Суббота, апреля 13, 2024
Важное
Свал мельспаро марямс седе, кода республикань томбалеяк явить мель эрзянь келень тонавтнемантень. Кадык эйкакштне а кортазевить тиринь кельсэ, ансяк седей потмозост, пря удемезэст сови минек историясь, койтне-кирдатне, раськень ёжось.


Наталия Торговкина вети Димитровград ошонь 2 № средней общеобразовательной школасо эрзянь ды мокшонь культурань коряс кружок. Сонсь авась – эрзява. Чачсь Ульяновской областень Новомалыклинской райононь Александровка велесэ. Школанть прядомадо мейле мольсь тонавтнеме И. Н. Ульянов лемсэ Ульяновскоень педагогической институтов. Кочкизе исторической факультетэнть. Вуздо мейле тонавтыцянь тевензэ ушодызе Инзенской райононь Сосновый Бор велесэ. Седе тов кармась эрямо ды важодеме Димитровградсо. Тонавтыцянь стажозо 35 иеть. Наталия Петровна вети история ды обществознания 7-це ды 10-це класстнэсэ. Школаст пек покш, параллельной класстнэде вете-кото эрьвасонть. Теде башка, сон ошсост вети тиринь келень тонавтыцятнень (эрзянь, ветькень, татаронь) методической вейсэндявксонть.

– Васня минек школасо ютась Ульяновской областень исторической краеведениянь коряс предмет. Эйкакштне сёрмадсть Равчиресэ эриця раськетнеде рефератт, пурнынек выставкат, ютавтынек эрьва кодат вастовомат. Шкань ютазь панжовсть кружокт. Истя, ней школасонок раськень колмо кружокт: эрзянь ды мокшонь, ветькень, татаронь раськень культуратнень коряс. Кемень иеть уш ветян эрзянь кружоконть. Тей сакшныть 5-це классто саезь 11-це классонь тонавтницят. Кинь-бути тетяст-аваст, покштяст-сырькаест эрзят, сакшныть лия раськень эйкакштнеяк, весе, кинь ули мелезэ. Кружокось юты недлязонзо весть, ансяк кодамо мельспаросо сакшныть тонавтницятне! Улить эрявикс литературанок, учебникенек, газетанок. Ламо лезды тенек мокшэрзянь областень автономиясь, – ёвтни Наталия Петровна.

Школасонть панжозь этнографической музей (уголок). Тесэ невтевить эрзянь ды мокшонь раськень оршамопельть, кезэрень ули-парот, тиринь кельсэ литература, учебникть, някат. Някат эйкакштне тейнить «Волжская красавица» кружоксо. Стыть эрзянь, татаронь, ветькень раськень оршамопельсэ някат, мейле сынст кучнить ДНР-в ды ЛНР-в.
Этнографиянь музейсэнть ванстови Наталия Петровнань покштянзо костюмозо, конанень уш малав сядо иеть. Школасонть улить тейтерне ды цёрыне лангс эрзянь оршамопельть, сынст оршнить концерттнэс ды кенярксчитнес. Саемга, школань тонавтницятне сеедьстэ якить инжекс «Автошка» эйдень кужов. Тосо прявтокс важоди Димитровград ёнкссо эрзянь ды мокшонь раськень культурань областень автономиянь филиалонь прявтось Анна Петровна Нуянзина. Тесэяк эйдетнень марто моли важодема: сынь тонавтнить эрзянь кельсэ морынеть, стихть, киштемат.

Эрьва иень апрелень 16-це чистэ 2 № школасонть тешкстыть Эрзянь келень чинть. 2022 иестэ тесэ ютась Равчирень раськетнень ялгаксчинь ошонь фестиваль.

Кода ёвтнесь Н. П. Торговкина, сынст ошонь школань прядыцятне поладыть тонавтнемаст Саранскоень вузтнэсэ. Эрьва ие школастост зярыя сыргить Мордовияв. Саранскоесь тукшны мелезэст. Прядсызь тонавтнемаст – велявтыть мекев Димитровградов.

– Наталия Петровна, ёвтнеде ошонк эйстэ.
– Икеле тесэ ульнесь Мелкес тарка, косо эрясть эрзят. Седе тов кармасть лемдямо – Мелекесс. Ошонтень колмосядто ламо иеть. Тесэ ульнесть острогт. Умонь шкане тия ютыль тракт, конаванть усксть тюрьмас озавтозтнень Россиянь центрасто Сибирев. Ней эрицятнеде 110 тёжат ломанть. Тесэ важоди Атомной реакторонь научно-исследовательской институт. Ули Медицинской радиологиянь ды онкологиянь федеральной научно-клинической центра, косо сэредицятнень лецить изотопонь вельде ды ламо лия покш предприятият. 1972 иестэ Мелекесс ошонть лемдизь Димитровградокс (болгарской героенть-антифашистэнть Георгий Димитровонь ледстнемга). Ошсонок ули А. Н. Островский лемсэ умонь шкань драматической театра.

Татьяна Маторкина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».