Декабрянь 13-14-це читнестэ Московсо ютась Россиянь Раськетнень тиринь келень тонавтыцятнень Весероссиянь васенце промкс. Тов пурнавкшность 75 регионсто малав 280 тонавтыцят. Мордовиясто покш вастовомантень якась Саранскоень 35 № школань эрзянь келень тонавтыцясь Елена Князькина. Тедеде сон лиссь изницякс «Эрзянь ды мокшонь келень сехте паро тонавтыця» республикань пелькстамосо. Елена Николаевна тонавты 2-4-це классонь эйкакштнень.
– Мон те шкас лембестэ ледстнян тонавтыцянь промксонть. Съездэнь программась сюпаволь. Ульнесь «Родные языки: состояние и перспективы развития» стратегической сессия, теде башка, важодемась мольсь зярыя секциява: «Развитие нормативно-правовой базы в сфере образования в части изучения родных языков», «Сохранение и развитие языков коренных малочисленных народов Российской Федерации», «Развитие поликультурного образования», «Развитие системы подготовки и повышения квалификации учителей родного языка и родной литературы».
«Тиринь кельтнень тонавтомасо од лувтне» секциясонть мон невтинь мастер-класс. Пачтинь, кодат заданият тевс нолдан эрзянь келень уроктнесэ, конат лездыть эйкакштненень тонавтнемс од валтнэнь. Те съездэсь кармась монь туртов методической алкуксонь мастерскоекс, косо теевинь содавиксэкс коллегатнень важодемаст марто, ёвтнинь эсень тонавтомань тевтнеде.
Съездэсь ютась васенцеде, ансяк анокстазель пек парсте. Мартонок ульнесть маринь, бурятонь, черкесэнь ды ламо лия кельтнень тонавтыцят. Эзинь содаяк, косо-бути тонавтнить ногаень кель. Миненек ульнесь мезде кортамс. Тонавтыцятне тешкстызь, умок эрявсь пурнамс истямо лембе вастовома, – ёвтнесь Елена Николаевна.
Е. Н. Князькина уроконзо вети 35 № школань эрзянь келень кабинетсэ-музейсэ. Занятиятнесэ сеедьстэ тевс нолды налксемат, важоди презентациятнень марто, тонавтницятнень марто кунсолыть аудиосёрмадовкст ды лия мезе. Эйкакштне содавтовить эрзянь келенть, раськень койтнень-кирдатнень, историянть, культуранть, оршамо- ды ярсамопельтнень марто.
Татьяна Маторкина