Неть читнестэ Отяжелень райононь Сабанцелень школасо ютавтовсь эрявикс ды лезэв вастовома. Эйкакштненень ды тонавтыцятненень инжекс сакшнось «КвадроЭКОпатруль» эколого-волонтерской проектэнь арсицясь ды ветицясь Надежда Бояркина, конась истя жо, кода эште вейке инжесь – Анна Пронина, ловови «Добрые крышечки» эколого-благотворительной волонтерской проектэнь кураторокс. Самай те проектсэнть невтизьгак эсь пряст Сабанцелень школань тонавтницятне.
– Шумбрачи, вечкевикс ялгат! Евтан лембе поздоровт тонавтнемань од иенть ушодовоманзо кувалма. Арсян тенк, штобу те иесь ютаволь шождасто, кенярксовсто, пурнадо седе ламо содамочить, – мерсь Надежда Бояркина вастовоманть панжомсто. – Тынк школанть минь содавтынек уш аволь васенцеде. Ней вана «Добрые крышечки» эколого-благотворительной волонтерской проектэнть лувсо. Монь кедьсэ тынь нетядо цецине, конась ловови те проектэнть тешксэкс. Кодамо проектэнть прявт лувось, арсян, тынь весе уш содатадо. Те – пластикень крышкинетнень пурнамось, конатне седе тов максовить переработкас, кисэст саезь ярмактне жо максовить «Волонтеры в помощь детям-сиротам» благотворительной фондонтень. Седе тов неть ярмактне явовить лавшо шумбрачи марто эйкакштненень реабилитациянь техниканть рамамс.
Кода мерсь Надежда Бояркина, те акциясонть весе важодить ансяк эсь мелень коряс, киньгак апак кармавто. Ды неть тейтертнеяк вейсэ лия волонтертнэнь марто важодить те енкссонть стякодо, ансяк эсь мелень коряс.
– Сеедьстэ мон марян истят кевкстемат: «Минь пурнатано крышкинетнень, а мезе миненек тень кисэ карми?» Тень кисэ а карми мезеяк. Крышкинетнень пурназь, тынь тейтядо покш путовкс аволь ансяк пертьпельксэнть ванстомантень, эдь весе неть крышкинетне – те шукш, теке марто, сынст пурназь, минь макстано тенст омбоце эрямо. Лия енксось, крышкиненть вана те контейнерэнтень путозь, тынь лездатадо лавшо шумбрачи марто эйкакштненень. Паряк, арсетядо, тынк вийсэ пурназь крышкинетне – те пек аламо. Ансяк евтаса, акциясь – весероссиянь ды сонзэ участникекс кармасть пек ламо ошт, поселкат, велеть. Ды аламонь-аламонь весе минь тынк марто тейтяно покш лезэ, – мерсь Надежда Бояркина. – Пшкадян весенень. Бути тынк кудосо таштавсть пластикень крышкат симемапельтнень, ловсонь ды лия упаковкатнень эйстэ, илядо ертне сынст! Кандодо миненек. Эрьва крышкинесь – те лезкс лавшо шумбрачи марто эйкакштненень. Ансяк вейсэ тынк марто минь тейсынек масторонть седе ваньксэкс, кинь-бути эрямонть – куш аламодо седе вадрякс! Вейсэндяводо «Добрые крышечки» проектэнтень. А стувтнетяно амаштовикс батарейкатнедеяк. Сынст истя жо пурнатано «Батарейки, сдавайтесь» акциянть лувсо. Минек лозунгось – «Сдай батарейку – спаси ежика!».
Мероприятиянть лувсо волонтертнэ Надежда Бояркина ды Анна Пронина «Волонтеры в помощь детям-сиротам» благотворительной фондонь прявтонть пельде казсть Сюкпрянь сермат проектэнь сехте ероков участниктненень. Казевсть аволь ансяк тонавтницятне, целанек сынст кудораськетне, эдь истямо тевсэнть ули эрьванть путовксозо. Казезтнень ютксо Бухаркинтнэнь, Молчановтнень, Сиськинтнэнь ды Максимовтнень семиятне.
– Арсян, тыненк инжекс сакшнынек аволь меельцеде. Крышкинетнень пурнамонть коряс тевенть тынь поладсынк. Паряк, маласо шкастонть сатано мастер-класс марто ды невтьсынек, кода явомс эрявикс крышкинетнень лиятнень эйстэ, кода видестэ пурнамс ды явшемс шукшонть, эдь неень шкасто пек ламонть мереви максомс переработкас. Те енксось лезды пертьпельксэнть ванстомасояк, – тешкстызь волонтертнэ.
«Добрые крышечки» – те Россиянь эколого-благотворительной волонтерской проект, конанть бажамозо: теемс минек масторонть седе ваньксэкс ды лездамс лавшо шумбрачи марто эйкакштненень. Проектэнть арсицятне-топавтыцятне – #ДОБРЫЕ_КРЫШЕЧКИ общественной вейсэндявксось ды «Волонтеры в помощь детям-сиротам» благотворительной фондось.
Проектэсь лезды семиясто саезь ОВЗ марто эйкакштненень инвалидной коляскатнень ды реабилитациянь лия техниканть рамамосо.
Юлия Еремина
Фототне Егор Горинэнь.