Четверг, декабря 02, 2021
Важное
Коень коряс, тундонь паксясо тевтнень ушодовомадо икеле ютавтневи республикань аграрийтнень покш промкс. Эйзэнзэ сакшныть райононь администрациянь, велень хозяйствань предприятиянь, райононь АПК-нь управлениятнень прявттнэ. Нурькинестэ меремс, сетне, кить виевгавтыть республикань агропромышленной комплексэнть. 
Тедеде покш промксось ютавтозель мартонь омбоце пелькссэнть, косо республикань аграрийтнень икелев покш тевть аравтсь МР-нь Прявтось В.Д.Волков. Тесэ жо региононь Прявтось макссь «Комплексное развитие сельских территорий» государственной программанть лувсо ипотекань кредитэнь получамонь васенце сертификат. Сонзэ азорось – «Чамзинская» нармунень фабрикань слесаресь Александр Васильевич Рёбрушкин.

А.В.Рёбрушкин эри Комсомольской посёлкасонть. Тесэ прядызе средней школанть, тестэ теинзе покш эрямонтень васенце эскелькстнэнь.
– Средней школанть прядомадо мейле тонавтнеманть поладыя Н.П.Огарёв лемсэ госуниверситетэнь электронной техникань факультетсэ, – ёвтни Александр Рёбрушкин. – Университетэнть прядомадо мейле велявтынь тиринь ёнксов. Февральстэ топодсть ниле иеть, кода ушодынь важодеме «Чамзинская» нармунень фабрикасо технологической процесстнэнь управлениянь автоматизированной системань слесарекс. А мезть сёпомс, важодемань васенце иестэнть а шождаль. Тень лездасть предприятиянь умонь важодицятне, кить нучк-пачк содасызь нармунень фабрикань цехтнесэ оборудованиянть.
Александр Рёбрушкин аволь ансяк содасы, кона кудосонть сонзэ квартиразо, уш кенерсь эйсэнзэ улемскак ды пек шнызе ипотекань квартиранть. Од цёранть валонзо коряс, квартирась явозь Комсомольской посёлкань омбоце микрорайононь ламо квартирас кудосо. Этажось колмоце.

– Мелезэть тусь, – кевкстия сонзэ.
– Эно, кода! Пек мелезэнь тусь. Квартирась алкуксонь! Эйсэнзэ весемесь ули парсте эрямонтень, – каршо валсо мерсь сон.
А.В.Рёбрушкин ёвтнесь седеяк, сонзэ квартиранть питнезэ – вейке миллион целковойть. «Комплексное развитие сельских территорий» госпрограмманть лувсо льготной ипотеканть мон саия вете иес, ды те, арсян, сехте вадря вариант монь туртов кредитэнть весе пандомасо. Эдь кредитэнь ставкась сетненень, кить эрить ды важодить велесэ, ансяк вейке процент.»

– Монень 27 иеть, зярс эзинь юта эрямо эсь вейке комнатас квартирантень, – видькстась Александр Васильевич. – Эрян тетянь-авань марто. Кода мерить, новоселиятнень сацтнеме кувать а карман. Эдь ней, зярдо ули эсень квартирам, эряви арсемс семиянь теемадояк. Арсян, эрьва цёра ломанесь семия пурны сестэ, зярдо сонзэ ули эсензэ кудозо, квартиразо.

Алкукскак истя. Александр Рёбрушкин видькстась, келя, нармунень фабрикасо ламо од ломанть макссть яволявтомат велень льготной ипотекантень.

Теке шкасто карминек содамо, Мордовиясо велень льготной ипотекантень покш мель явсть 1 тёжадо ламо кудонь строицят. Сынь макссть заявкат льготной кредитэнь получамонтень, ды малав кавтосядт заявкатнень – 250 миллионт целковойть, банкось шнынзе.
Учневи, велесэ кудонь строямось виевгады ды седеяк пек од специалисттнэнь ютксо, кить тонавтнить аграрной специальносттнес вузтнэсэ ды техникумтнесэ. МР-нь Правительствань Председеталень васенце полавтыцясь, Велень хозяйствань ды продовольствиянь министрась В.Н.Сидоров промкстнэстэ вейкесэнть, кона алтазель республикань АПК-нь виегавтомантень, видькстась, уш течи велетнес састь 200 од специалистт, конатне тонавтнесть АПК-нь кадрань кемекстамонь ды анокстамонь республикань программанть коряс.

…Меельце иетнестэ пек виевгадсь-сюпалгадсь «Чамзинская» нармунень фабрикась. Сонзэ велень хозяйствань продукциянть мельспаросо рамсить аволь ансяк минек республикань, сонзэ томбале эрицятнеяк. Ды мезе кецявты, продукциясь яла ламолгады. Теньсэ, нама, покш таликазо неень шкань оборудованиянь слесаренть Александр Васильевич Рёбрушкинэнь.

Пётр Зиновьев,
Чаунзань район
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».