Отяжелень райононь Сабанцелень школанть историязо ушодови 1869 иестэ, зярдо веленть содавтызе Равчирень содавикс просветителесь И.Н. Ульянов (В.И. Ленинэнь тетязо). Сонзэ мелензэ ды типовой проектэнзэ коряс, конань Ульянов теекшнизе 1888 иестэ, панжозельгак школась. Теде икеле жо велесэнть ульнесь церковно-приходской школа, конась важодсь церьковань караулкасонть. Мейле теезель начальной школа. Неень шкань школась жо панжозель 1973 иестэ. Ютасть зярыя кементь иеть, полавтовсть ламо прявтт, ансяк васень таркасо кадовсь вейкесь – эйкакштнень тонавтомась ды вадря содамочитнень максомась.
2010 иестэ саезь неень шкас Отяжелень райононь юстициянь майоронть Д.А. Катайкинэнь лемсэ «Аловская среднея школа» МБОУ-нь Сабанцелень средней школань обособленной структурной подразделениянь прявтокс важоди Анатолий Васильевич Тикшайкин.
Аволь умок минь ульнинек Сабанцелень школасо инжекс. Кортынек течинь эрямодонть, талновтыця мелявкстнэде.
Кода евтнесь Анатолий Васильевич, течинь чине Сабанцелень школасо тонавтницятнеде весемезэ 22 эйкакшт, вейксэтне якить начальной классос. 9-це, 10-це ды 11-це класст тедеде арасть. Тонавтыцятнеде вейсэ прявтонть марто лововить 14 ломанть. Весе важодить уш ламо иень перть. Опытэст покш, эйкакштнень марто муить кель-вал. Неть: информатикань ды физикань тонавтыцясь Михаил Андреевич ды математикань тонавтыцясь Валентина Михайловна Мироновтне, биологиянь тонавтыцясь Татьяна Михайловна Логинова, начальной классонь тонавтыцятне Елена Петровна Учеваткина ды Галина Михайловна Суняйкина, воспитаниянь коряс прявтонь советникесь ды эйкакшонь общественной вейсэндявкстнэнь марто важодицясь Надежда Васильевна Бояркина, англань келень тонавтыцясь Ольга Васильевна Тавторкина, эрзянь келень ды литературань тонавтыцясь Нина Николаевна Учеваткина, географиянь тонавтыцясь Светлана Ивановна Батяркина, рузонь келень ды литературань тонавтыцясь Наталья Николаевна Батяркина, физической культурань ветицясь Ефим Ефимович Палькин, историянь тонавтыцясь Надежда Васильевна Борисова, алгебрань ды геометриянь тонавтыцясь Раиса Александровна Бухаркина. Школасо ваньксчинть кирдить Антонина Федоровна Сайгушкина, Татьяна Михайловна Кузнецова ды Татьяна Михайловна Палькина, тантей ярсамопельть пидить-анокстыть Надежда Дмитриевна Сайгушкина, Татьяна Михайловна Суняйкина. Водителекс важоди Александр Васильевич Сайгушкин.
Коллективсэнть важодить алкуксонь тонавтыцят. Самай тень коряс Сабанцелень школась нолдась ламо медалистт, прядыцятне тонавтнесть ды тонавтнить аволь ансяк Мордовиянь, Россиянь ламот вузтнэсэ ды важодить эрьва кодамо енкссо.
– Коллективесь минек пек вадря, весе опыт мартот, важодить ламо иеть. Кадратнень коряс кодаткак мелявкст арасть, – евтни Анатолий Васильевич. – Тонавтыцятнень ютксо улить Мордовия Республикань образованиянь заслуженной роботникть, зярыя истят, кить тешкстазь Российской Федерациянь Просвещениянь министерствань «Отличник просвещения» знаксо, высшей категориянь тонавтыцят. Минек тесэ роботыть эсь тевень содыця алкуксонь специалистт, конатне профессиянтень максызь эрямост.
Эряви евтамс, те иенть самс велесэнть эште роботась эйдень кужояк. Ды нейгак вишка эйкакштнеде улить, ансяк кужонть пекстызь. Те мелявксось пек талновты школань важодицятненьгак, эдь сеедьстэ маряви велетнесэ малокомплектной школатнень пекстамодо.
– Анатолий Васильевич, ульнесть кортамот те иестэ школанть пекстамодо. Кода аштить тевтне?
– Мелявксось ули нейгак. Вейке иес эште школанть кадызь, секс што тетятне-аватне пшкадекшнесть республикань Правительствав ды Госсобраниянь депутаттнэнень. Зярс важодеманть поладтано. Кода кармить аштеме тевтне сы иестэ, а содатано. Бути пекстасызь, минек эйкакштнень арсить ютавтомс шабра Аловелень школав, косо маласо шкастонть кармить ютавтозь педе-пес витнемань тевть. Чарькодеви, эйкакштнеде тонавтнить аволь ламо, неень шкане минек 22 тонавтницят, ансяк течи велень ламот школатнесэ истя. Бути те иестэ васенце классос састь кавто тонавтницят, сы иестэ учовить колмо. Седе вишка эйкакшткак Сабанцелесэ эште улить.
Школань пекстамось – те покш мелявкс тонавтыцятненьгак, эйкакштненьгак, тетятнень-аватнень ды целанек веленть туртовгак. Эдь зярс роботы школа, велеськак эри ды сонзэ ули сы шказо.
Сабанцелесэ эште улить эйкакшт, улить од ломанть, конатнень туртов эсест велесэ школанть важодемазо сехте эрявикс тев. Ды школаськак тесэ а берянь. Вадрясто тонавтнеманть туртов ули весемесь. Теезь од оборудования марто кабинетт, эйкакштнень туртов школанть икеле 2023 иестэ панжозель спортонь неень шкань площадка, косо ули весемесь спортонь занятиятнень туртов – вадря тренажерт, волейболсо, футболсо налксемань тарка, ули хоккеень корт. Тезэнь кизэнек-теленек пурнавкшныть пек ламо эйкакшт.
Истя жо школасонть улить зярыя музейть. Неть – краеведениянь музеесь, косо ванстовить веленть икелень шкань эрямосто курмот-кармот. Ине Отечественной войнань участникентень, Курской битвань шкасто танконь васенце таранонь ушодыцянтень И. А. Гусевнень алтазь боевой славань музеесь. Ули школань историянтень алтазь педагогической музей. Школасонть важоди «Гренада» поисковой группась.
Школанть вадря важодеманть туртов, тонавтницятнень ды тонавтыцятнень туртов эрявикс условиятнень теемга ламо иень перть пек лездась «Сабанчеевское» ООО-нь икелень прявтось Дмитрий Николаевич Игушкин. Ней те тевенть полады течинь руководителесь Александр Ефимович Палькин. Истямо лезкстэменть эдь ковгак.
Весе эрямозо сюлмавозь школасо важодеманть марто
Сонсь Анатолий Васильевич школасо важодемантень макссь 47 иеть. Чачсь теске – Отяжелень райононь Сабанцеле велесэ. Тетязо, Василий Яковлевич, весе пингензэ перть ульнесь велень советэнь председателекс. Школанть прядомадо мейле Анатолий Тикшайкин тонавтнесь Н.П. Огарев лемсэ МГУ-нь химико-биологической факультетсэ. Тонавтнемань иетнень перть ульнесь университетэнь комсомолонь комитетсэ, косо отвечась организационной роботанть кис. Вузонть прядызе 1978 иестэ ды мейле направлениянь коряс кучизь Ташто Шайговань райононь Новая Александровка велев.
– Велесэнть а киланго, а мезе арасель. Монь сеске аравтымизь воспитательной роботань коряс завучекс. Кавто иеть те таркасонть роботынь, ладимизь прявт завучекс. Школань прявтось арсесь кадомс монь эсензэ таркас, мон жо эзинь кадово ды вете иень перть роботамодо мейле туинь, – евтни Анатолий Васильевич. – Сестэ эдь системась ульнесь аламодо лия, вете иеть вузсо тонавтнить, эряви истя жо вете иеть специальностень коряс роботамс. Ды те ульнесь виде, нейгак бу те лувонть велявтомс, специалисттнэнь коряс кодаткак мелявкст авольть уле.
1983 иестэ Анатолий Тикшайкин велявтсь тиринь Отяжелень районов. Се шкастонть тосо важодсть 36 школат (ней жо кадовсть весемезэ 6 школат). Сон кармась роботамо Киржеманы велень средней школасо, косо сеске аравтызь школань прявтокс. Тосо важодемань шкасто тердекшнизь партиянь райкомов инструкторокскак, ансяк Анатолий Васильевич эзь моле, школасо важодемась ульнесь тензэ седе мелень коряс.
Зярдо жо Анна Семеновна авазо кадовсь ськамонзо, Анатолий Васильевич велявтсь тиринь велев ды кармась роботамо Сабанцелень школасо. Те ульнесь 2010 иень февралень 15-це чистэ. Ней уш малав 16 иеть ливтясть.
А.В. Тикшайкин казезь ламо эрьва кодамо наградасо. Сон тешкстазь «Отличник просвещения Российской Федерации» знаксо.
И.Н. Ульяновонь мелензэ коряс 1901 иестэ Сабанцелесэ панжовсь начальной школа. 1917 иенть самс сонзэ прявтсо ульнесь Ф.С. Бутузов. Советской властень теевемань иетнестэ, 1917 иестэнть саезь, прявтокс ульнесь Д.В. Желтов. Седе тов начальной школанть юрсо панжозель крестьянской од ломанень школа, прявтокс аравтозель ероков комсомолецэсь П.И. Козлов. Ине Отечественной войнань шкасто прявтокс важодсть Р.А. Табаев, В.Г. Логинов, Е.Г. Годяева.
1954-1955 иетнестэ школась нолдась од церат ды тейтерть, конатненень аттестатось максовсь эсест велесэ. Сестэ прявтокс ульнесь Ф.В. Хапугин.
1973 иестэ, зярдо теезель неень шкань кавто этажсо зданиясь, ушодовсь школанть од историязо. Те шкастонть, 1971–1976 иетнестэ, прявтокс ульнесь М.И. Палькин, 1977-1978 иетнестэ – В.П. Бухаркин, 1978–1989 иетнестэ – М.И. Данилова, 1989–1999 иетнестэ – М.А. Миронов, 1999–2010 иетнестэ – Л.М. Игушкина.
Сабанцелень школань тонавтыцятнеде евтнеманок поладсынек сыця номертнэсэ.
Юлия Еремина
Фототне Егор Горинэнь.