Дубёнкань райононь Ломаты велень аватне эсь пельде анокстасть СВО-нь таркатнесэ ванстыцянок туртов кудонь лапшат. Эрьва порциясь теезь покш вечкема марто ды канды эсь эйсэ тиринь кудонь лембенть. Кадык сынь содыть, кода пек эйсэст учить кудосо!
Почт ды ал марто човорязь чапаксстонть керсевить ламо пелькскеть, конат седе тов костявить столь лангсо кудонь лембе ды коське коштсонть. Истямо ладсо теезь лапшась вадрясто-парсте ашти контейнерсэ куш цела иень перть ды а коли. Пидемазо аволь кувать – ветешка минутань перть. Сон а калады ды а вецакады, бути ашти ведьсэ седе куватьс.
Те паро мелесь сась Ломатынь клубонь прятонтень Гельдюса Шабанованень. Те меленть кирдизе велень прявтось Наталья Колесанова. Аватне куроксто пурнасть раськень ярсамопелень теемань цела артель, кона администрациянь кудосо кедень илештязь ушодсь арсезь тевенть топавтомо.
Арсетяно, истямо ладсо теезь лапшась эждьсынзе боецтнэнь оймест ды куш аламос чопавтьсынзе тиринь кудопотс.