Маень 31-це чистэ Дубёнкань райононь Кочкурвелесэ ютась «Эрзянь келенть тарказо тонавтницятнень эрямосост-касомасост» семинарось. Тей сакшность школань прявттнэ, эрзянь келень тонавтыцятне. Промкссонть ульнесь Дубёнкань райононь прявтось В. Н. Нефёдов. Истя жо пачколесть «Эрзянь правда» газетасо ды «Сятко» журналсо важодицятне.
Инжетнень туртов эйкакштне ды тонавтыцятне анокстасть мельстуиця культурной программа. Сынь морасть тиринь кельсэ морот, ловность стихть, невтсть сценка. Кой-кона произведениятнень сёрмадызь сынсь тонавтницятне.
Кочкурвелень средней школась кандтни СССР-нь народной тонавтыцянть С. И. Дергачёвонь лемензэ. Школань неень зданиясь стявтозель 1991 иестэ. Кода лия велетнесэяк, эйкакштне иеде иес аламолгадыть. Ней тесэ тонавтнить 54 эйкакшт. Те эсест Кочкурвелень ды усксить Ломаты татаронь, Неклюдова рузонь велетнестэ.
Школань прявтокс важоди Валентина Васильевна Шлабина. Сон чачсь теке велесэнть, прядызе Н. П. Огарёв лемсэ МГУ-нь филологиянь факультетэнть. 33 иеть топодсть, кода роботы школасо. Сонензэ неень шкасто савкшны чарькодемс юристэнь, экономистэнь тевтнес, ветямс административной ламо тевть.
Тонавтыцятнень покш мелявксост – эйкакштнень рузыямось. Кудосо тетятне-аватне кортыть мартост рузонь кельсэ. Школав сыть, сынь натой а чарькодить эрзякс. Тонавтыцятненень савкшны путомс ламо вийть. Неть стакачитне аволь ансяк те велесэнть, меельце шкасто истят тевть вастневить лия таркатнесэяк. Эйдетне эсь ютковаст кортыть ансяк рузокс. Мезе теемс, кода улемс, кода витемс тевенть? Самай теде мольсь кортамось семинарсонть.
– Кецнян, те вастовомась алтазь келень ванстомантень. Кочкурвелесэ чачсть учёнойтне Е. В. Скобелев, М. И. Наумкин – сынь нолдасть учебникть. Ламо иень перть школань прявтокс важодсь С. И. Дергачёв, конань валонзо те шкас мельсэнь: «Кортадо тиринь кельсэ, илядо визде». Икеле минь пелинек кортамс эрзякс ошсо транспортсо, ушосо эли ломань ютксо. Тень кисэ чумондсть, сялдсть, пижнесть берянь валт. Ней шкатне полавтовсть. Кортак зяро мелеть куш косо. Школасо эрьва кодат учебникть, литература, ютавтовить олимпиадат ды лия пелькстамот. Сюкпря ёвтавлинь минек тонавтыцятненень, сынь теить тевест весе седейстэ. Ансяк эйкакштнень рузыямось пек ризнэвти. Эйкакштне кортыть ды сёрмадыть ламо ильведькс марто. Эно улевельгак кудосо рузонь келесь ванькс, литературной, сестэ лия тевесь. Кудосо кортыть аволь видестэ. Содатадо, кода редяви? Диктантсо теить ламо ильведькст. Апак лотксе кортатано тетятнень-аватнень марто: бути эйкакшось содасы эрзянь келенть, сонензэ а стака карми чарькодемс-тонавтнемс рузонсенть. Эйкакшось седеяк кепети-касы, – кортась школань прявтось Валентина Шлабина.
Кода Кочкурвелесэ ладязь тонавтомань койтне, теде кортась эрзянь келень тонавтыцясь Светлана Ивановна Юртайкина:
– Минек школанть прявт тевезэ – кастомс алкуксонь ломанть, тиринь келень ды чачома таркань вечкицят. Эряви пачтямс эйдетненень: ёми келесь – ёми раськеськак. Кочкурвелень средней школасо эрзянь келенть ды литературанть ветить ниле педагогт ды начальной классо эштё кавто тонавтыцят.
Эрьва классо максозь част келень ды литературань уроктнес. Нама, вейке часось те пек аламо. 4-це ды 9-це класстнэсэ вейке часоськак явови кавтов. 10-це, 11-це класстнэсэ – колмо част. Важодемась а юты стяко. Те редяви олимпиадатнесэ пелькстамонть коряс. Эряви меремс, эйкакшонок пряст невтить аволь ансяк келень ды литературань олимпиадатнесэ, истя жо творческой пелькстамосо. Эрьва ие улить изницянок Регионъютконь олимпиадасонть. Монь койсэ, творческой секциясо пелькстамось седеяк кепеди тонавтницятнень вечкемаст тиринь келентень. Сынь варчнить виест стихень, ёвтнемань, сценкань сёрмадомасо. А сёпсынек, кода кандсызь тенек сёрмадовксост васенцеде, тосо улить рузонь ды эсенек кортавксонь валт. Те весе витеви. Эйкакшось важоди кель-валонзо лангсо, сюпалгавты, мазылгавты кортамонзо. Те кецявты тонавтыцятнень.
Башка валт ёвтавлинь тонавтыцятнеде. Весе сынь васенце ды высшей категория марто. Эрьвась аволь весть невтсь прянзо «Иень тонавтыця» пелькстамосонть. Лиснесть изницякс ды призёрокс.
Важодемасонок вастневить зярыя стакачить. Школасонок тонавтнить колмо раськень эйкакшт. Секскак уроктнесэ эйкакштне седе сеедьстэ кортыть рузонь кельсэ. Ламоксть кортынек тетятнень-аватнень марто, кадык кудосо кортыть эрзякс эйкакшост марто. Кой-кить чарькодить, лиятне – арась. Сынь арсить, рузокс кортамсто карми акцентэст. Ней жо мезе лисни? Эрзякс а маштыть, рузокскак паро ладсо тевест а юты. Минек талновты учебниктнесэ терминтнэнь эрзянь кельс ютавтомась. Кой-кона валтнэнь эйкакштненень ловномскак ды ёвтамскак стака. Икелень шкань учебниктнень коряс седе шождаль важодемс. Мезеяк лангс апак вано, поладтано тевенек. Миненек эряви эрьва эйкакшонть седейсэ вельмевтемс толнэ, конась карми ванстомо келентень вечкеманть, койтнень-кирдатнень содамонть.
Вал сайнесь вишка классонь тонавтыцясь Татьяна Александровна Афонькина. Сон ды тонавтыцясь Н. М. Ермошкина ульнесть эрзянь келень ды литературань коряс вишка классонь учебниктнень рецензентэкс (учебникень авторось Н. А. Буянова). Учебниктне сёрмадозь од программань вешематнень коряс. Эйсэст ламо упражненият, артовкст, налксемат, ламо содамоёвкст, валмеревкст, прибауткат, конат пек тукшныть эйкакштнень мельс. Эрьва учебниксэнть невтевить стака валтнэ. Эйкакштнень марто тейнить валкскеть, тонавтнить сынст. «Минек бажамонок – кастомс эйкакштнень содамочист ды сюпалгавтомс келест-валост, тонавтомс вадрясто ловномо, сёрмадомо ды кортамо, тонавтомс вечкемс келенть», – кортась Т.А. Афонькина.
Вастовомантень сакшнось Кочкурвелень Покровонь Пазонь Авань церьковань настоятелесь отец Василий. Сон чачсь мокшонь велесэ. Тесэ эри 25 иень перть. Валонзо коряс, кода кучизь тей служамо, сон эзизе сода эрзянь келенть. Мейле тонавтнизе ды ней парсте корты.
– Икеленек ашти покш кевкстема, кода ванстомат тиринь кельтнень. Весемесь юты тетятнень-аватнень пельде. Бути кудосо кортыть эрзякс, эйкакшось а карми виздеме ды а лотки кортамодо. Келень ёмамонть марто ёми раськенекак. Минь рузыятано. Кочкурвелень школантень а шожда, тесэ тонавтнить аволь ансяк эрзянь эйкакшт. Сюкпря тонавтыцятненень, сынь ламо тев теить. Самай сынст лангсо ашти келень ванстомась, идемась. Паряк, эряви арсемс кодаткак льготат сетненень, кить содасызь ды тонавтнить тиринь келенть, паряк, эряви максомс вузсо тонавтнеме молемстэ баллт. Эрзянь ды мокшонь кельтнесэ моронь кунсоломсто седеетькак эжи, сельведтнеяк туить. Кода тень ёмавтомс? – кортась отец Василий.
«Эрзянь правда» газетань прявт редакторось Марина Девятова пачтясь газетань тевтнеде, седе, мезе теи редакциясь келень ванстоманть коряс, кодат сюлмот кирди тонавтыцятнень марто. Теде башка, ютавты пелькстамот школань тонавтницятнень туртов. Редакторось ёвтнесь, кода тиринь келень содамось лезды ломантненень армиясо служамсто эли зярдо эряви пачтямс салава информация ды ятось мезеяк а чарькодевель.
– Келесь ютась тенек покштянок-бабанок, тетянок-аванок пельде. Визькс ули, бути эйкакшонок-нуцьканок стувтсызь сонзэ. Эряви тенек седе келейстэ тешкстамс эрзянь келень чинть. Нама, эряви поладомс важодеме тетятнень-аватнень марто. Паро улевель арсемс келень содамонть коряс кодамояк пелькстамо. Шкань ютазь эряви тенек тагояк вастовомс ды кортамс седе, мезе тейтяно тень коряс, – мерсь Дубёнкань райононь прявтось В. Н. Нефёдов.
Арсеманок коряс, велень школатнесэ эряви ютавтнемс творческой вастовомат писательтнень, од морыцятнень, артыцятнень, блогертнэнь марто. Кадык эйкакштне чарькодить: келесь – эрий, те сюпавчи, конань эряви ванстомс.
Татьяна Маторкина