Те иень сексестэнть прась уцяска содавтомс Нижегородской областень Покш Болдинань муниципальной округонь Пикшня кезэрень эрзянь веленть. Те мазый таркадонть аволь весть тенек евтнесь Мордовия Республикань заслуженной писателесь, Россиянь Писателень вейсэндявксонь членэсь Павел Кириллович Любаев. Сон Ине Отечественной войнань участникель, фронтсто самодо мейле, 1946 иестэ, трудовой кинзэ ушодызе «Эрзянь коммуна» ды «Ленинэнь киява» лемтнень ало тиринь газетасо.
Павел Кириллович ульнесь малавикс ялгакс «Эрзянь правдань» ламот важодицятнень туртов, кой-кить юткстонок те шкас ледстнить сонзэ марто вастовоматнень, од стихотворениянзо кунсоломатнень. Сон вечкилизе чачома тарканзо, аволь весть сакшнось тиринь велень тонавтницятнень марто вастовомо. Вана миньгак Пикшнясо улемстэ васняяк сыргинек школасо тонавтыцятнень ды тонавтницятнень содавтомо.
Историясь
Пикшня велень школанть пек сюпав историязо. Ушодкс сон саи 1890 иестэ, зярдо церькованть юрсо панжозель церковно-приходской школась. Законоучителекс (истя сестэ лемдевсь прявтось) кармась Алексей Раевский священникесь, тонавтыцякс – Алексей Преображенский диаконось. Шкань ютазь эйкакштнень явизь 4 класска ды сайсть важодеме седе ламо тонавтыцят.
1918 иестэ церковно-приходской школась теезель начальноекс, косо тонавтнесть 4-це классос. Се шкане ламот ульнесть сермас асодыцят, сень ловозь, 1932 иестэ панжозель Пикшня велень сисем классонь школась, косо ушодсть тонавтнеме 600-то ламо од ломанть.
Кавксо классонь школань кирьпецьстэ теезь од зданиянть стявтызь 1971 иестэ ташто школанть малас. Васенце прявтокс ульнесь Василий Ефремович Туршатов. Седе тов сонзэ тевенть поладызе Александр Серафимович Шайтанов. Сонзэ пингстэ теезель покш важодема школань материально-технической базанть одкстомтомга: корт, рамазель эрьва кодамо спортонь инвентарь, панжозельть гимнастикань, футболонь, волейболонь ды ламо лия кружокт.
1979–2013 иетнестэ школань прявтокс, седе тов (2013–2021) филиалонь заведующеекс, ульнесь Владимир Александрович Ичков.
Ули кинь эйстэ саемс пример
Школань зданиянть икеле вастымизь история предметэнь тонавтыцясь, школань музеень прявтось Евгений Николаевич Асманкин. Васенце этажсо уликс вейке стендэнть вакска ютамсто сон теимизь содавиксэкс сеть выпускниктнень марто, кинь лемест совасть аволь ансяк те енксонть, истя жо масторонь историяс. Неть: генерал-лейтенантось Григорий Федорович Туршатов, физико-математической наукань докторось Александр Кузьмич Батькин, Мордовия Республикань заслуженной писателесь, Россиянь Писателень вейсэндявксос совицясь Павел Кириллович Любаев, Н.И. Лобачевский лемсэ ННГУ-нь юридической факультетэнь деканось, доцентэсь, юридической наукань кандидатось Виктор Иванович Цыганов, физико-математической наукань кандидатось Евгений Николаевич Богданов, медицинской наукань докторось, профессорось Петр Иванович Камбаратов. Неть ды ламо лия содавикс ломантне васень содамочист саизь Пикшня велень школастонть ды покш лезэ кандсть кода эсь областенть, истя жо масторонь эрицятнень туртов. Сынст кувалма покш каштанчисэ аштить велень эрицятне, ули кинь эйстэ саемс пример неень шкане тосо тонавтницятненень. Виде, эште улить ламо содавикс ломанть, кить эрьвась эсь шкастонзо тонавтнесь Пикшня велень школасонть. Совасть историяс истят тонавтыцятнень лемест, кода Иван Николаевич, Мария Петровна ды Алексей Николаевич Туршатовтне, Наталья Андреевна Бахтина, Михаил Захарович ды Татьяна Федоровна Камбаратовтне, Татьяна Васильевна ды Елена Степановна Святкинатне, Надежда Федоровна Сеняева, Галина Ивановна Табункина ды ламо лиятне.
Тонавтыцятнень ютксо улить правительственной покш казнесэ тешкстазеть. Невтемакс, школань икелень прявттнэнень – Иван Николаевич Туршатовнень максозь «За трудовое отличие» медалесь, Анна Макаровна Сизованень – «За доблестный труд» медалесь. Кавксо классонь школань (икеле истя сон лемдевсь) тонавтыцясь Надежда Федоровна Сеняева казезь «Отличник народного образования» значоксо. Раськень культуранть ванстоманзо кисэ Мордовиянь Прявтось башка казнесэ тешкстызе тонавтыцянть Нина Федоровна Цыгановань важодеманзо.
Тоско жо, васенце этажсо, вастовинек школань сеть важодицятнень марто, кить эрьва чистэ, эсь тевест топавтомадо мейле, муить шка кекшемань алтымань кодамонтень. Эдь специальной военной операциянть ушодовомадо мейле ламот те школань прядыцятнень ютксто, конат неень шкане эрить масторонь келес, сыргасть минек сэтьмечинть ванстомо. Неень шкасто тосо важодицятнень цераст. Ледстясынек, истямо жо тевенть ветить Пикшнянь Культурань кудосояк.
Школанть прявтсо – ламо эйкакшонь триця ава
Пикшня велень школасо улемстэ теевинь содавиксэкс прявтонть, ламо эйкакшонь триця аванть Анна Владимировна Щербакова марто. Сонзэ чачома таркась – теке енксонь Починка велесь. Ризоватовань школанть парсте прядомадо мейле тонавтнесь А.П. Гайдар лемсэ Арзамасонь государственной пединститутсо. Те вузсонть тонавтнемстэ теевсь содавиксэкс Николай Щербаков од церанть марто. Эште студентэкс улемстэ одтнэ урьвакстсть-венчасть. Сынст эрямосо ламо стакачить ульнесть. Анна Владимировнанень тонавтнеманзо савсь прядомс заочна, 2005 иестэ чачсь васенце эйкакшост – Любовь тейтерест. Сон ней тонавтни Н.П. Огарев лемсэ МГУ-нь географической факультетсэ. Николай Щербаковонь тонавтнеманзо прядомадо мейле, одтнэ кармасть эрямо Од Слобода велесэнть. Аволь васоло эйстэст эрясть Николаень тетязо-авазо, кить ков виест сатотсть лездасть од семиянтень. Сынськак Николай ды Анна озавтсть покш садпире, кастсть ламо эмежть.
Шкань ютазь сынст чачсть эште колмо эйкакшост, аволь весть савсь полавтомс эрямо таркаст. Вейке шкасто Николай Васильевич ульнесь Аносовань школань прявтокс, теке шкасто биология ды география предметтнэнь тонавтыцякс.
Эрямост полавтовсь паро енов, кода сынь састь Пикшня велев. Од специалистэнь программанть коряс сыненст путсть кудо ды макссть автомобиль. Кудазорось поладызе школасо важодеманзо, Анна Владимировнань ладизь Пикшня велень эйкакшонь кужонь прявтокс. 2021 иестэ саезь сон «Б-Болдинская средняя школа им. А.С.Пушкина» МБОУ-нь филиалонь прявт.
Омбоце эйкакшост – Андрей – Большеболдинской велень хозяйствань техникумонь студент, Анастасия тейтерест тонавтни Пикшня велень школасо вейксэце классо, Надежда – нилеце, Иван церынест – колмоце классот.
Музеенть сюпалгавтыть велень эрицятне
Школань историянь музеенть прявтсо тевензэ парсте содыця тонавтыцясь Евгений Николаевич Асманов. Сон вети история предметэнь уроктнень ды топавты музеень прявтонь тевенть. Евгений Николаевич ютавтсь тенек экскурсия тосо таштазь ули-паронть коряс. Ловт, сон содасы тов кандозь кезэрень эрьва муевксэнть, кой-кона экспонаттнэ кандовить пек умонь шкатненень, сынст тозонь пачтизь те велень эрицятне: тарвазт, пелюмат, оень пивтемпарть, коцтонь кодамонь станок ды ламо лия ули-паро, конатнень тевс нолдасть минек покштятне-бабатне.
Тосо келейстэ невтеви школанть историязо, сонзэ неень шкань изнявксонзо. Кода пачтясь тенек Евгений Николаевич, музеень сюпавчинть ванкшномо сеедьстэ тенст сакшныть аволь ансяк Нижегородской областень ды шабра Мордовия Республикасто инжеть, истя жо Россиянь лия регионтнэстэяк. Эдь кезэрень ули-парось аволь эрьва таркасо ванстовсь.
Пикшня велень эрицятне теизь весементь, штобу вейке таркас пурнамс покштятнень-бабатнень ули-паронть ды теньсэ сюпалгавтомс музеенть, косо пингеде-пингес кармить ванстовомо сынст раськетнень чуросто вастневиця экспонаттнэ.
Валентина Юдина