Диль, диль, диль… Гайни баягинесь переменас. Минь течи инжеть Чаунзабуень Киржеман велень средней школасо. Школань коридортнэва вармакс напустясть тонавтницятне, минек неезь, тешкстама, весе шумбракстнесть. Вейкесь, сехте эрязась ды ламонь содамо бажицясь, лоткась малазонок ды састыне кевкстсь: «Тынь минек снимамо карматадо?» Кемевтинек, карматано.
Минь васенцеде те кезэрень эрзянь велесэнть, та-кода эзь савкшно икеле улемс тесэ. Эрзякс тесэ кортыть ансяк бути седе сыретне, школасонть тиринь эрзянь келесь кода урок а тонавтови уш умок, ансяк факультатив. Тонавтницятнеде жо аволь аламо – 109 эйкакшт, сынст усксить маласо велетнестэяк: Алексеевкасто, Чаунзасто, Репьевкасто, Медаевасто ды натой Комсомольскийстэяк. Кода евтнить тетятне-аватне, кадык школась аволь одтнэстэ (строязель сон 1977 иестэ), сынь кочкизь сонзэ паро ды виев тонавтыцянь коллективенть кувалма. Минек ульнесь покш меленек вастовомс тосонь тонавтыцятнень ды педагогической трудонь ветерантнэнь марто. Меленек топавтызе школань прявтось Евгения Владимировна Логинова. Те ломанденть эряви евтнемс башка. Од, мазый авась ладязель школань прявтокс 2025-2026 тонавтома иенть ушодовомсто – ютазь иень сентябрясто. Сонсь Евгения Владимировна чачсь Чаунзасо, тонавтнесь Комсомольский поселкань 3 № школасо, профессиянь коряс историянь тонавтыця, зярыя иеть важодсь Московсо, тонавтсь Россиянь ФСО-нь кадетэнь класст. Эрямонь киулотне велявтызь од ломаненть мекев тиринь енксов, ды Чаунзабуесэ тензэ сеске лиссь тарка. Нама, ульнесть кавтолдомат, ансяк покш лезкс тензэ макссь тиринь авазо – Валентина Ивановна Логинова, конась Киржемансо ламо иеть важоди историянь ды географиянь тонавтыцякс, ды весе коллективесь, конась те шкантень кадовкшнось прявттомо. Икелень директорось Е.И. Бочкарева тусь важодеме лия таркав, ды од педагогонть вастызь паро мельсэ. Тезэнь тонавтнеме сон ветизе эйкакшонзояк.
Школань прявтось тешксты, Киржеман велень школась свал невти прянзо паро ендо: тонавтыцятне анокстыть муниципальной ды региональной олимпиадатнень, спортонь пелькстамотнень призерт ды изницят. Сынь а кирдить визьксчама тонавтницяст кувалма. Кода невтизе эрямось, ламотне эйстэст кассть тиринь масторонь вечкицякс ды алкуксонь ванстыцякс-идицякс. Кавтотне – Илья Наркаев ды Дмитрий Петайкин, ризксэнтень, чавовсть специальной военной операциясо. Сынст лемс панжозельть «Героень Партат» ды мемориальной доскат. Неть цератнень лемест зярдояк а стувтовить!
Евгения Владимировна мелявты школанть одкстомтоманзо коряскак, умок тесэ арасель педе-пев витнема, пароль бу вадрялгавтомс библиотеканть, краеведениянь музеенть, косо ванстовить Отяжелень, Покш Березникбуень Косогорынь эрзянь аватнень кезэрень оршамопельтне, Трускляй велень мокшавань мазый палясь ды ламо лия курмотне-кармотне.
– Кеман, минек арсематне топавтовить, неень шкане анокстатано проектно-сметной документация, – мерсь Евгения Владимировна.
Ялгаксчисэ эриця коллективсэ тевтнеяк молить седе шождасто, мельтнеяк топавтовить куроксто. Паро, улить Логиновань превс путыцянзо, тонавтыцянзо, конатне макссть те школантень колоньгеменде-ниленьгеменде ламо иеть. Вейкесь эйстэст – Алевтина Михайловна Пародькина. Сон уш умок пенсиясо, ялатеке школань эрямось свал сонзэ вановт ало. Алевтина Михайловна чачсь-кассь Киржемансо, 1987 иестэ прядызе Ицялонь педучилищанть ды сась важодеме тиринь велев вишка классонь тонавтыцякс. Эзь марявояк, кода ливтясть иетне ды весемесь полавтовсь эрямосонть.
– Минек од шкасто тонавтыцясь ульнесь покш авторитетэкс, аволь ансяк минь виздилинек-пелилинек эйстэст, тетянок-аванокак. Сынь вейсэ, вейке сюлмосо, тонавтсть-кастсть эйкакшост ды тонавтницяст, ульнесь покш чарькодема ютксост. Ней жо тетятне-аватне превейгадсть, эйкакштнеяк ансяк эйдень кужосто лисить, уш содасызь эсь праваст. Истя аламонь-аламонь еми чарькодемась, вейсэнь лувось. Мон свал мерян эсень эйкакшон туртов, лиятнененьгак – зярдояк илядо корта эйденк икеле беряньстэ учительде, те коесь паро видьметь а канды киненьгак.
Наталья Ивановна Штырова аволь ансяк кассь тонавтыцянь семиясо, сонськак малав 50 иеде теде икеле кочкизе вишка классонь тонавтыцянь профессиянть. Теке марто Наталья Ивановна ледстясынзе весень, кинь тонавтсь неть ламо иетнень перть. Сон кармась превей ды чарькодиця наставникекс од учительницатнень туртовгак, ютксост Тамара Николаевна Пауловаяк, конась ней важоди аволь ансяк вишка классонь эйкакштнень марто, истя жо вети физкультурань ды ОБЗР-нь урокт.
– Покш сюкпря евтан весе лездыцян туртов, истя жо А.М. Пародькинанень, В.Я. Филиппованень. Мон сынь Киржеманов Покш Березникень эрзянь Шугурова велестэ, кода кортыть, пиже эйкакшокс, ды тесэ монь сеске саимизь эсест селмост алов. Киржеманс лисинь мирденень ды 40 иетнень перть те велесь теевсь тень тиринсекс. Монь ней тесэ весе содасамизь. Пек мелявттано кисэнзэ, школанть кисэ. Берянь, арась медсестранок, а сон неень шкане сехте эрявикс ломань тесэ, – корты Т.Н. Паулова.
Тамара Николаевна муизе Киржемансто аволь ансяк поланзо – сехте паро ялганзояк. Те – Наталья Сергеевна Курганова – биологось ды химикесь, истя жо воспитательной роботань коряс директоронь полавтыцясь. Сынь вейсэ ламо иеть, кода роботасо, истя оймсемстэяк, вейсэ морсить «Эрзянка» раськень ансамблясонть, репертуарсост эрзянь ды рузонь морот. Наталья Сергеевна сеть ломантнень эйстэ, конатне эсь кедьсэст ютазь пингень 70-це иетнестэ строясть те школанть, лездасть сонзэ витнемс-петнемс. Тиринь енксонтень вечкемасо сон кастынзе эйкакшонзояк. Наталья тейтерезэ ней Алексеевкань велень администрациянь прявт, семиянек сынь эрить Киржемансо ды важодить сонзэ лезэс.
Киржеман велень школась кастсь-нолдась ламо содавикс ломанть. Ютксост: МАССР-нь Министрань Советэнь председателесь А.А. Паулов, композиторось, профессорось Н.И. Бояркин, физико-математической наукань кандидатось Д.И. Бояркин, «Лато» АО-нь икелень прявтось А.И. Чингалев ды лият.
Теке жо чистэнть Киржеманонь средней школасо профориентационной вастовома ютавтсь Мордовиянь Журналистэнь союзонь прявтось, Н.П. Огарев лемсэ МГУ-нь журналистикань кафедрань тевтнень топавтыцясь Людмила Резяпкина. Сон вастовсь 9-це ды 11-це классо тонавтницятнень марто, евтнесь журналистэнь профессиядонть. «Эрзянь правда» газетань прявт редакторось Марина Девятова содавтынзе эйкакштнень эрзянь кельсэ нолдавиця газетанть марто, евтнесь сонзэ историядонзо ды неень шкане важодемадонзо.
Марина Девятова