Республикань Культурань кудосо ютась Од иень кенярксчи, конась эрьва ие эрси МР-нь Прявтонть Артём Здуновонь лезксэнзэ пингстэ. Покш чись лия ёнов а молиця. Тей тердевсть эйкакшонь кудонь, интернатонь, лавшо шумбрачи марто, трямс саезь ды ламо эйкакшонь триця семиятнестэ эйдетне. Ламотне састь республикань районтнэстэ, сынь ульнесть тетяст-аваст, тонавтыцяст марто.
Культурань кудонь фойесэнть эйсэст седейшкава учость. Эйкакштнень туртов анокстасть пек паро казнеть – явшесть чевте налкшкеть: сеельнеть, овтынеть, кискинеть, черепахат ды лия ракшат-налкшкеть. Мазый оршамопельсэ эйкакштне покш мельспаросо чийнесть, мизолдсть, невтнесть налкшкест.
Весе эйкакштне чарасть Од иень кузонть перька, киштсть ды морасть морот. Мартост ульнесть Якшаматясь, Ловняськесь ды ёвксонь лия геройтне.
МР-нь Прявтонть пельде лембе валт ёвтась МР-нь Социальной ванстомань, трудонь ды эрицятнень занятостень коряс министрань полавтыцясь Светлана Шувалова:
– Эрьвась эйстэнек учи Од иенть, од тевтнень ды паро, валдо мельтнень топавтоманть. Кадык тынк эрямонк карми теке ёвкс!
Сон арсесь весенень кеме шумбрачи, парсте тонавтнемс ды касомс алкуксонь ломанекс. Республикань Культурань кудос весемезэ сакшность 450 эйкакшт.
– Минек вейсэндявксонть пельде тесэ комсь эйкакшт. Сынь покш мельспаросот казнетнеде ды те кенярксчиденть. Арсян, кувать кармить ледстнеме те чинть, – пачтясь «Много дети» МР-нь общественной вейсэндявксонь прявтось Наталья Котельникова.
Теде мейле эйкакштнень туртов невтезель «Снежная волна» Од иень театрализованной путовксось, конань анокстызь Мордовиянь государственной филармониянь артисттнэ.
Татьяна МАТОРКИНА
Фототне
Эдуард Ретунскиень