга. Ды тесэнь фотороботатнесэ те парсте невтеви.
Седе тов ёвтавсть изницятнень лемест. Сынь тешкставсть дипломсо ды ледстнемань казнесэ. Эряви ёвтамс, вадрятнень ютксо «Эрзянь правда» газетань фотокорреспондентэнть Эдуард Ретунскиень роботазо.
Истя жо мероприятиясонть ульнесь Саранск ошонь 27-це № средней общеобразовательной школань «Вдохновение» вокальной студиянь кадетэнь хорось (прявтось Галина Лезина), конась морызе «Служу Отчизне» моронть. А вана Саранск ошонь тетявтомо-ававтомо кадовозь эйкакштненень лездамонь центрань 9-це классонь тонавтницясь Вячеслав Ивлев ловнызе А. Твардовскиень «Василий Тёркин» произведениястонть саевксэнть. Фотовыставкань инжекс истя жо кармасть Саранск ошонь 9-це № школань 6 «Б» классонь тонавтницятне.
«Мир без экстремизма и терроризма» фотовыставкась мемориальной музейсэ карми важодеме маень 31-це чис.
Юлия Еремина