Дубёнкань райононь Орданьбуесэ церьковась панжозель 1864 иестэ. Комсь иень ютазь сонзэ юрсо кармась важодеме церковно-приходской школась. Тосо васенце тонавтыцякс ульнесь Евлампия Григоровская. Владимир ялаксозо служась священникекс. Церькованть яжизь, 1929 иестэ тарказонзо панжсть ловномань кудо (изба-читальня). Школась ульнесь одноклассной, мейле ваксозонзо тейсть пристрой, теевсь двухклассноекс. Ламо шка ютась сеть иетнеде мейле.
Течи Орданьбуень школась эри, ды минь пачколинек тов инжекс, теевинек содавиксэкс паро тонавтыцятнень марто, кить кастыть Россиянь алкуксонь геройть. Мартонок якась МР-нь Журналистэнь союзонь прявтось Людмила Резяпкинаяк.
Малав ие школань прявтокс важоди Алёна Владимировна Еряшева. Сон теке велень. Тонавтнесь М. Е. Евсевьев лемсэ МГПИ-нь филологиянь факультетсэ. Кемготово иеть важодсь Орданьбуень администрациясо. Ней эсь тевензэ топавты школасо, косо истя жо тевтнеде ламо.
– Минек школасо ведьгемень ниле эйкакшт. Весе эсенек велень. Коллективсэнть кемготово тонавтыцят. Нилетнень ули квалификационной высшей категорияст. Ули весе эрявикс оборудованиясь. Тонавтыцятнень икеле ноутбукт, улить мультимедийной проекторт. Улить столовоенек, спортзалонок; актовой залонок ды музеень нупаленек – Социальной центрасо, конась ашти кинь трокс. Госсобраниянь депутатось А. И. Поздняков лездась тенек, рамась спортинвентарь, сокст, тедеде казсь футболсо налксицятненень форма. М. Н. Подмарёв депутатось лездась теемс Россиянь Героентень Давид Малыйкиннэнь вадря стенд, сон ладязь школанть куншкасо, неявикс таркасо, – ёвтни Алёна Еряшева.
Начальной классо тонавтыть Е. А. Мартьянова (сон учителень династиясто), ламо стажост Е. М. Симдянкинань ды Т. М. Сухановань, парсте тевензэ теи од специалистэсь Т. А. Лизунова. Школань прявтось анок шнамс ды ёвтнемс эрьвадонть, кие важоди эйкакштнень марто.
Ольга Владиславовна Савельева вети эрзянь ды рузонь кельтнень ды литература. Ней важоди 5-це, 8-це, 10-це класстнэнь марто. Чачсь сон Поводелесэ, школанть прядомадо мейле тонавтнемань таркакс кочкизе М. Е. Евсевьев лемсэ МГПИ-нь филологиянь факультетэнть.
– Вузсо группанок вадряль, виевель, весе вечксть тонавтнеманть. Кураторонок ульнесь А. Г. Борисов профессорось, истя жо тонавтсть Д. Т. Надькин, А. М. Каторова. Те шкас ледстнян тонавтыцятнень. Сынь тенек макссть вадря содамочить, кастсть эйстэнек алкуксонь тонавтыцят. Группастонок ламот мольсть важодеме школав ды нейгак тонавтыть республикань школатнесэ. Мельсэнь ашти васенце уроком, косо лангозон пштистэ вансть комсь тонавтницят. Те кармась сехте вечкевикс классом, сынь кунсолость, явсть покш мель тонавтнемантень, вейкест-вейкест ютксо ульнесь ялгаксчи, вансть тонавтыцятнень мелест. Тешкстаса, ютксост тонавтнесь школань прявтонок А. В. Еряшеваяк, – корты О.В. Савельева.
Ней сонзэ тонавтницятнень ютксо ули Россиянь Герой. Те – Давид Малыйкин, конадонть весе масторонок кармась содамо 2022 иень декабрясто, зярдо Россиянь Президентэсь Владимир Путин казизе Россиянь Героень лемсэ. Весе Орданьбуенть туртов те ульнесь пародояк паро кулякс! Давид тонавтнесь Ольга Владиславовнань классо, тонавтыцясь пек лембестэ корты цёрадонть.
– Давид уш школасо тонавтнемстэ бажась улемс военноекс. Сон эзь менстя физкультурань урокт, явсь мель спортонь весе пелькстамотненень. Классост мон ветинь, малав весе цёракайть, кунсолыть ды а кунсолыть. Давид – чевте седей, лиянень паронь арсиця, ялганзо кисэ аштиця, видечинь вечкиця. Кода-бути весть совинь классонтень, мекс-бути нусманя ёжосо. Сон сась ваксозон ды кевкстни: «Мезе теевсь? Кие покордыдизь? Ёвтадо, кие?». Армиядо мейле кадовсь служамо контрактонь коряс. Кода казизе Президентэсь – истя кецинь, а ёвтавияк, теке эсень эйкакшом кисэ! Ламо ломанть тень гайневтнить, весе текеде кортыть. А кемевияк тенек, минек Давид – Герой. Аламос ойминь ды теке жо чистэнть гайневтинь тензэ. Эзинь арсеяк, сайсы телефононть, Кремлястояк эштё эзь лисекшне. Валонгак арасельть, кода кецнинь.
Мейле велестэ сыргинек вастомонзо поездэв, кода сон сакшнось Мордовияв. Те ульнесь казнекс, сон эзь сода. Поездэсь сась веть 12 чассто. Кутмордыя, сельведень чудить. Кецян кисэнзэ, аштян каштанчисэ. Сон эрьва ие отпусконь шкасто сакшны тенек школав. Свал вастневи мартон, кортатано, кевкстнесамам, кода ды мезе. Меринь тензэ, кадык Пазось максы шумбрачи, вийть, шумбрасто-парсте велявты кудов. Истят ломантнень лангсо, кода Давид, ашти Россияськак. Сон алкуксонь патриот, – корты Ольга Владиславовна.
Татьяна Маторкина