2023 иень январень 1-це чистэ саезь ушодызе важодеманзо Российской Федерациянь Пенсионной ды социальной страхованиянь фондось. Сонзэ теемадо Указонть сёрмадстызе РФ-нь Президентэсь. Нурькинестэ Фондось карми лемдевеме Россиянь Социальной фондокс. Тень коряс промкс ютась МР-ва Россиянь Пенсионной фондонь Отделениясо. Сонзэ ветясь прявтось В. И. Василькин.
– Мезе тенек максы кавто фондтнэнь вейсэндявомась? Ломантнень туртов те карми седеяк паро. Ней вейке таркасо теевить-сёрмадстовить весе пандоматне, куроксто максови лезкс эрицятненень. Саемга, ломаненть ули инвалидность. Сонзэ коряс пенсиясь максови Пенсионной фондсо, реабилитациянь ды санаторно-курортной лецямонь коряс пшкали Социальной страхованиянь фондов. Ней жо кавто фондтнэнь вейсэндямодо мейле весе тевтне теевить вейке таркасо. А эряви сёрмалемс яволявтомат зярыя структурава, вешеви ансяк вейке яволявтома, – пачтясь Владимир Ильич.
Мордовиясо поладыть важодеме эрицятнень пшкадемаст коряс 22 офистнэ, конат аштить Саранскойсэ ды республикань районтнэсэ. Пенсиянь ды лия пандоматнень явшемань читне ванстовить. Социальной федеральной лезксэнь максомась карми вейкине пшкадемань коряс.
Эйкакштненень ды пешксесэ аватненень пандоматнеде
Январень 1-це чистэ саезь Россиясо ушодыть максомо вейкине пандомат эйкакштненень ды пешксесэ аватненень.
Од пандоматне максовить пешксесэ аватненень, конатне стясть учётс васенце ковтнестэ, истя жо тетятненень-аватненень, кинь улить 17 иеде седе вишкине эйкакшост. Сынст карми явшеме Россиянь Социальной фондось. Вешематнень коряс, вейкине пособиясь карми максовомо семиятненень, конатнень доходост региональной прожиточной минимумдонть седе алкине. Сонзэ максомга пштистэ ванкшновить семиятнень вейсэнь доходост. Мордовиясо семиясо вейке ломаненть доходозо илязо уле 12 тёжат 219 целковойде седе ламо. Доходтнэ лововить кемгавтово ковтнень перть. Пандоматнень максомадо икеле ванкшнови недвижимостесь (квартиратне, кудотне, гаражтне, модань участкатне) ды транспортось (автомобильтне, мотоциклатне, сельхозтехникась ды седе тов). Социальной фондонь сайтсэ парсте пачтяви, кодамо ули-паро, зяро ды кодат таштавкст саевить мельс пособиятнень максомга.
Доходтнэде карми аштеме пособиянть покшолмаськак. Покш ломаненть эли эйкакшонть лангс сон карми 50 %, 75 % эли 100 % региональной эрямонь минимумдонть – мельс саеви мезень коряс максови пособиясь.
Мордовиясо эйкакштнень лангс пандоматнень покшолмась ковозонзо карми 6 тёжат 201 целковойстэ саезь 12 тёжат 402 целковойть. Пешксесэ аватнень туртов ковозонзо – 6 тёжат 659 целковойть 50 трёшникстэ саезь 13 тёжат 319 целковойть. Неень шкасто пешксесэтненень пандови эрямонь минимумонь 50 %. Вейкине пособиянть тевс совавтомга максови шка. Семиятнень ули праваст кадомс икеле максовицянть эли ютамс од пособиянтень.
Колмо иес эйдетнень, конатне чачсть 2023 иеденть икеле, тетятнень-аватнень ули праваст получамс пандоматнень икелень вешематнень коряс, зярс эйкакшонтень а топодить колмо иеть. Россиясо вейкине пособиянть тевс совавтоманть вельде семиятненень карми максовомо лезкс аванть пешксесэ улемастонть саезь эйкакшонтень 17 иетнень топодемс.
Пособиянть максомга эряви кучомс яволявтома Госуслугань порталс эли пшкадемс Социальной фондонь, МФЦ-нь клиентэнь службатнес. Ломантне кармасть пшкалеме уш декабрянть прядовомсто. Эряви меремс, пандоматнень коряс максови ансяк вейке яволявтома. Весе лия эрявикс конёвтнень Социальной фондось сайсынзе государственной информационной систематнестэ, вешсынзе эрявикс организациятнестэ ды органтнэстэ. Эстест кандомс документт эряви сетненень, кинь семиясо улить военнойть, спасательть, полицейскойть ды лия ведомствань важодицят, истя жо сетненень, кинень пандыть стипендия, грантт ды лия пандомат. Яволявтоманть ванкшныть малав кемень чинь перть. Сехте ламось – колоньгемень чить. Васенце пандоматне сыть вете читнень перть, седе мейле, кода ладяви пандомась.
Мордовиясо вейкине пособиянть мельга пшкадить малав 37 тёжат ломанть. Январень 5-це чис уш каясть малав 3000 яволявтомат.
Пенсиятнень
индексациясь
2023 иень январень 1-це чистэ саезь а важодиця пенсионертнэнь страховой пенсияст кепедевсть 4,8 %. Эрьва ломаненть пенсиянь касомась эсензэ. Кинь седе ламоль стажозо, зарплатась, страховой взностнэ, пенсионной коэффициенттнэ, сень седеяк ламо страховой пенсиянь покшолмась. Кой-кинь пенсиясь касы 822 целковойс (саезь средней невтевкстнэ).
Мордовиясо индексациясь тееви 224 тёжат 175 ломаннень. Тешкстама, индексация тееви ансяк а важодиця пенсионертнэнень. Сындест республикасонок малав 182 тёжат.
Кода икелеяк, важодиця пенсионертнэнень индексациясь тееви, зярдо сынь лоткить роботамодо. Перерасчётось тееви важодемасто туемадо мейле ковонь ютазь, индексациянь пандоматне ушодовить колмоце ковстонть.
Зярс анокстынек номерэнть печатьс, сась куля: МР-ва РФ-нь Социальной фондонь Отделениянь прявтокс ладязель В. И. Василькин.
* * *
Истя жо те вастовомасонть ульнесь «Мелень топавтыця куз» эрьва иень паро тевень теемань акциясь. «Ёлка желаний» сайтс сёрмадсь Артём Журавлёв. Од иень казнекс сон пек учось Алиса марто превей колонка. В. И. Василькин топавтызе цёрыненть мелензэ. Сон казсь тензэ Яндекс-Станция, те – превей колонкань вишка версия, конань потсо ули виртуальной лездыцясь Алиса. Сон муи теть эрявикс информация, нолды вечкевикс моро, пачти, кодамо ушось.
Артём Журавлев тонавтни Саранскоень промышленно-экономической колледжень омбоце курссо сварщикекс. Пек вечки баскетбол. Авазо Ольга Васильевна ськамонзо три-касты ниле эйкакшт: Артёмдо башка, улить кемень иесэ цёрынеть-кавтаськеть ды сехте вишка ялаксонтень кавто иеть. Аванть валонзо коряс, Артём – алкуксонь нежезэ ды лездыцязо, чевте седей, свал анок лездамс эрьванень.