Саратовань областень Петровск ошонь 8-це № средней общеобразовательной школасо ютасть «Мартыновонь раськеютконь VII-це ловномат». Ловноматненень явсть мель малав 800 ломанть, кода минек масторсто, истя жо сонзэ томбальдеяк. Нама, ламо участникть ульнесть Саратовань областень эрьва кодамо районсто. Ловноматнень ютавтыцякс кармасть «Ассоциация учителей литературы и русского языка» весероссиянь вейсэндявксось, Петровской райононь образованиянь управлениясь ды лиятне.

Мартыновонь ловноматнесэ важодсть ламо мельстуиця секцият: «Дорогие мои земляки», «Защитники Отечества», «Летопись родного края», «Родная литература: жизнь и творчество писателей» ды седе тов. Литературань секциясонть ульнесь Татищевской райононь Октябрьский Городок школань 5-це классонь тонавтницясь Александра Пятаева. Сон евтнесь эрзянь поэттэнть Е. И. Пятаевде (Эмиль Пятай). Те – Сашань покштянзо леля. Емельян Иванович парсте содылинзе поэттнэнь А. К. Мартыновонь, И. П. Кривошеевень, мартост важодсь ды кирдсь ялгаксчи.

Е. И. Пятаев – Ине Отечественной войнань участник. Нолдась стихень зярыя пусмот. Сон важодсь «Эрзянь правда» газетасо ответственной секретарекс, МР-нь Писателень союзонь правлениянь секретарекс, «Сятко» журналонь редакторокс. Саша Пятаева казсь школантень эрзянь ды мокшонь поэттнэде книгат, ютксост улить А.К. Мартыновдояк.

Тейтерьканть исследовательской тевень ветицязо обществознаниянь тонавтыцясь А. И. Бирюкова чачсь-кассь Кулясова велесэ, косо чачсь поэтэсь Е.И. Пятаев, ней те Пензань областень Кузнецкой район. Кулясова велесэ эри Пятаевень племянницазо М. П. Стенькина, сон важоди библиотекарекс ды ютавты поэтэнть ледстнемга ламо кенярксчить.

Ловноматнесэ ульнесь  Саратовань «Шумбрат» Эрзянь ды мокшонь раськень-культурной центрань прявтось В. И. Кривошеева, секретаресь А. В. Твердохлебов. Самай сынь пачтизь те кулянть ды евтнесть, кода вадрясто ютасть неть вастовоматне.