Эрямо кинть лангсо а весть савкшнось вастовомс ероков, эсь тевензэ вечкиця ды чевте седей тейтерь-ава марто. Неть читнестэ минь якинек инжекс Саранскоень 2-це № Эйкакшонь шкинемань центрав, косо теевинек содавиксэкс тосонь важодицянть, дока тонавтыцянть Марина Савушкина марто. Сон евтнесь минек туртов, кодамо покш уцяска важодемс эйкакш марто.
Вишка пингестэ саезь Марина арсесь сюлмамс эрямонзо шкинеманть марто. Истя лисськак. Эште эйкакшокс тейтерькась пек вечксь артомо. Семиясонзо те тевсэнть важодицят арасельть, секскак тетязо-авазо пек кенярдсть эйкакшосост истямо творческой сяткиненть кирваземантень.
Эряви евтамс, Маринань чачома енксозо – Краснодаронь краень Сочи ошось. Тейтерькась кассь пек мазый таркасо. Вишка шказо ютась иневедь чиресэ ды сэрей пандо маласо. Арседе тынсь, кодамо ежонь сыремтиця мазычисэ эрясь те ломанесь. Кода жо тесэ а ушодомс артомо эли сермадомо стихть?! Истямо пертьпельксэнь пейзажтне свал кепедить шкинемань мельть.
Эрямосонть свал эрсить полавтомат. Сынь токизь Маринаньгак. Эште вишка тейтерькакс сон аванзо марто сась эрямо Мордовиянь прявт ошов – Саранскоев. Тесэ тейтерькинесь кармась якамо художественной школав, косо явсь мель артомантень ды декоративно-прикладной творчествантень. Аламонь-аламонь художественной школань тонавтыцятне содавтызь Маринань эрзянь-мокшонь раськень культуранть ды койтнень-кирдатнень марто. Тейтерьканть весемесь тусь мелезэнзэ. Ды сон эзь фатяяк, кода прянек-пильгенек чопавтсь Мордовиянь культурань сюпавчинтень. Тейтерентень вечкевсь эрзянь-мокшонь орнаментэсь. Секскак эште школасо тонавтнемстэ сон кармась викшнеме. Викшнесь оршамопельть, стольлангонь вельтявкст, нардамот… Школань прядомадо мейле Марина тонавтнесь Н.П. Огарев лемсэ МГУ-нь Раськень культурань институтсо. Ероков тейтересь кенерсь аволь ансяк тонавтнеме, истя жо важодемеяк. Роботамо Марина кармась вечкевикс тонавтыцянзо Ольга Викторовна Тулуповань превс путоманзо коряс.
– Эште студенткакс Ольга Викторовна редизе ерокчим. Свал кортась тень сюлмамс эрямонть творческой профессия марто. Мон кунсолыя вечкевикс тонавтыцям ды вана уш зярыя иеть важодян шкинемань енкссонть. Ды лован прям сехте уцяскав ломанекс, – евтни Марина Савушкина.
Кода кортыть, ломанесь весе эрямонзо перть тонавтни. Истя лиссь Маринаньгак. Университетэнть прядомадо мейле тейтересь одс кармась студенткакс. Ды прядызе М.Е. Евсевьев лемсэ МГПУ-нть (сестэ эште институтоль). Теке шкастонть важодсь эйкакштнень марто, сюпалгавтсь эсензэ шкинеманзояк. Викшнемадо ды артомадо башка, тейтересь стась панксонь някат. Васенце коллекциязо – «Пертьпельксэнь шкат». Някатне нейгак ванстовить тонавтыцянть важодемань нупальсэнзэ. Минек марто кортамсто тейтерь-авась содавтымизь кедьсэ теевксэнзэ марто. Алкукскак, неть важодевкстнэнь лангс ванозь, чачи ежо, прок мерят, те весемесь теезь аволь ломанень кедьсэ – стамонь машинка вельде. Нама, теицяст пейдезевсь те карадо-каршо путомантень. Ды тешкстызе, эрьва тевесь веши вийть ды цидярдома, ансяк сестэ мезеяк лиси.
– Тонавтницянгак теньс тонавтан. Эйкакш марто важодемась монень вечкеви. Вишкинетне а пелить эсест важодевкссэст нолдамс кодаткак ильведевкст, сынст лангс ванозь, монгак лоткинь пелемеде, ды важодемась тусь седе валаня ды шожда киява. Важодемасон кемекстазь истямо лув: мон тонавтан эйкакштнень ды панжан сынст ерокчинть, сынь жо тонавтыть монь, – корты Марина Савушкина.
Эсензэ тонавтницянзо марто Марина аноксты эрьва кодат теевкст. Сехте вишкинькатнень марто тейнить човалясто мазылгавтомат, тонавтнить витражонь ды батик ланга артомань техникатнень. Седе покштнень марто тонавтыцясь важоди эрзянь-мокшонь викшневксэнть ды стамонь салавачитнень лангсо. Теде башка, тейтерькатне тонавтнить важодеме стамонь машинкасо: анокстыть эсест туртов куш кодат оршамопельть. Мейле артыть эйсэст эли жо викшнить. Тесэ уш кинь кодамо мелезэ.
Юткошкасто Марина ламолгавты эсензэ теевксэнзэ. Сонзэ кедензэ алдо лиссть эрьва кодат важодевкст: викшневкст, човалясто мазылгавтомат ды сюлгамот.
Эряви меремс, аванть шкинемазо минек республикасо содавикс. Эдь Марина Савушкина – эрьва кодамо фестивалень ды пелькстамонь свалшкань участник. Истя, сон аволь вейке ие невтни теевксэнзэ «Шумбрат, Мордовия!» фестивальсэнть ды «Мастер года» республикань пелькстамосонть, косо свал сайни изнямонь таркат. Истя жо ероков тонавтыцянть важодевксэнзэ мазылгавтыть ды сюпалгавтыть региональной выставкатнень. Истя, аволь умок Марина Савушкина ульнесь «Молодежка» ды «Эрьзя. Новые смыслы» Художникень союзонь од ломанень региональной отделениянь выставкатнесэ.
Минек героинясь тешксты, весе неть мероприятиятне пек лездыть сонзэ шкинеманзо кастомга. Эдь истямо творческой вастовомасо улемась кази од мельть-арсемат ды ежомарямот.
Важодемадо башка, Марина Савушкинань эрямосо прявт сюпавчизэ ды уцясказо – те малавиксэнзэ. Мирдензэ марто трить-кастыть Ксения тейтерькаст. Тешкстама, Маринань мирдезэ истя жо важоди Эйкакшонь центрасонть. Церась – технической безопасностень коряс отделэнь прявт, теде икеле важодсь тонавтыцякс.
Эряви меремс, Ксения тейтерькасткак уш нейке невтни ерокчинзэ шкинемасо. Сон, кода авазояк, вадрясто арты, тейни човалясто мазылгавтомат, викшни ды сты оршамопельть. Кода корты Марина, эйкакшонзо улить маштомачинзэ. Тейтерькась вечки лездамо аванзо туртов пидемань-панемань тевсэяк. Ды вейсэ эрьва оймсема чистэ сынь панить кодамояк тантейка. Кемекстыть, весемесь, мезесь теезь эсеть кедьсэ ды мелень путозь, свал седе вадря рамазденть.
Алена Артемьева
Фототне саезь Марина Савушкинань архивстэ.