Неть читнестэ Н. П. Огарев лемсэ МГУ-нь филологической факультетэнь журналистикань кафедрань важодицятне вейсэ Мордовия Республикань Журналистэнь вейсэндявксонть марто ютавтсть вастовома республикань СМИ-тнень прявттнэнь марто. Истя жо тов тердевсть «Журналистика» специальностень коряс те вузонь тонавтницят.
Кортамось мольсь минек республикань массовой информациянь средстватнень медиапространствасо улемадост, неень шкань стакачитнень марто вастовомадост, кадратнень анокстамодо, «Журналистика» специальностень коряс образовательной программатнень кемекстамодо, неть кевкстематнес одонть совавтомадо ды истя седе тов. Башка мель явовсь районной прессантень, раськень кельсэ лисниця газетатненень ды журналтнэнень.
Вастовоманть панжизе ды ветясь МР-нь Журналистэнь вейсэндявксонь прявтось Людмила Резяпкина. Сонзэ ушодовомсто Людмила Николаевна весень тердинзе лезэвстэ ютавтомс шканть, эдь неень шкань студенттнэ а свал вастневить редакциятнесэ ламо иень перть важодицятнень марто. Сон сеске яволявтсь од ломантнень ютксо пелькстамо ды эрьванть кармавтсь СМИ-нь прявттнэнь ютксто муемс эстензэ лездыця. Конкурсось ютавтови истят номинациятнень коряс, кода сехте паро публикация, радиопроект, фотография, видеоролик ды истя седе тов. Изницятненень алтась дипломт, казнеть ды сертификатт сы шкань важодема таркань коряс.
Н. П. Огарев лемсэ МГУ-нь филологической факультетэнь журналистикань кафедрань прявтось Ксения Дементьева икельце валсонзо тешкстызе те вастовоманть эрявиксчинзэ образованиянь системанть полавтоманзо пингстэ. Ксения Владимировна евтызе мелензэ сы шкань образовательной программатнень коряс, конатнень сынь арсить анокстамс маласо шкастонть. Васняяк бажить сынст неемс конкурентоспособнойкс, штобу сеть дисциплинатне, конатнень тонавтнить студенттнэ, улевельть пек эрявиксэкс сы шкань тевсэст.
Кадратнень анокстамодо, образованиянь системанть полавтомадо, раськень келень содыця журналисттнэнь тонавтомадо теманть поладызе филологической факультетэнь деканось Иван Рябов. Иван Николаевич пачтясь аволь ансяк образованиясо учовиця полавтоматнеде, истя жо невтсь кить-янт, кода витемс лисезь стакачитнень ды мезе лангсо арсема раськень кельсэ лисниця изданиятнень прявт редактортнэнень.
Седе, кода течи аштить тевтне вере ледстязь кевкстематнень коряс «Мокша» журналсо, «Эрзянь правда» газетасо, пуромозтненень евтнесть неть изданиятнесэ важодицятне.
Райгазетатнень мелявкстнэде ды изнявкстнэде пачтясть «Торбеевские новости» ды «Инсарский вестник» изданиятнесэ роботыцятне.
«Кругловой столенть» шкасто ламо превс путомат макссь экономической наукань кандидатось, доцентэсь, МР-нь Торгово-промышленной палатасо властень органтнэнь марто важодемань ды тонавтомань департаментэнь прявтось Юлия Шукшина.
Седе тов вастовомасонть кортасть студенттнэ, сы шкань журналисттнэ. Ламот юткстост евтызь мелест неень шкань СМИ-тнень коряс, кодат улить эйсэст асатыкст ды мезе бу теевельть сынст витемга. Теке жо шкастонть од ломантне анокт совавтомс эрямос од арсемат массовой информациянь средстватнень седе ловновицякс ды содавиксэкс теемасонть. Кемтяно, истя улияк!
Валентина Юдина