Тиринь келень тонавтнемась, эсь раськень койтнень-кирдатнень, культуранть ванстомась аштить прявт тевекс эрьва раськенть туртов. Тень лангсо важодема ветяви весе республикатнесэ. Косо, паряк, аламодо седе пек, косо седе лавшосто. Теке марто важодема ули. Ды седе пек те важодеманть бажить ветямс школатнесэ эйкакштнень марто.
Неть читнестэ минь ульнинек инжекс Саранск ошонь 17-це школасо. Школась покш, тонавтницятнеде ламо. Тесэ ветявить кавто кельть: эрзянь ды мокшонь. Эрзянь келень тонавтнема лувдонть, тевтнеде ды мелявкстнэде миненек ёвтнесь эрзянь келень од тонавтыцясь Оксана Николаевна АНТОНОВА.
Тейтересь чачсь-кассь Дубёнкабуень Орданьбуе велесэ. Школанть прядомадо мейле тонавтнеманзо поладызе М. Е. Евсевьев лемсэ Мордовской педагогической (сестэ) институтонь филологиянь факультетсэ. Тесэ жо прядызе магистратуранть ды кармась важодеме 17-це школасо эрзянь келень тонавтыцякс. Те ульнесь ниле иеде икеле.
– Институтсо тонавтнинь парсте, прядыя якстере диплом марто. Зярдо тонавтнинь, тосо важодсь Любовь Петровна Водясова. Сон нейгак тосо тонавты. Самай Любовь Петровна минек тонавтымизь вечкеме эсь тиринь келенть, ламо тенек кортась сонзэ кастомадо-виевгавтомадо. Ды сон монь туртов панжизеяк тонавтыцянь тевентень кинть. Эдь школасо тонавтнемстэ теде эзинь арсекшнеяк, а уш тонавтыцякс улемс превскак тень эзь сакшно, – корты Оксана Антонова.
Ансяк эрямосо весемесь ладяви-тееви кода, паряк, эряви. Истя, школадо мейле тейтересь понгсь педагогической институтов.
– Тосо тонавтнема иетнень перть минь пек покш мель явинек наукантень: эрьва кодат конференцият, олимпиадат, пелькстамот ды вастовомат. Эрьва истямо мероприятиянтень эрявсь вадрясто анокстамс, тень коряс эрявсь свалшкане важодемс. Ды тесэяк минек группантень пек лездыль Л.П. Водясова. Паряк, тень коряскак группанок ульнесь пек виев. Весемезэ эйстэнек ульнесть колоньгемень ломанть. Нама, тесэ эрзяткак ды мокшоткак. Тонавтнемантень весе явинек покш мель. Ды, эряви меремс, ламот эстест кочкизь тонавтыцянь тевенть.
Школасо тонавтнемстэ бажинь молемс тонавтнеме историянь факультетс. Ды те меленть топавтыя – факультетэнть прядыя заочна. Ансяк эсень туртов ялатеке седе малавиксэкс кармась филологиясь.
Институтсо тонавтнема иетнень перть чарькодинь эштё вейке тев – алкукс покш мелем улемс тонавтыцякс. Ды зярдо прядыя вузонть, карминь вешнеме важодема школасо. Монь уш арасель мелем молемс важодеме ковгак лияв. Бажинь ансяк школав, ансяк тонавтыцякс. 17-це школас эрявсь эрзянь келень тонавтыця, арсинь варчамс эсь виень ды молинь тов.
Оксана Николаевна эрзянь келень уроктнень вети омбоце классто саезь нилеце классос. Весемезэ сонзэ кемголмово класст. Недлязонзо 26 част.
– Важодемань васенце чись нейгак мельсэнь ашти, – тешксты Оксана Антонова. – Те чись, зярдо тон совить васенцеде классос, лангозот ваныть зярыя кементь эйкакшонь покш сельметь ды учить пельдеть, штобу тон мезеяк тенст ёвтневлить мельстуиця, мезеяк максовлить, а стувтови зярдояк. Сынь эдь а содыть омбоце классо, мезе те истямось эрзянь келесь. Сеедьстэ кевкстнить, кодамо лия масторсо эштё кортыть эрзянь кельсэ, мекс истяня. Ды эряви меремс, васенце иесь весе ульнесь талновтыця. Эдь тонськак эштё ансяк прядык тонавтнемат, исень студентат. Тесэ жо эстеть улема тонавтыцякс. Ды тонавтыцякс сехте вишкинетнень туртов, конат сынсь эштё аволь кувать якить школав ды эсеть ладсо теить васенце эскелькстнэнь.
Ансяк тон – тонавтыцянь эскелькстнэнь, сынь – тонавтницянь.
Ней жо, ниле иень ютазь, монськак лиякс сован классос – покш мельспаросо, вадря ёжо марто. Мон содан, эйсэнь учить. Эсь важодеманть пек вечкса. Эдь улить невтевкст. Зярдо предметэть вечкеви эйкакштненень, зярдо эрьва уроконть учить покш мельсэ ды бажить сонзэ содамс. Монь койсэ, те корты вейкеде – тон теят эрявикс тев.
Важодемась минек уставави «Куйгорож» мультфильмастонть, штобу эйкакштнесэ сыргозтемс мелест ушодомс тонавтнеме келенть.
Кода корты тонавтыцясь, рузонь эйкакштнень марто важодемс вадря, ансяк весемесь моли кудосто, семиясто. Сынсь эйкакштне эрзянь келенть тонавтнить покш мельсэ.
– Минь весементь тейтяно классо, кудов мезеяк а максан. Эдь аволь эрьванть кудосо аваст эли тетяст содыть келенть, а сынсь эйкакштне весементь а тейсызь, эряви лездамс. Секскак важодтяно ансяк школасо, заданиятнень тейтяно вейсэ. Сынь валтнэнь превс саить пек шождасто ды куроксто, тонавтнить эйсэст. Теке марто седе пек келенть бажить содамс ды тонавтнемс татаронь эйкакштне. Сынь апак визде весементь ёвтнить, уроктнесэ пек активнойть. Тонавтнить покш мельспаросо. Свал кевкстнить, зярдо сы урокось, учить сонзэ.
Английскойдентькак седе пек бажить тонавтнемс сонзэ, – кемексты Оксана Николаевна. – Эйкакштнень марто стихть тонавтнетяно эрзянь кельсэ, невттяно эсь содамочитнень эрьва кодамо пелькстамосо, олимпиадасо. Конкурстнэсэ сынь свал анокт пелькстамс, анокстыть. Нама, пек лездыть тетятне-аватне. Ды, эряви меремс, сынь овсе а молить сень каршо, штобу эйкакшост тонавтневельть эрзянь эли мокшонь кельтнень. Сынь куш мейсэ анокт лездамс. Минь пелькстатано кода школань, истя республикань ды весероссиянь конкурстнэсэ ды олимпиадатнесэ. Ламоксть лиснинек изницякс ды призёрокс. Свал яла кодамояк пелькстамос анокстатано, тонавтнетяно стихотворения. Сынь монь васняяк кармавтсамизь стихенть ютавтомс рузонь кельс, штобу чарькодемс, мезде эйсэнзэ кортави. Мейле уш ушодтано тонавтнемензэ. Эряви тешкстамс, олимпиадасо ды пелькстамосо седе пек эсь содамочитнень бажить невтемс рузонь эйкакштне. Сынь пек куроксто весементь тонавтнить. Ды анокт молемс эрьва олимпиадантень.
Оксана Антонова келенть тонавты ансяк нилеце классос. Теке марто лиясто сыть сисемеце классонь тонавтницятне ды вешить кодамояк задания, штобу невтемс эсь содамочитнень эрзянь келень коряс пелькстамосо. Тонавтыцясь тенст а отказы, мезеяк максы тонавтнемс. Кода корты тейтересь, бути эйкакшонть ули мелезэ тонавтнемс, чарькодемс ды содамс эрзянь келенть, сонензэ эряви лездамс.
– Мон эрьва чистэ ветян кото урокт. Минек ютыть урокт ды эштё аволь уроконь шкасто важодема. Ней кезовонть шкасто аволь уроконь важодеманть ветян дистанционна. Эрьвась юты налксема ладсо, штобу эйкакштнененьгак улевель седе шожда ды тонавтнемантеньгак мелесткак улевель. Минек ветяви ансяк кель. Бути жо темась сюлмавозь кодамояк сёрмадыця эли эрзянь произведения марто, сестэ занятиясь ютавтови кода литературань урок. Планонь коряс жо литература арась. Рузонь эйкакштнень туртов эрзянь литературась пек стака, тесэ эряви содамс келенть, штобу ловномс. Ялатеке, шкань-шкань ловнотано произведенияткак, ёвтнетяно эрзянь содавикс сёрмадыцятнеде. Сеедьстэ ютавтнетяно вастовомат эрзянь поэттнэнь ды прозаиктнень марто. Нейгак вана арсетяно тердемс инжекс эрзянь сёрмадыцянть Татьяна Мокшановань. Эйкакштне истят вастовоматнень пек вечксызь. А бути уш сынсь автортнэ ловныть тенст эсь стихест, кенярксонтень пе арась. Мейле зярыя урокт теде кортатано.
Сеедьстэ эрсить панжадо урокт, анокстатано выставкат эрзянь ды мокшонь раськень культуранть коряс, якатано музеев, косо истя жо невттяно эйкакштненень раськень койтнень-кирдатнень.
Теке марто тешкставлия, вишкине классо тонавтницятнень марто важодемась аламодо седе мельстуиця. Сынь седе бажить весементь содамс, явить седе покш мель, сынст сельмест палыть. Уроктнескак яла парсте анокстыть: мартост валкскеть кандыть, эрзянь кельсэ кодаткак книгат, произведеният. Ёвтасызь, те книгась бабаст эли покштяст. Минь ванносынек сонзэ, мезеяк ловнотано. Сыненст теде покш мельспаро, – ёвтни Оксана Антонова.
Истя жо Оксана Николаевна ёвтась, неень шкане ламот сёвныть тонавтома лувонть, системанть, сёвныть школасо важодицятнень, келя, а явови сатышка мель тиринь кельтнень тонавтнемантень. Ансяк вана мекс-бути а сёвнотано эсь прянок, эдь пек ламось юты семиясто, пек ламось ашти эсенек эйстэ. Мезе минь эрьвась теинек эсь келенек ванстомга? Вана тень лангсо арсема.
Юлия ЕРЕМИНА