Аволь умок масторонь келес тешкставсь Доброволецэнь чись. Те кенярксчись кемекстазь аволь пек умок. Аламо шканть лангс апак вано, эрьва чистэ ламолгадыть сеть ломантне, кить питневтеме анокт теемс паро тевть, максомс лезкс кажос понгозтненень, ськамост стакачи марто вастовозтненень.
Неть: школасо тонавтницят, вузонь студентт, важодицят ды пенсионерт, шумбрачинь коряс киртязь возможность марто ломанть ды истя седе тов. Мордовиянь волонтёрствань тевтнень топавтыцятнеде весемезэ 24 тёжадо ламо. Эрьвась юткстост бажи кандомс лезэ аволь ансяк малавиксэнзэ туртов, истя жо весенень, кить тень учить.
Неень шкане минек республикасо важодить «Волонтёрт-медикть», «Культурань волонтёрт», «Изнямонь волонтёрт», «Экологиянь движениянь волонтёрт», «Поиск 13» вешнемань-идемань отрядось, «Сиянь волонтёрт». Сынь питневтеме максыть эсест содамочист ды шкаст, эсест лезксэст вельде бажить каземс паро ёжо ды кандомс лезкс обществантень.
Те промксонть ютамодо мейле МР-нь Прявтось тейсь ушодкс «Елка желаний» од иень паронь теемань акциянтень – региононь руководителесь сайсь кузнэнть лангсо эйкакштнень салавань мелест марто ниле шарт. «Полина Соловьеванень эряволь микроскоп, Анна Дворниковань ули бажамозо понгомс Московсо «Остров мечты» парконтень. Егор Корнеевнень эрявольть бутсат, Дмитрий Бурнаев бажи понгомс циркев. Весе неть мельтне-арсематне саевить мельс!», – мерсь Артём Здунов ды путынзе открыткатнень пиджаконь потсо зепес.
Валентина Юдина