Четверг, февраля 22, 2024
Важное

Сентябрянь эрьва колмоце недлячистэнть весе сеть ломантне, кить эрямост сюлмизь виртнень ванстомаст, сынст ламолгавтомаст марто, тешкстыть эсь профессиональной кенярксчист. Ниленьгеменде ламо иеде икеле те покш чись кемекстазель а стяко. 1977 иень сентябрянь 18-це чистэ кармась совавтовомо эрямос «Вирень законодательствась». Те документэнть вельде, куш эйсэнзэ ульнесть ламо полавтомат, ванкшновить весе кевкстематне, конатне кандовить вирень хозяйствань отраслянтень.

Колмо иень ютазь кемекстазель вирень важодицятнень туртов профессиональной кенярксчись. Васняяк те теезель вирьсэ важодиця ломантнень вейсэндямга, пертьпельксэнь сюпавчитнень ванстомга.

Течи Алексей Ларькин – минек редакциянь инже.
– Алексей Андреевич, те иень кизэсь а шождатнестэль Вирень, охотямонь хозяйствань ды природопользованиянь министерствань важодицятненень, истя жо весе пертьпельксэнь вечкицятненень. Кода удалась ванстомс минек вейсэнь сюпавчинть – виртнень кирвазематнеде истямо опаня ды пси шкастонть?

– Алкукскак, те иесь минек варчнесь нардевчинек лангс. Кизэнь ды сёксень читне ульнесть псить ды пеземевтеметь. Кирвазематнень а нолдамга эрямос совавтозельть казямо мерат. Те иень кизна кирвазематнеде пелемань лувонтень путозель ветеце классось, конась максневи сестэ, зярдо ушосо ламо чинь ды ковонь перть кирдеви пси, опаня ды пиземевтеме шка. Тень ловозь, республикасонок минь тевс нолдынек дополнительной тевть пожартнэнь а нолдамга.
Васняяк, минь парсте анокстынек кирвазематнень а нолдамонь шкантень. Эдь зыянов тевенть лисемстэ эряви парсте чарькодемс, кодамо сон, бути кирвазсь аволь покш тарка, вишкине толбандясь мадстеви вирьваныцятнень вийсэ. Бути жо кармасть паломо чувтотне, сестэ эряви тердемс пожарной службанть, пачтямс райононь муниципальной образованиянь представительтненень. Ков седе курок редяви палома таркась, тов седе шожда сонзэ мадстемс. Теке шкасто эряви содамс, ков совавтовить сеть таркатне: вирень фондс эли велень хозяйствань территорияс.

– Алексей Андреевич, неень шкане кода вантадо виртнень мельга, штобу шкастонзо редямс кирвазематнень?

– Тешкстаса, неень шкане минек улить сатышка технической средстванок зыянов тевтнень а нолдамга. Васняяк важодицянок кеместэ ваныть весе инвентаренть мельга, конась анокстави пожаронь мадстемс. Покш лезкс тенек максыть виртнесэ уликс видеокамератне.
Сынст таркаст секе-тев полавтнетяно, аравтнетяно эйсэст тов, косо ули седе покш пелема кирваземанть коряс. Истя жо тевс нолдатано менельстэ ваноманть. Спутникень связенть вельде неявить сеть термоточкатне, косо апак учне лиснить кирваземат.
Теде башка, ловтано се шканть, куроксто-аволь техникась пачкоди кирвазема таркантень. Текенень поладса, техникась ванстови-кирдеви аволь райононь куншкакуросо, сон ашти лесничестватнень ды виртнень маласо.

– Виде, прявт тевесь – профилактикань мероприятиятнень ютавтомась, пожаронь а нолдамонь тевтнень топавтомась. Кодат мерат топавтыть вирьсэ важодицятне зыянов тевтнень а нолдамга?
– Алкукскак, пожаронть седе шожда а нолдамс, мадстеманть коряс. Тень ловозь, те кевкстемантень минь явтано покш мель.
Сеть вирень таркатнева, косо сеедьстэ лиснить пожарт, сокави модась. Мордовиясо истят таркатнеде 5 тёжадо ламо. Нама, китнень ваньксстэ кирдемантень истя жо явтано покш мель. Бути сынст лангсо кармить улеме пирявкст, сестэ техникась тосо кирдеви куватьс, се шкане пожарось ков седе курок келейгады ды сонзэ мадстемс карми а шожда, вийтькак эрявить седе ламо.

– Алексей Андреевич, кодамо тувталонь коряс седе сеедьстэ лиснить пожартнэ, кить эрсить чумокс минек сюпавчинтень зыянонь кандомасонть?

– Виртнень кирваземасо седе сеедьстэ чумокс эрсить ломантне. Тувталтнэ – апак мадсте сигарета, толбандя… Те иень пси ды опаня шкастонть минь совавтынек истят казямо мерат, кода лоткавтынек вирев якамотнень. Сентябрянь 17-це чис аволь ансяк транспортсо, ялгояк эзь мереве совсемс ды яксемс виртнева.
Теде башка, сёксенть ушодовомсто, зярдо шкадо икеле панжозель охотямонь шкась, минь яволявтынек сонзэ лоткавтомадо. Кода пертьпельксэсь полавтовсь, неть амерематнень саинек. Паро, ломантне чарькодимизь.

– Алексей Андреевич, весе эрявикс мератнень тевс нолдамонть лангс апак вано, ялатеке эдь ульнесть кирваземат кода икелень иетнестэ, истя нейгак. Палсть ламо чувтот. Инескеть, пачтядо, кода вельмевтевить минек виртне?

– Виртнень одкстомтомась, эйсэст чувтотнень ламолгавтомась – те минек прявт тевенек. Невтемакс, те иестэнть одс вельмевтьсынек 3 тёжадо ламо гектар лангсо виртнень, эйстэст ветесядтнэ – искусственной лувсо. Минь те шканть явтано кавтов: тунда ды сёксня, зярдо ютавттано вирень озавтомань акциятнень. Тедеде неть тевтнень ушодынек сентябрянь 17-це чистэ.

– Эрямось таркасонзо а ашти, ламот путыть од кудот, банят, сыненст эряви пиломатериал, кодамо лувсо макстадо вирь республикань эрицятненень?

– Виде, сеть ломантненень, кинь ули модаст ды кудонь путомадо документэст, минь сыненст явтано кода пичень, истя лопав породань чувтот. Истя жо явови вирь банянь стявтомс эли витнемс.
Бути ломаненть апак учо палы кудозо, сыненст истя жо максови вирь. Меельце шкасто эрицятненень явинек 170 тёжат кубометрат древесина. Сеть ломантне, кинень эряви истямо лезкс, кадык совить Вирень, охотямонь ды природопользованиянь министерствань официальной сайтэнтень, тосо ули весе эрявикс информациясь, ды кадыть яволявтома. Истя жо мереви самс Коммунистической куросо аштиця минек министерствас ды кандомс эрявикс документтнэнь.
Те иестэ арсетяно озавтомс 12 тёжат гектарт вирть. Тень вельде ламолгавтсынек минек пертьпельксэнь сюпавчитнень. Паро, иестэ иес ламолгадыть сеть ломантне, кинь ули мелест лездамс виртнень вельмевтемантень, минек экологиянть ванськавтомантень.

Мордовия Республикасо Вирень, охотямонь хозяйствань ды природопользованиянь министракс Алексей Ларькин кармась ютазь иень августсто, «Моя Мордовия» республикань проектсэнть изнямодо мейле. Алексей Андреевичень чачома ёнксось – Покш Березникень райононь Гарт велесь. Сон прядызе Марийской государственной технической университетэнть «Лесное хозяйство» специальностенть коряс. Теде мейле вейке ие важодсь Чамзинкань лесхозсо вирень мастерэкс.

2008 иестэ тусь эрямо Московонь областев, косо важодсь эрьва кодамо тевсэ. 2012 иестэ саезь 2021 иес – Московонь областень Вирень хозяйствань важодемань комитетэнь отделэнь прявтоль. Алексей Андреевичень лангс путозельть пожардо виртнень ванстомась, зыянов тевтнень тосо анолдамось, шкастонзо толонь мадстемань ды ламо лия кевкстематнень решамост. Вирьсэ важодицятнень кенярксчинть коряс ули мелем ёвтамс поздоровт весе сеть ломантненень, кить эрямост сюлмизь те а шожда ды весенень эрявикс тевенть марто.


Алексей Ларькин сови МР-нь Прявтонть юрсо экспертной клубонтень. Те сонзэ ушодксонзо коряс республикасо ютавтозель «Ванстсынек виртнень» экологической акциясь. Истя, Мордовиянь эрицятне седе эрязасто кармасть озавтомо од чувтынеть, ёвтазель мель сынст ламолгавтомс 10 тёжас. Ледстяви, сестэ те арсемась тусь МР-нь Прявтонть Артём Здуновонь мельс, ды сон кемекстась Указ Алексей Ларькинэнь коряс Вирень, охотямонь хозяйствань ды природопользованиянь министракс аравтомадо.

Тешкстасынек, васенце читнестэ саезь од министрась, кода кортыть, «кедень илештязь» ушодсь седейшкава важодеме. Сон тунь а ашти вейке таркасо, секе-тев пачтятано тиринь газетань лопатнесэ пертьпельксэнь коряс эрьва ков якамодонзо ды республикань экологиянть паролгавтомга важодемадонзо.

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».