Музыкась те аванть марто вишка пингестэ саезь. Нейгак ледстни тетянзо, Николай Николаевичень, кона велесэ ульнесь содавикс гармонистэкс. Косо кенярксчи – тосо сон седи ды морси, сеедьстэ мартонзоль Таня тейтернезэ. Мельсэнзэ аштить велень покш читне, Мастясь – телень ильтямотне, зярдо велева ардтнесть нурдосо. Велень вейке пестэ омбоце пес пурнавильть ламо ломанть, жойть молиль моротнеде. Ней тетянзо гармониясь ванстови сонзэ кедьсэ, неявикс таркасо. Татьяна Липатова эрямонзо сюлмизе музыканть марто. Сон 45 иень перть важоди школасо музыкантень тонавтыцякс.
Татьяна Николаевна чачсь Чаунзань райононь Алексеевка велесэ. Семиясост ульнесть колмо эйкакшт. Тетяст-аваст важодсть цементэнь заводонть стявтомасо. Школав сон яксесь Киржеманов, шабра велев. Теде башка, кото иеть тонавтнесь Комсомольскоень музыкальной школасо. Тов ветизе вечкевикс бабазо. 8 класстнэнь прядомадо мейле Татьяна мольсь тонавтнеме Л. П. Кирюков лемсэ Саранскоень музыкальной училищав. Сон кочкизе народной инструментэнь отделениянть, баянонь классонть. Прядызе 1978 иестэ ды кармась арсеме: ков молема седе тов? Мельсэнзэль высшей образованиясь. Истя сон мольсь Н. П. Огарёв лемсэ МГУ-нь омбо масторонь келень факультетэв. Школасо немецень келесь саевсь тензэ шождасто, секскак стакачить эзь маря. Тонавтнесь заочна. Кода ансяк Комсомольскоень 1 № средней школасо лиссь тарка, сон мольсь тов важодеме. Васня ниле иеть ветясь немецень кель. Музыкась эйсэнзэ ялатеке эзь нолда, ды ютась музыкань тонавтыцякс. Те таркасонть сон нейгак, теде башка, вети урокт Чамзинкань 1 № лицейсэяк.
– Эсь тевем пек вечкса. Свал эйкакш марто. Кода-бути сеске муян мартост кель-вал. Уроктнесэ сынь паро мельсэ кунсолыть монь, теить-топавтыть весе заданиятнень. Зярдояк арасельть мелявкст дисциплинань коряс. Музыкань уроктне ютыть 1-це классто саезь 8-це классос. Минек пек паро программанок (авторось В. В. Алеев). Эрьва кенярксчинтень алтави башка музыка ды морот. Те: народнойть, патриотическойть, эстрадань, джазонь интерпретациясо. Васня монсь тенст мораса, седяса. Мейле весе эйкакштне ушодыть морамо.
Вишкинетнень туртов улить музыкальной ёвкст. Малав комсь морот тонавтнетяно Од иентень. Седе тов сы Роштовась, сонензэяк алтави башка музыка, тонавтнетяно озномань морот. Школасо вейкеяк концерт а ютни минтеменек. Иезэнзэ кавксть невттяно вейсэнь покш концертт – Тонавтыцянь чинтень ды Мартонь 8-це чинтень. Эрьва классто кочкатано парсте морыцят, сынь кармить кенярдовтомо ваныцятнень. Музыкань тонавтыцянтень эряви педе-пес содамс эсь программанть, свал лавтовот лангсо аштезэ баян, куроксто содавтомс тонавтницятнень музыкальной произведениянть марто. Мон васня налксеса сыненст. Бути уроктне алтавить народной моротненень, кандан кудосто музыкальной инструментт, седян эйсэст ды тагояк моран. Седе тов моратано весе вейсэ. Эйкакштнестэ ламотне тонавтнить музыкальной школасо, сон ашти малацек минек школадонть, – ёвтни Т. Н. Липатова.
Сонсь тонавтыцясь машты седямо музыкальной зярыя инструментсэ: гармониясо, баянсо, гитарасо, домрасо. Секскак уроктнесэ морсить живой музыкань коряс. А уш зяро морот соды – а лововитькак.
– Эстень ладия истя – эйкакштнень лангс зярдояк вайгель а кепсян, а сялдан сынст. Бажан свал ёвтамс паро ды лембе валт. Кадык морызе лавшосто эли сэтьместэ, мон теде а ёвтан. Муян шнамонь валт. Теде мейле сынь седеяк парсте невтить пряст, кода кортыть, пандояк сявордыть. Эдь тонавтыцянтень эряви улемс психологокскак. Важодемань весе иетнень перть эзинь талновто тетяст-аваст. Эйкакштне – монь марто, кедьсэнь, мезе моли школасо – те монь мелявкстнэ, – ёвтни тонавтыцясь.
Татьяна Николаевна, уроктнеде башка, вети «Любители музыки» кружок. Кить явить покш мель моротненень, сон важоди эрьванть марто башка. Сонсь якси тенст кудов, чокшне ланга эли оймсема читнестэ. Вейсэ анокстыть пелькстамотнес ды музыкань коряс конкурстнэс. Истя, аволь умок 7-це классонь тонавтницясь Даша Аникина сайсь васенце тарка «Фольклорная мозаика» весероссиянь пелькстамосо. Теде икеле изнясь «Серебряная музыка» райононь конкурссо.
Т. Н. Липатовань тонавтницятнень эйстэ зярыя прядсть Н.П. Огарёв лемсэ МГУ-нь Национальной культурань институт. Важодить республикань культурань кудотнесэ, школатнесэ. Екатерина Дигалева морси Мордовиянь государственной филармониясо, Сергей Пятайкин – Чаунзабуень сырнень вайгель, тонавтыцякс кармась Юлия Тякина, те шкас морсить Виктория Котина, Геннадий Тришкин ды лиятне.
Ламо иень перть парсте важодеманзо кисэ Татьяна Николаевна казезь РФ-нь общей образованиянь Почётной роботникень лемсэ, улить казнеть МР-нь Правительстванть пельдеяк.
Икеле эрьва ие ардтнесь «Шумбрат, Мордовия!» раськень творчествань республикань фестивалев, седясь-морсесь ськамонзо ды ансамблясояк. Ней аноксты тов тонавтницятнень. 2004 иестэ Татьяна Липатова саизе Гран-принть «Седяк, гармония!» республикань конкурссонть. Комсь иеть ютасть, ансяк те шкас лембестэ ледстни пелькстамонть. Сон седизе «Коробейники» произведениянть кавто кедьсэ, ульнесь вейкинекс республикасонок, кона тевс нолдызе те приёмонть. Анокстась иень перть! Седясь кудосо, пиресэ, ушосояк скалонзо икеле! Казнекс тензэ макснесть микроволновка. Се шкастонть те марявсь дивань казнекс. Лия иетнестэ сайнесь васенце ды омбоце таркат. Вельмесь покш конкуренция. Валонзо коряс, мельспароль неемс пелькстамосонть од ломанть, сынь сакшность эрьва кодамо районсто ды невтсть алкуксонь маштомачист. Казсть тензэ мазыйстэ артозь самоваргак, сонзэ лангс варштазь, сеске чаразевить лембе ледстнематне.
Татьяна Николаевнань вейкине Игорь цёразо. Сон казсь тензэ колмо нуцькат: Сергеень, Юлиянь, Катюшкань. Покштне тонавтнесть музыкальной школасо, маштыть седямо. Сынст трямосо-кастомасо бабаст путовксозо пек покш. Юлия 18 иесэ лиссь мирденень, чачсть Ванюшказо ды Вареньказо. Татьяна Николаевна тагояк а ашти ве ёно, лезды, мейсэ машты, ваны нуцьканзо вишка эйдетнень. Сельме удалга лемдить сонзэ «скорой помощекс». Рузкс мерить прабабушка. Ансяк кодаяк а мереват те мазый, эряза авантень сырькай. Ков тензэ эряви, ойси руль экшскак. Путни покш пире, косо кирди кавто теплицат. Пек вечки пидеме-панеме, мацтозо пешксе эрьва мезде, эрьва кодат салтовксто-пидевкстэ. Кизэнь шкане капши вирев, косо кочкси кстыйть ды пангот. Аволь васоло эйстэнзэ эри Зоя Фёдоровна авазо, сонензэ 89 иеть, эрьва чи якси сонзэ варштамо. Пингень перть тев потсо – школась, эйкакшозо, нуцьканзо ды правнуцьканзо. Кемтяно, сыньгак максыть тензэ весе те лембенть, конань Татьяна Николаевна алты тенст.
Татьяна Маторкина