Эрьва кезэрень веленть эсензэ, лиятнень енов а молиця эрямозо, конась ушодови зярыя сядот иеде икеле. Теде башка, эрьва веленть лемензэ перька свал эрсить кодаткак легендат. Евтнетяно Ицялбуень Пардале веленть (рузкс Парадеево) историядонзо, конанень мелят топодсть 400 иеть. Сонзэ теевема иекс ловови 1624 иесь. Пардалесь ашти кавто велестэ – «деревня Дубенки» ды «село Парадеево», косо стявтозель церьковась. Неень шкасто велесэнть улить клуб, почта, церькова, лавка, медпункт, администрация.
Веленть историязо
Сыре ломантнень валост коряс, васенце кудотне аштесть аволь неень веленть таркасо, а котошка вайгельбеть пелевеенов. Неень веленть таркасо жо кассь тусто вирь. Умонь шкатнестэ, зярдо велетнень лангс кайсевсть душманонь вийть, ломантне аламонь-аламонь кармасть туеме виренть потс ды тосо путнесть кудот. Велентень сеть шкатнеде ледстнемакс кадовсть Сима атянь лисьмась, Калмо латкось ды лия топонимикань лемтне. Веленть песэ латкотнева яксемстэ ламот мукшность емавтозь кресткеть, эрьгеть, суркскеть ды ламо лия мезть, конатнень, нать, емавтнизь (эли, паряк, казекшнизь эрзянь пазтнэнень) тесэнь эрицятне.
Парадеево веленть лемензэ теевемадо ули истямо евтамо, конань тенек евтнизе велень сыре ломанесь Мария Богатова: «Вейке сюпав ломаненть кавто тейтерензэ ялгаст марто тусть вирев ягодань пурнамо. Ды сынь, патят-сазорт, кадовсть лиятнеде. Вешнесть эйсэст кувать, шкань ютазь муизь кулозекс се таркасонть, косо ней веленть куншкасо стявтозь крестось. Неть эйкакштнень кулома тарказост тетяст-аваст путсть часовня ды се шкастонть саезь, аламонь-аламонь велесь кармась шаштомо виренть енов. Секскак, ловови, «Парадеево» велень лемесь лиссь тейтертнень емамодо мейле, «пара девок» валтнэстэ».
Эрзятне жо кармасть евтамо сонзэ эсест ладсо – Пардале. Шкань ютазь, тесэнь модатнень саинзе кедензэ алов Беляков боярось, кона эрясь Петербургсо. Те шкас велесэнть касы-мазылгали Бояронь садось, козонь топольтне ды килейтне ускозельть Англиясто. Сеть килейтне явовить минексетнень эйстэ – човинеть, прок елганя тейтерть. Топольтне жо сексня пек мазыйть – якстерть мерицят. Се таркасонть ульнесь барской усадьба, аштесть кавто этажсо кудот, конань таркас мейле панжокшность школа.
Мария Богатова ледстни лиядояк: «Бабам евтнекшнесь, келя, истямо мазый церькова, кодамо минек, косояк арасель. Стявтокшнызь Ленинградонь строительть. Уш прядомстонзо, куполонть путомсто, вейке церанть пряс прась чочко ды сон кулось. Седе тов куполонть эзть карма путомо. Те церькованть целанек яжизь 1965 иестэ. Сестэ уш Пазонтень кемема арасель ды мон эсень бабань марто ансяк кавксть-колмоксть совсинь церьковантень, секскак пек мельсэнь кир дян потмоенксонзо. Меельце батюшканть фамилиязо ульнесь Багров, истя жо Ленинградстоль...»
1930-це иетнес Дубенкань ды Пардалень колхозтнэ башкальть. Пардаленсенть васня лемезэль Ленинэнь лемсэ, мейле, зярдо вейсэндизь Дубенкансенть марто, кармась Карл Марксонь лемсэ вейке колхозокс. 2004 иестэ колхозось каладсь ды хозяйствась вейсэндявсь «МАПО «Восток» ООО-нть марто. Велень ломантнестэ ламот нейгак тосо важодить.
Мекс веленть «Дубенка» лемезэ – ней а содави, паряк, Дубенской райононь Дубенкасто ломантне тей састь ды кадызь эсь велень лементь, а, паряк, мекевлангт… Тесэнь Дубенкасонть ламо фамилиятне тостонь: Чекашкин, Чекушкин, Палагин ды лият.
Пардалесэ 1970-це иетнестэ эрясть натой 2 тежадо ламо ломанть. Ней жо 200 эрицяткак эзть кадово. Бувалань ломантне тесэ эрясть покш ялгаксчисэ, эзть пеле кодамояк важодемадо. Мария Богатовань ледстнематнес кадовсть шкатне, зярдо кизна весе вейсэ пурныльть тикшень ледеме: «Аватне мазыйстэ наряжильть, эрзянь ломантне пек вечкилизь пиже, якстере, ожо, валдо-сэнь тюстнэнь. Монськак паксянь тевтнес эйкакшокс эште карминь яксеме. Бути сестэ варштамс ледицятнень лангс менельстэ – те мазыйдеяк мазый пертьпелькс ды эрьва кодамо тюсонь оршамопельсэ ломанть, конат аштить вейке омбоце-мельга ды ве ендо неявильть нармунень селмокс. Оймеськак кецниль лангозост ванозь… Истя жо мазыйстэ ютавтнесть кенярксчитненьгак. Сехте пек – Троицянь чинть. Малав недлянь перть тешкстасть: кавто васенце читнестэ кияк а важодиль, колмоцестэнть, конанень эряви – лисильть роботамо. Троицянь простямо чись пек мельстуицяль – валске марто весе ушодыльть пурнавомо велень песэ пандонтень, косто ломантне сыргильть велеванть ютамо. Мартост цецят, балалайкат, конатнесэ налксесть аватне, лангсост эрьва кодамо тюсонь оршамопельть: келей юбкат, малиновой ковтат, конатне кувтолдозь кувтолдсть. Васенцекс ютыльть аватне, мельгаст од цератне, морыть, пеедькшнить, пейдить, кинь вастыть – кутморить, вешить нолдамс чумост истямо покш чистэ. Веленть песэ леентень пачкодемстэ ведьс ертнить цецяпусмот. Лововсь, кинь пусмозо седе ламо тарка уи, се седе куватьс эри».
Цецянь ертнемадо мейле весе пуромильть вейс ташто школанть ваксс, тосо морыльть, элякалильть ды озыльть вейсэ чугунсо пидезь вецаямдо коршнеме.
Троицянь омбоце чистэнть нолдавтыть чумост вейкест-вейкест кедьстэ. Те чинть ютавтнесть вирень лисьмапря вакссо, конась чуди 1600 иетнестэ саезь. Кода инязорось Петр I кармась стявтомо Петербургонть, сеске макссь кармавтома: эрьва велесь срубонь нупондямс таргазо левш. Ды те лисьмапрянть лангсо валязь пекшень кертнеде теевкшнесь покш селт. Цератне мейле селтонть эйстэ седе вере таркасонть мусть пандо алдо чавиця лисьмапря. Тосто кармасть кандтнеме симемс ведь. Евтамотнень коряс, вейке церась мольсь лисьмапрянть малас ды чувтонть вакссо неизе Пазонь аванть – Троеручицанть – ликензэ. Лисьманть лемезэяк течис истямо – Троеручица, кона кармась пек содавикс лисьмакс весе пертьпелькссэнть. Мейле тов стявтсть часовня, лисьманть витнизь-петнизь ды 1931 иестэ маласонзо кассь-виевгадсь Труд велесь, кона совась Пардалень велень поселенияс, тосо весемезэ 20 кудольть… А ней уш допрок чамсь, ялатеке нейгак эрьва иень Троицясто сакшныть тов ламо ломанть.
Мария Богатовань
кудораськезэ
Мария Ивановна Богатовань (тейтерькс – Чекашкина) тетязо ды авазо теке велень, сонськак чачсь теске 1948 иестэ. Эйкакштнеде семиясонть сисемельть, Мария Ивановна омбоцель. Иван Федорович тетяст ульнесь вадря строитель, ансяк чавовсь рана, 48 иесэ понгсь машина алов – шабра ломаннень якась лездамо вирев ды машинась прянзо лангс велявтсь пандо прясто. Аваст, Анна Матвеевна, кадовсь сисем эйкакш марто.
Иванонь тетязо, Мария Ивановнань покштязо, сырнень кедь ломанель. Колмо церанзо саекшнинзе Ленинградов: сехте покш церась военной училищасо тонавтнесь, омбоцесь ды Мария Ивановнань тетяськак – строительнойсэ. Ине Отечественной войнав Иванонь саекшнизь 19 иесэ. Войнасоль 1945 иес, разведчикель, кавксть казезель Славань орденсэ. Пек ранязель, 6 ковт гипссэль. Теде мейле сась велев, косо васня важодсь вельсоветэнь секретарекс. Шкань ютазь сонзэ тердизь техникумов, косо эзть сатно преподавательть. Марясть косто-бути, сон тонавтнесь Ленинградонь строительной техникумсо. Ансяк эзь кенерекшне прядомс, саизь войнав…
Иванонь тетязо жо Ленинградсо блокадастонть вачодо кулокшнось. Иванонь покш лелясь военноель – сеске саизь войнав, омбоценть – мельганзо. А Иван колмо ковт тонавтнесь. «Тетям покштянь ильтиксэлизе кудов, келя, ялатеке Ленинградонть сайсызь. «Арась, – мерсь, – зярс тонь а ильтятан войнав, а туян». А мейле ушодовсь блокадась ды сон кулось вачочиде, – евтни покштядонзо Мария Ивановна. – Бабанень сакшнось серма покштянь меельце майсематнеде. Сонсь уш эзь стякшново, сермась кучозель лия ломань вельде, конат якильть квартиратнева. Коневонь аразде сермась човинькасто сермадозель газетань строчкатнень юткова. Бабанень, сермадонть башка, сась апокшке посылкаяк – нуцьканзо туртов натой някине кучокшнось покштясь. Бабанень ловнызь се серманть, тосо евтневсь, кода сон майсесь ды простнесь весень марто. Евтнесь, кода шабразо кулось, кона Ламбаськень ульнесь… Те сермадонть мейле бабань ежозо маштсь ды кавтошка недлят паро ежос эзь саво – ансяк сельмензэ панжсынзе, газетанть несы, таго ежонзо емавтсы. Мейле мерсь, саты, пултынк каштомсо… А зярдо эйкакштне кассть, янксесь, мекс пултавтызе се газетанть, ней, мери, эйкакштне бу ловновлизь…»
Саранскоень строительной техникумсо Иван Федорович важодсь тонавтыцякс кавксо иеть. Низэ, Анна Матвеевна, эзь кортавтово туемс Саранскоев, велень кудонзо эзизе кадо. Савсь Иван Федоровичнень таго велявтомс велев. Ушодсь роботамо бригадасо, маштсь важодеме эрьва кодамо кшни марто. Сеть шкатнестэ истят кедьенкстнэде аламольть ды сон тейнесь сокат, тарвазт, пелюмат. А мейле ломантне кармасть кудонь путомсто латотнень чавомо кшнисэ, косо истя жо пек маштовсть Иван Федоровичень ероков кедтне.
Сонсь, Мария Ивановна, лиссь мирденень эсь велень цера экшс. Мирдензэ марто эрясть 47 иеть, трясть колмо эйкакшт – кавто церат ды вейке тейтерь, конань пельде улить колмо нуцьканзо. Авась 43 иеть важодсь школасо. Ицялонь педучилищадо мейле 23 иеть ульнесь вишка классонь тонавтыцякс, седе тов 20 иеть ветясь математика. Важодсь 62 иес: «Зярдо 1967 иестэ сынь важодеме школав, ульнесть 950 тонавтницят, класстнэсэ малав 30 эйкакшольть. Чувтонь школасонть голландкатнень техничкатне уштнесть васня пенгесэ, мейле – брикетсэ. Кода сась од директор, сеске кармась Бояронь садонтень строямо од покш школа, ды 1970-це иетнестэ ютынек тов… Ней жо 5 эйкакшт велесэнть кадовсть, сынст усксить Береговые Сыреси велев».
2013 иестэ районсонть пекстазельть сеске кавто школат – Пардалень ды Папулевань. Икелень тонавтыцянть седеезэ ризны эрзянь велетнень кис. А чарькодеви, мекс эрявсь Береговые Сыреси велес строямс школа? Зярдо эсест велесэ пек паро школась ульнесь: кавто этажсо, келей коридор марто, спортзал, спортонь площадка, тир, актовой зал. Васенце шкастонть, келя, сынст велень эйкакштне, зярдо кармасть тонавтнеме лия велесэ, пеняцясть – тосо, келя, берянь: класстнэ вишкинеть, коридорост теинеть…
Школавтомо велесь невти сыре бабинекс, конанень аламо кадовсь эрямс масторлангсо. Истя аламонь-аламонь чамить-емить велетне, кадовить эйстэст ансяк ледстнемат.
Марина Агафонова