Пятница, марта 29, 2024
Важное

Неть ды лия эрявикс тевтнень вадрясто топавты Отяжелень райононь ракшань орматнень каршо бороцямонь коряс станциясь (РСББЖ-сь), конань прявтсо эсь тевень содыця профессионалось, дока ветеринарной врачось Юрий Николаевич Егорцев.

Юрий Николаевич Егорцев чачсь-кассь Отяжелень райононь Ламбаське велесэ. Тонавтнесь тесэнь школасо, мейле – Козловкань 13 № средней специальной профессиональной училищасо (СПТУ-со), конань прядызе пек парсте. 1985 иестэ, экзаментнэнь парсте максомадо мейле, кармась тонавтнеме Н. П. Огарёв лемсэ МГУ-со ветеринаронь специальностентень. Университетэнть прядомадо мейле сась важодеме Отяжелень райононь ракшань орматнень каршо бороцямонь станцияв. Те шкастонть саезь течинь чис сонзэ эрямозо кеместэ сюлмавозь ветеринарной службанть марто. Ютынзе, кода кортыть, профессиональной весе кузтематнень. Секскак ветстанциясо важодеманть содасы ды чарькодьсы пек парсте. Ды бажи теемс весементь те важодеманть вадрялгавтомга.

Аволь умок минь ульнинек инжекс Отяжелень ветеринарной службань важодицятнень кедьсэ. Кортынек важодемадонть, кода аштить эпизоотической тевтне ды кодат од полавтомат учовить.
Эряви меремс, Отяжелень райононь ветеринарной службась течи – те ракшань орматнень каршо бороцямонь коряс райононь станциясь, ды истя жо Вечерлеень, Козловкань, Ботужелень, Сабанцелень ветеринарной участкатне, ули службанть эсензэ ветеринарной лабораториязо, эрицятненень лездамга тесэ важоди ветеринарной аптека. Течинь чине «Атяшевская РСББЖ» ГБУ-сонть важодить малав 80 ломанть, конатнень ютксо эсь тевень содыця, вадря ветеринарной врачт, лаборантт, ветеринарной фельдшерт, санитарт ды лия специалистт. Важодеманть туртов тесэ ули весе эрявикс оборудованиясь ды технической ёнкстнэ.

– Течинь чине эпизоотической тевтне минек районсо аволь берянть, ракшатнень ды нармунтнень педиця орматнень коряс мелявкст арасть, – корты Юрий Егорцев. – Минь домкасто ваннотано аволь ансяк велень хозяйствань предприятиятнесэ ды крестьянонь-фермерэнь хозяйстватнесэ тевтнень мельга, ветстанциянь специалисттнэ роботыть эрицятнень пшкадемаст коряскак. Эдь ракшатнень орматне масторсонть яла седе ламолгадыть, секскак минек специалисттнэ вастневить велень эрицятнень марто, лездыть тенст ракшатнень ванстомасо, вейсэ бороцить апаро орматнень а нолдамга: нармунень гриппенть, сибирской язванть, тувонь африканской чуманть, ящуронть ды истя седе тов.

Теке марто, кода тешксты прявт ветеринарной врачось, эрицятнень марто лиясто сави ламо ды кувать кортамс сень коряс, ракшатнень вакцинациясь – пек эрявикс тев, истя жо сынст эряви ванномс стака орматнень коряс. Берянь, зярс тень чарькодить аволь весе. Эдь лиясто лиснить, невтемга, азаргадомань (бешенствань) тевть. Сонзэ кандтницякс сеедьстэ эрсить идем ракшатне. Теке марто сынь те орманть педявтыть кудонь ракшатненень, ормасонть сэреди ломанеськак. Сонзэ а нолдамга Отяжелень ветслужбась топавты покш ды эрявикс робота.

– Тедедень сёксняяк вейсэ охотниктнень марто виртнева ды паксятнева ладсинек азаргадомадо манямкат – «Рабистав» препаратонть, – тешксты Юрий Егорцев. – Охотниктне парсте содасызь ривезтнень эрямо-аштема таркаст ды пек тенек лездасть. Истя, манямкатне ладязельть Аловелень, Сабанцелень, Ботужелень, Ламбаськень, Козловкань ды Отяжелень куротнева. Те препаратось – эсь койсэ азаргадомадо вакцина идем ракшатнень туртов. Сон лезды а нолдамс зыянов орманть. Весе неть мероприятиятнень минь ютавтынек федеральной бюджетэнь ярмактнень лангс.
Тень лангс апак вано, Отяжелень райононь ракшань трямонь велень хозяйствань предприятиятнесэ ды эрицятнень хозяйстватнесэ свалшкане ванновить сюракшов ракшатне, ютавтовить профилактической мероприятиятне. Покш вановт ало тувотнень африканской чуманть коряс кевкстемаськак. Кортамот ветявить эрицятнень мартояк, кеме сюлмот кирдевить охотниктнень марто, конат парсте содыть идем тувотнень коряс тевтнень. Кода мерсь Ю. Н. Егорцев, пек лездыть велень поселениятнень прявттнэяк.

– Отяжелень райононь ракшань орматнень каршо бороцямонь станциясо важодицятнень вановтост ало велень хозяйствань кеменде ламо предприятият ды крестьянонь-фер-мерэнь хозяйстват, – корты Юрий Николаевич. – Общественной секторсо районсонть лововить 9 тёжат 40 сюракшов ракшат, эйстэст 3689 – потявтовиця скалт, 375 – сывелекс трявицят, 37 593 – тувот, 335 – реветь, 479 181 – сараз. Частной секторсо течинь чинтень лововить 1199 сюракшов ракшат, эйстэст 221 – потявтовиця скал, истя жо кирдевить 1655 тувот, 2720 реветь ды сеят.

Эряви меремс, Отяжелень районось, кода минек республикань ламот лия районтнэяк, ламосо кирдеви велень хозяйстванть вельде. Секскак, райононь ветстанциянь важодицятне парсте чарькодить, ракшатнень куш кодамо ормась – те, васняяк, покш зыян экономиканть туртов. Тень коряс, вейсэ местной самоуправлениянь органтнэнь ды лия ведомстватнень марто важодезь, топавтови эпизоотической тевтнень вадрячись, педиця ды лия орматнень анолдамось ды шкасто лецямось – те сывелень ды ловсонь ярсамопельтнень ветеринарно-санитарной вадрячинть кемекстамось.

Кода уш тешкставсь икеле, «Атяшевская РСББЖ» ГБУ-нть юрсо ули ветеринарной лаборатория. Сон важоди колмо районс – Отяжеленть, Орданьбуенть, Дубёнканть туртов. Эряви тешкстамс, лабораториянть ули аккредитациязо диагностической ванноматнень ютавтоманть лангс, теде башка, ванномань ёнкстнэде пек ламо. Бактериологической, биохимической, паразитарной, вирусологической ды лия ванноматнень вельде лабораториянь специалисттнэ кемекстыть ули-арась те эли тона ормась. Эдь ламосо диагностиканть эйстэ ашти лецямонь лувось. Бути лабораториянь специалисттнэ видестэ ладизь орманть, ветеринарной врачось лади виде лецямо.


– Минек лабораториясь важоди аволь ансяк велень хозяйствань предприятиятнень марто, истя жо ламо эрьва кодамо услугат максовить эрицятнененьгак. Ветлабораториянь специалисттнэнень сакшныть кудонь ракшатнень марто, тесэ эрсить льготань стерилизациянь чить, ютавтовить УЗИ-нь, ЭКГ-нь ванноматне.
Иезэнзэ ветлабораториясь теи малав 92 тёжат ванномат, эрьва чистэ – 300. Эсь важодеманть ветеринарной врачтне ды лаборанттнэ топавтыть вадрясто ды пштистэ ваныть орматнень анолдамонть мельга. Кавто иес весть лабораториянь важодицятне эсь содамочитнень кемекстыть Московонь специалисттнэнь икеле, сеедьстэ эрсить квалификациянь кастомань курсатнесэ. Неть курсатне максыть пек ламо, эдь эрямось а ашти ве таркасо, совавтовить важодемань од ёнкст, тевс нолдавить од технологият, пек ламо мезе ютавтови цифровой форматс. Тесэ пек неявикс важодемаст минек од специалисттнэнь, конат профессиясонть эштё аволь умок, ансяк содамочист ды ёрокчист сатышка, – кемексты Юрий Николаевич.
Ды алкукскак, течинь эрямось цифровизациянть марто сюлмавозь пек кеместэ. Нама, ветеринарной службатне теньсэ а аштить ве ёно. Отяжелень районсонтькак велень хозяйствань ракшатнень лангс теезь вейкине электронной база, косо эрьва ракшанть лангс ули электронной ветеринарной карта. Истя, электронной системасонть тешкстазь сельхозпредприятиятнень КРС-нь весе поголовиясь, эрицятнень хозяйстватнесэ маточной поголовиясь, нешкепиретне.
Нама, эряви тешкстамс, ветстанциятнень ды ветлабораториятнень важодемасо сеедьстэ совавтовить од ёнкст ды полавтомат. Нейгак Россиянь Минсельхозось анокстась од аравтлувт алтнэнь ветеринарно-санитарной ванномань ёнкссонть. Арсеви, сынь совавтовить 2022 иень мартсто ды кармить важодеме кото иеть.

Кода ёвтнесь Юрий Егорцев, ветеринарно-санитарной ванномась арсеви алтнэнь ды алонь продукциянть коряс, конатне ютыть производствас ды миемантень. Истя жо кармить ванновомо розничной рынкасо миевиця алтнэ. Лиякс меремс, эрицятнень хозяйстватнестэ продукциясь, конанть арсеви миемс. Бути жо алтнэ ютыть эсеть туртов, ветсанэкспертиза теемс а эряви, тешкстави проектсэнть.
Эштё вейке ёнксось – ветслужбань специалисттнэ ней кармить ванномо ветеринарной препараттнэнь тевс нолдамонть мельга ды тешкстамо нармунтнень организмасто сынст лисеманть. Истя, ковозонзо весть истямо продукциянть кармить ванномо микроорганизматнень кирдеманть лангс, теке марто патогеннойтнень. Ды колмо ковс весть – пестицидтнэнь ды антибиотиктнень улеманть лангс.

– Весе неть ветсанэкспертизатне ульнесть икелеяк, – корты Юрий Николаевич, – ансяк сынст теемань лувось ульнесь аламодо лия. Теке марто ней арсеви совавтомс эштё зярыя ёнкст. Арсевить полавтомат ракшатнень печкемань ды сывелень ветсанэкспертизань теемань кемекстамотнесэяк. Од правилатне кармить важодеме кода физической, истя юридической лицятнень туртов, конат печксить ракшат, теке марто нармунть ды идем ракшат.

Тешкстасынек, Юрий Николаевич эштё топавты Орданьбуень райононь ракшань орматнень каршо бороцямонь коряс станциянь прявтонь тевтненьгак. Ды кода мерсь сонсь, Орданьбуень районсояк тевтне молить вадрясто. Меельце шкастонть тосояк важодемась ладявсь парсте, ванновсть-решавсть седе покш мелявкстнэ. Орданьбуесэяк, Отяжелесэяк парсте ладязь «Меркурий» системась. Сетненень, кить микшнить сывель, ловсосто продукция, максневить эрявикс документт. Ды истямо продукциянь миеманть мельга парсте ваннови.

– Течинь чине минек сехте покш сюпавчинек – ломантне, – тешксты Юрий Егорцев. – Тесэ важодить превей, тевень содыця ды чарькодиця профессионалт. Ды сынь теить весементь, штобу а нолдамс кодамояк орма, ванстомс аволь ансяк ракшатнень, ломантнень эрямост.

Юлия Еремина.
Фототне: Эдуард РЕТУНСКИЙ
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».