Н. П. Огарёв лемсэ МГУ-нь филологиянь факультетэнь журналистикань кафедрась ютазь недлясто «Научная среда» цикланть лувсо ютавтсь «Этносреда в дискурсе новаций медийного поля Республики Мордовия» научно-практической семинар. Панжизь сонзэ кафедрань прявтось Светлана Ржанова ды МР-нь Журналистикань союзонь председателесь Людмила Резяпкина.
Вастовомантень сакшность национальной СМИ-тнень прявт редактортнэ ды представительтне, конатне студенттнэнень-журналисттнэнень ёвтнесть эсест изданиятнеде ды телеканалтнэде. Раськень кельсэ нолдавиця газетатнень ды программатнень пек сюпав историяст ды неень шкаст. Теде кортасть «Эрзянь правда» ды «Мокшень правда» газетатнень прявт редактортнэ Марина Девятова ды Ольга Евдокимова, «Сятко» журналонь прявт редакторось Татьяна Разгуляева, «Юлдаш» газетань ответственной секретаресь Эльвира Баляева, «Мокша» журналонь редакторось Марина Аникина, «Сияжар» телепрограммань корреспондентэсь Екатерина Евстигнеева.
Кортамось мольсь седе, кодамо ёжосо ней эрить национальной прессась ды телевидениясь. Весе прасть ве мельс, весенень пек а сатныть национальной журналистт, конатне бу парсте содавлизь эрзянь эли мокшонь кельтнень. Те мелявксось пек покш, невтемакс, «Сияжарсо» эрявить корреспондентт, конатне содавлизь бу мокшонь келенть, «Эрзянь правдас» эрявить колмо корреспондентт… Кадратнень а сатномань темась а весть кепсевсь покш трибунатнестэяк. Ансяк кода карминек содамо, филологиянь факультетсэ журналистикань отделениясо, ловт, овсе арасть студентт, конатне парсте содасызь тиринь келест. Мекс истя лиссь? Икеле, зярдо минь тонавтнинек журналистэкс, абитуриенттнэнь группатне явовильть кавто пельксэв: вейкесэнть ульнесть рузт, омбоцесэнть – эрзят-мокшот ды татарт. Уш кеветее иеде теде икеле тесэ лоткасть саеме истямо лувсонть ды ней абитуриенттнэ молить ве конкурсонь коряс. Сатыть эрзянь од ломаненть содамочинзэ – сестэ юты тонавтнеме, а сатыть – те тарканть сайсызь лият. Меельце иетнестэ тей сась эштё вейке одкстомтома – ней журналистэкс тонавтнемась кармась ансяк питне лангс. Ды, меремс, питнесь аволь алкинетнестэ, эрзянь-мокшонь велетнестэ а весе тетятнень-аватнень улить сядо тёжат целковоест эйкакшост тонавтневтемс ниле иень перть.
Паряк, тевенть бу витевлизе эрзянь-мокшонь келень отделениясь? Ансяк тосо а ветявить журналистикань коряс курсат ды неть студенттнэнь ды преподавательтнень васенце задачаст – улемс эрзянь-мокшонь келень тонавтыцякс ды кастомс тиринь келень содыця ломанть школатнень, ВУЗ-тнэнь туртов. Арсетяно, од деканонть Иван Рябовонь самонзо марто тевтне сыргить таркастост ды национальной СМИ-тнес кармить само од вийть.
Вастовоманть шкасто сазетне студенттнэнень явшизь эсест газетаст, журналост, тердизь сынст эстест инжекс, сень лангс апак вано, содасызь-арась раськень кельтнень, ялатеке сыненст максыть шка неемс национальной СМИ-тнень важодема таркаст-лувост эсест сельмесэ. Пароль бу, бути зярыя студенттнэ кочкавлизь минек газетатнень практикань ютамо таркакс, сюлмавлизь бу теориянть алкуксонь практиканть марто.
Марина Девятова