МР-нь Правительстванть юрсо Гуманитарной наукань НИИ-сэ ютась эрзянь ды мокшонь антонимень валкстнэнь презентация, козонь сакшность сынст арсицятне-теицятне, нолдыцятне, рецензенттнэ, библиотекартне, журналисттнэ, преподавательтне.
Панжизе вастовоманть НИИГН-нь прявтось Галина Куршева. Сон казинзе валкстнэнь весе сыцятненень ды тешкстызе, од книгань лисемась сынст туртов те алкуксонь кенярксчи, ды секскак сась мель явшемс валкстнэнь сеть ломантненень, кинь туртов неть пурнавкстнэ пек эрявить важодемстэ.
Валкстнэ нолдазь МР-нь Цифровой развитиянь ды массовой коммуникациятнень министерстванть лезксэнзэ вельде. Эрзянь келень антонимень валксонть теицятне-нолдыцятне – Л.Гурьянова ды О. Цыплякова, мокшонь келень – А. Келина.
Седе тов валось максозель филологиянь наукань кандидатонтень, «Эрзянь келень антонимень валкс» книгань анокстыцянтень-теицянтень Ольга Цыплякованень.
– Течи минек туртов алкуксонь кенярксчи – тиринь кельтнесэ лиссть кавто од книгат. Эрзянь келень антонимень валкссонть максовить седе сеедьстэ вастневиця эрзянь литературань кельсэ смустень коряс карадо-каршо аравтозь валтнэ. Антонимень паратнень парсте чарькодемга ды смустень коряс явомга максовить художественной произведениятнестэ ды фольклоронь тексттнэстэ саевкст. Мокшонь келень антонимень валксонтень жо совасть 1350 ламо антонимть. Пусмонтень пурназь антонимтне, конатне нолдавить тевс литературной кельсэ. Весе материалось пурназь мокшэрзянь раськень устно-поэтической творчествань ды художественной произведениясто. Неть кавто валкстнэ алтавить вузсо ды школасо тонавтницятненень ды тонавтыцятненень, газетань ды журналонь редакциятнесэ важодицятненень, сетненень, кинь ули мелест содамс ды тонавтнемс эрзянь ды мокшонь кельтнень, кастомс культуранть, – кортась Ольга Цыплякова.
Теде башка, карминек содамо: НИИ-нь valviy.ru веб-ресурссонть путозь 6 валкст: эрзянь ды мокшонь келень орфоэпиянь, эрзянь ды мокшонь келень антонимень, эрзянь-рузонь ды мокшонь-рузонь валкстнэ.
Курок тов путовить рузонь-эрзянь ды рузонь-мокшонь валкстнэяк. Весе сынь панжадот тов совицятнень туртов.
Алена Артемьева