Отяжелень 1 № эйдень кужось ашти ве ено покш кинть эйстэ. Те таркасонть сэтьме, валдо, мазый. Кужонтень яксить малав 200 эйкакшт. Сынст марто важодить эсь тевень содыця специалистт, конат састь тей од шкасто ды роботыть ве таркасо ламо иень перть. Отяжелесэ улемстэ минь якинек тенст инжекс. Ули меленек содавтомс ловныцянок неть чевте седей, валдо ломантнень марто, кить весе оймесэ вечксызь эсь тевест.
Ламо иень перть 1 № эйдень кужонь прявтокс важодсь В.Д. Кумакшева. Сонзэ пингстэ кемекставозь паро койтне поладовить нейгак. Зярыя иеде икеле сон тусь пенсияв. Тарказонзо аравтызь од специалистэнть Галина Ивановна Исайкинань. Вановтонзо ало покш коллектив, эйкакшт, тетятнень-аватнень марто важодемась. Эрьва мейсэ лездыть коллеганзо ды, васняяк, старшей воспитателесь Мария Андреевна Тябляшкина.
– Минек кужосо панжозь 10 группат. Эйдетнень марто важодить 20 педагогт. Кадранок сатныть, улить од специалистткак. Кавто воспитателенек тусть декретэв, колмоце эйде мельга. Истят тевтне кецявтыть, демографиянть эряви кепедемс. 2017 иестэ саезь минек эйдень кужосо башка мель кармась явовомо эйкакштнень марто профориентационной важодемантень, панжозь зярыя ужинеть, те тевентень яви мель «Талина» компаниясь. Истя жо минек кужось кармась экспериментальной таркакс духовно-нравственной тонавтомань коряс. Кеместэ важодтяно тетятнень-аватнень марто, кенярксчитнестэ эйкакштнень марто вейсэ сынь лиснить райононь сцена лангс. Покш сюкпря тенст. Эйдетне сеедьстэ саевить церьковав службав, тосо важоди недлячинь школаяк (воскресной). Батюшкатнеяк сакшныть минек мероприятиятнес. Мелят панжинек кадетэнь группа, ули «Лисьмаприне» эрзянь келень ды культурань кружоконок. Эрьва кенярксчис (эйдень кужосо эли жо райононь сцена лангсо) свал анокстатано эрзянь номер – моро эли киштема. Улить эйдень эрзянь мазый костюмонок, – евтни Мария Андреевна.
Авась чачсь «Сараст» совхозсо. Школань прядомадо мейле мольсь тонавтнеме Зубова-Полянань педучилищав. Мекс истя ве енов? Покшоль мелезэ улемс воспитателекс, седе маласо жо косояк арасель истямо тонавтнема тарка. Кавто иень ютазь кармась заочна тонавтнеме М.Е. Евсевьев лемсэ МГПИ-нь (ней – МГПУ) дошкольной воспитаниянь факультетсэ. Сонзэ самай ансяк панжокшнызь. 1988 иестэ сась роботамо Отяжелень 1 № эйдень кужов воспитателекс, 1995 иестэ ладизь старшей воспитателекс. Мария Андреевна кармась паро превс путыцякс од воспитательтнень туртов. Сонсь бойка, эрьва ков кенериця, эрьва тевс чарькодиця. Весе пшкалить тензэ лезкс мельга. Теде башка, сон топавты хореографонь тевть. Нурька шкас эйдетнень марто тонавтнить-путыть киштемань вадря номерт. Киштеманть сон лови хоббикс. Школасо тонавтнемстэ ниле иеть якась хореографической студияв. Сынст велень Культурань кудов Пензань хореографической училищань прядомадо мейле сакшнось семия. Мирдесь ульнесь баянист, низэ – хореограф. Тонавтсть эйкакштнень. Ды весе те маштовсь Мария Андреевнань эрямосо. Сон путни эрьва кодат киштемат, чарькоди хореографиясо. Валонзо коряс, икеле киштемат путнесть книгасо сермадозенть коряс, кода кирдемс кедтнень-пильгетнень, ней жо тевесь шождалгадсь – ули Интернет.
Лилия Викторовна Кузнецова 1992 иестэ саезь важоди эйдень кужосо тонавтыцякс-логопедэкс. Сон чачсь Козловкасо. Школадо мейле мольсь тонавтнеме М.Е. Евсевьев лемсэ МГПИ-в начальной классонь учителекс. Зярдо сась важодеме эйдень кужов, эрявсь логопед. Ды сон таго кармась тонавтнеме, ней уш заочна дефектологиянь факультетсэ, теке шкане важодсь. Сазорозояк кочкизе тонавтыцянь тевенть, пингензэ перть роботась начальной классонь тонавтыцякс.
– Минек кужосо мон ветян группасо занятият ды кой-кона эйкакштнень марто важодян башка. Явтано мель видестэ кортамонтень, гайттнень ладямонтень, кемекстатано кортамонь аппаратонть, тонавтнетяно валт. Вишка шкане аволь весе эйкакштне парсте кортыть. Те тевесь куроксто витеви, бути ютавтомс занятият. Меельце шкане ризнэвти истямо тев: масторсонок ламо эйкакшт, конат кувать а кортыть эли кортыть беряньстэ. Койсэнь, чумот теньсэ телефонтнэ-гаджеттнэ. Тетятнеяк-аватнеяк аламо кортыть эйдест марто. Эряви кортамс, эряви свал явомс шка кортамонть кемекстамонтень. Секскак вастневан тетятнень-аватнень марто, евтан, кодат упражненият эряви тейнемс кудосо. Истя жо важодян старшей группанть марто, анокстан сынст школав молемантень – сынь уш содасызь букватнень, маштыть ловномо, явить букватнень ды гайттнень, – кортась логопедэсь.
Ламо иень перть парсте важодеманть кис Лилия Викторовна казезь ламо казнесэ. Вейкесь ютксост – РФ-нь Образованиянь министерствань Почетной грамотась. Сон изнякшнось «Иень воспитатель» райононь пелькстамосо.
Минек лия героинясь – Евгения Станиславовна Степкина – эзь арсекшне роботамс эйдень кужосо. Сон чачсь Отяжеле поселкасо. Тонавтнесь Саранскоень 22 № училищасо кондитерэкс. Практиказо ютась Московсо, тосо кадыксэлизь важодеме технологокс. Ансяк од тейтересь сеедьстэ ледстнесь тиринь кудонть ды чачома енксонть. Велявтсь мекев. Кармась роботамо КБО-со стыцякс. Тосо важодсь патязо, сон тонавтызеяк стамо эрьва кодамо техникасо. Неть маштомачитне пек лездыть тензэ эрямонь перть.
– Эйдень кужов важодеме тердимим лия патям – Наталья Порфирьевна Колесникова. Сон роботась педагогокс-воспитателекс, ульнесь пек превей, тевензэ парсте содыця специалистэкс. Пельдензэ ламо тонавтнинь. Заочна прядыя Алатырень педагогической техникумонть. Васня ульнинь воспитателень лездыцякс, кавто иень ютазь ладимизь воспитателекс. Меельце 17 иетнень перть роботан физической культурань инструкторокс. Весемезэ эйдень кужосо малав 35 иеть! Пек вечкса тевем, вечксынь эйкакштнень, коллективенек вадря, – евтни Евгения Степкина.
Евгения Станиславовна вети физической культурань коряс занятият, «Грация» ды «Крепыш» кружоктнень. Эйдетне мельспаросо учить истят занятиятнень, косо эряви чийнемс, кирнявтнемс, налксемс. Валонзо коряс, икелень шкане эйкакштне ульнесть седе кунсолыцят, шумбрат. Ней сынь пек активнойть, а пелицят, а виздицят, ламонь содамо бажицят. Теде башка, авась яви покш мель творчествантень: сон арты, сты някат, оршамопельть, ичи салов чапакссто ды севоньстэ эрьва кодат сувенирт ды картинат. Важодеманзо кучнизь Германиявгак. Минек вейке министерствась натой кармавтнесь тензэ стамс някат. Важодеманзо невтевсть ламо выставкасо. Вечкевикс тевентень свал муеви шка.
Эряви меремс, сынст пурнавсь воспитателень цела династия. Ушодызе сонзэ патязо Н.П. Колесникова, мейле сась сонсь Е.С. Степкина, иеде икеле сась тейтерезэ Татьяна Степкина. Сон 2023 иестэ прядызе М.Е. Евсевьев лемсэ МГПУ-нь психологиянь ды дефектологиянь факультетэнть. Татьяна Сергеевна важоди педагогокс-психологокс. Ютавты эрьва кодат занятият весе группанть марто ды башка-башка. Сюкпря евты педуниверситетэнь тонавтыцянзо О.В. Фадеевань туртов, конась нейгак лезды, максы лезэв превс путомат.
Од специалисттнэнь ютксо истя жо роботы воспитателекс Алина Козлова.
Кода а ледстямс Василий Дмитриевич Логиновонь? Эйдень кужосо сон умонь шкасто саезь, важоди электрикекс. Эрьва кодамо мелявксонь коряс пшкалить тензэ, аволь ансяк электричествань. Ды свал лезды, витнесы тень ды тонань, теке евкссто сазь «волшебникесь».
Иляст покордаво эйдень кужонь лия важодицятне, кинь лемест кадовсть апак ледстя. Весе тынь тейтядо покш тев ды кадык весе парось велявты тенк кавонькирда!
Татьяна Маторкина
Фототне Егор Горинэнь.