Неть читнестэ «Надежда» Республикань эйкакшонь ды од ломанень социальной приютсо ютавтовсь седеймарямонь кенярксчи, конась алтавсь Роштовадо мейлень валдо читненень. Кезэрень шкасто саезь ули истямо кой, зярдо покш ломантне содавтыть вишкинетнень. Нама, сехте покш мелесь явови эйдень кудотнесэ, интернаттнэсэ ды социальной приюттнэсэ эрицятненень.
Те иестэнть «Надежда» приютонь воспитанниктнень марто вастовомась ульнесь Саранск ошонь округонь Октябрьской райононь Сущинскоень куросо аштиця «Семейный МФЦ» куншкакуросонть.
Кенярксчись ушодовсь концертэнь программастонть, косо эйкакштне невтизь эсь ерокчист. Сынь киштсть-морасть, евтнесть кенярксчинтень алтазь стихотвореният.
Мелень витемань казнекс сыненст кармась «Виринея» фолк-группась. Сонзэ солисткась Татьяна Владимировна Федор церынензэ марто истя эрязасто седясть ды морасть, мик залс пурнавозтне эзть кирдеве ды вейсэ эйкакштнень марто лиссть киштеме.
Теевезь коень коряс, малав весе кенярксчитнестэ сыненст инжекс сакшныть эйкакштнень духовной наставникест: Саранскоень ды Мордовиянь епархиянь протоиереесь Виктор Хохлов ды Саранскоень духовной семинариянь васенце проректорось, протоиереесь Павел Горбунов. Неть инжетне эйкакштненень свал явшить аволь ансяк Роштовань казнеть, истя жо мазый налкшкеть сетненень, кить тешкстызь эли кармить тешкстамо чачома чист.
Те чистэнть эйкакштнень марто вастовомо ды сыненст поздоровонь евтамо истя жо сакшность Мордовия Республикасо эйкакштнень праваст коряс уполномоченноесь Наталья Юткина, «Российский фонд милосердия и здоровья» ОБОФ-нь МРО-нь правлениянь прявтось Людмила Никонова, «София» благотворительной фондонь руководителесь, «Надежда» социальной приютонь попечителень (общественной) советэнь прявтось Мария Лушенкова, вейсэндявксонтень совицятне Валентина Юдина ды Анжелика Уланова. Инжетнень ютксо ульнесь Октябрьской судонь отставкасо председателесь Татьяна Щеголькова.
Кенярксчистэнть весе эйкакштненень максозельть аволь ансяк казнеть, сехте эрявиксэсь – семиянь седейлембесь, конась витизе ежомарямост, кепедизе мелест. Эдь эрьвась юткстост кеми уцяскав вандынь чинтень. Кадык весе арсематне топавтовить!
Те кенярксчистэнть ламо лембе валт лездыцятненень ды сыненст сыця инжетненень евтась «Надежда» приютонь прявтось Татьяна Барашихина. Эдь се парось, конань ломантне теить эйкакштнень лезэс, свал ламоксть велявты сетненень, кить седеймарямост казить вишкинетненень.
Валентина Юдина
