Вторник, мая 21, 2024
Важное

Апрелень 16-це чистэ республикасонок тешкстави Эрзянь келень чись. Нама, Мордовиясо ды сеть таркатнесэ, косо эрить ламо эрзят, истя жо те чинтень явить покш мель. Сынь анокстыть вастовомат, ютавтыть пелькстамот ды истя седе тов.



Те чинть марто эрьва ломаненть, кие корты эрзякс эли бажи тонавтнемс тетянь-авань, покштянь-сырькаень келенть, сюлмавозь эсензэ ёжомарямозо, арсеманзо. Видьстэ мерян, монь седеем пек токавсь те иенть ушодовомсто, зярдо прась тень уцяска молемс Покш Березникень тиринь районов, косо февралень васенце пельксстэнть ютавтовсь Эрзянь ды мокшонь раськетнень регионъютконь общественной вейсэндявксонь исполкомонь президиумонь промксось. Тешкстаса, сеть кевкстематне, конатне ванкшнозельть эйсэнзэ, ульнесть пек эрявикст ды весе минек эрзятнень ды мокшотнень туртов талновтыцят. Видестэ теезель, ламо кевкстематнень ютксто башка мель явозель тиринь келень ды литературань тонавтомантень, койтнень-кирдатнень ванстомантень ды демографиянь стакачитнень витемантень.

Паро, неть кевкстематненень Покш Березникень муниципальной райононь Шугурова велень средней школасо, ков минь сестэ пачколинек, явить сатышка мель. Теде минь пачтинек тосто самодо мейле сёрмадовкссонок. Течи ули мелем ёвтнемс Шугурова велесэ умонь шкасто саезь эриця раськеденть, Дёминтнэнь тонавтыцянь династиядонть. Тешкстаса, те арсемась мелезэнь сась те школасонть улемстэ, эрзянь ды рузонь кельтнень ды литературань коряс тонавтыцянть Наталья Дёминань марто содавиксэкс теевемстэ. Маряви, овсе аволь умок те школасонть пингень перть тонавтыцякс важодсь сонзэ авазо – Анна Ивановна. Ней жо вана колоньгемень иеть те тевенть топавты сонзэ тейтерезэ. Наталья Алексеевна бажи максомс домка содамочить аволь ансяк эрзянь кельсэ кортыця тейтерькатненень ды цёрынетненень, истя жо рузонь велестэ сыця тонавтницятненень.

Васняяк, улема ломанекс

Ледстневи, неть валтнэнь сеедьстэ савкшнось марямс Шугуровань средней школань тонавтыцянть Анна Ивановна Фадеевань пельде.
Тиринь школав самсто, эсеть классос совамсто, куш кодамо ломанентень сыть эйкакш шкадо ледстнематне. Маряви, тунь аволь умок, ютазь пингень сизьгеменце иетнестэ, доска икеле тесэ минь ёвтнинек эрзянь ды рузонь кельсэ стихотвореният. Ялгатнень ютксто ламот сестэ яксесть литературань кружоков, бажасть невтемс ёрокчист сценкань невтемасо. Юткошкасто яла тонавтнесть эрьвась эсензэ ролензэ.

Классонь прявтокс малав вете иень перть ульнесь Анна Ивановна Фадеева (тейтерьксэнь Дёмина). Эйкакшчинь ледстнемазонок сон кадовсь тунь аволь кежей, лембе варштавкс марто ды свал весенень паронь арсиця тонавтыцякс. Те шкас эзть стувтово тенек сэнь, прок валдо менель, сельмензэ.

Минь, кавксоньгеменце иестэ школань прядыцятне, зярдояк эзинек маря, штобу сон лангозонок ранговоль эли весень пингстэ киньгак чумондоволь. Бути эрявсь кинь мартояк кортамс, сон свал башка кадылизе эли тердилизе ве ёнов. Сон маштсь аволь покордазь, аволь пижнезь мартонзо кортамо. Тейсь истя, эйкакшось сонсь чарькодилизе чумонзо, ансяк варштавксонзо редязь. Виде, те малав аволь эрьва ломанентень, седе сеедьстэ прявтонтень, истямо обуцясь максови.
Ансяк шкань ютазь карминек содамо, Анна Ивановнань аволь истямо вадряль, кодамоль минек эйкакш пингенек, ялатеке эйсэнзэ ванстовсть обуцянь истят паро ёнкстнэ. Эдь сон чачсь-кассь войнадо мейлень 1949 иень стака шкастонть, ламо эйкакшонь триця семиясо. Тетязо-авазо пингень перть важодсть Шугурова велень Калинин лемсэ колхозсо. Тетяст, Иван Михайлович, ульнесь икеле молиця трактористэкс. Аваст, Татьяна Павловна, одсто, мирдензэ туртов паксясо лездамсто, плугарень тевгак мик топавтсь. Войнадо мейлень стака иетнестэ паксянь эрьва кодат тевть савсь топавтомс ды кудоютксояк пек ламо важодемс.

Ниленест эйкакштнень тонавтневтизь вузсо

Дёминтнэ трясть-кастсть ниле эйкакшт: кавто цёрат ды кавто тейтерть. Ниленест туртов лездасть тонавтнемс республикань вузтнэсэ ды получамс тонавтыцянь специальностть. Виде, эйкакштнененьгак аволь шожда ульнесь тень теемс. Невтемакс, Анна тейтерест школанть прядомадо мейле, 1966 иестэ, тусь эрямо ошов ды ушодсь важодеме Саранскоень медицинань препаратонь заводсо (ней – «Биохимик»). Иень ютазь макссь экзамент М. Е. Евсевьев лемсэ пединститутов, сонзэ саизь подготовительной отделенияс. 1971 иестэ кармась улеме чинь отделениянь филологиянь факультетэнь васенце курсонь студентэкс. Тонавтнеманзо прядомадо мейле велявтсь тиринь велев, важодеме кармась эсест велень школасо.

Омбоце тейтерест туртов, Ольга Ивановнанень, вузонть прядомадо мейле максовсь химиянь ды биологиянь предметтнэнь тонавтыця специальностенть коряс диплом. Сон ламо иеть важодсь Покш Березникень райкомонь народной образованиянь отделэнь прявтокс ды истя жо лия таркасояк, конат сюлмавозельть эйкакштнень тонавтомаст марто.

Василий Иванович Дёминэнь минек республикасонок содылизь (ней уш сон умок арась ютксонок) кода тонавтыцянть, журналистэнть, литературоведэнть, филологиянь наукань докторонть, профессоронть. Сон, Н. П. Огарёв лемсэ МГУ-нь филологиянь факультетэнть прядомадо мейле, ламо иень перть важодсь «Эрзянь правда» газетасо, васня корреспондентэкс, мейле – отделэнь прявтокс. Неень шкасто а лововитькак, зяро публикацият анокстась эсензэ ды ломанень пельде. Те ульнесь алкуксонь ды виев журналист! Василий Иванович, кодамо тема бу аволь сае, истя анокстылизе сёрмадовксонть, аволь ансяк ловныцятне, сёрмадыця ялгатнеяк сонзэ седейшкава ловнылизь ды ёвтылизь мелест-арсемаст. Василий Ивановичень пельде ульнесь мезес тонавтнемс, ульнесь мартонзо мезде кортамс! Куш ламо иеть отделэнь прявтоль, прянзо «начальникекс» зярдояк эзь невте, кортась весень марто вейкетьстэ, апак покшкавтне. Те шкас ёвтан сюкпря Пазонтень сень кисэ, што прась уцяска важодемс истямо содавикс журналистэнть марто, кода Василий Дёмин.

Вейксэньгеменце иетнестэ Василий Иванович редакциясто тусь важодеме васня «Сятко» журналов, мейле – Н. П. Огарёв лемсэ МГУ-нь филологиянь факультетэв тонавтыцякс. Тонавтыцясто кассь кафедрань прявтокс, доцентэкс, профессорокс. Сон сёрмадсь малав сядо научной ды научно-методической важодевкст, тонавтнемань пособият ды ламо монографият, поэтической сборникть рузонь ды эрзянь кельтнесэ. Василий Дёминэнь тонавтницянзо важодить республикань газетатнесэ ды журналтнэсэ, телевидениясо ды Мордовиянь школатнесэ.
Редакциясто туемадо мейлеяк ялгатнень сон эзь стувтне. Свал ульнесь паро ёжомарямосо, пря эзь невте сестэяк, зярдо тензэ пек стакаль. Вастоват мартонзо промкссо, ушова ютамсто, свал муиль мелень кепедиця, седейшкава пейдевтиця валт. Виде, а шкастонзо сезевсь эрямозо, эштё пек ламо кенеревель бу тееме эрзянь алкуксонь цёрась, содавикс учёноесь!

Тешкстасынек, Дёминтнэнь нилеце эйкакшост, Владимир, кода лелязо ды сазоронзо, тонавтнесь вузсо. Владимир Иванович прядызе М.Е. Евсевьев лемсэ МГПИ-нь (ней – университет) физической культурань факультетэнть.

Поладызе аванзо тевенть

Кода вере тешкстынек, Дёминтнэнь тонавтыцянь династиянть вана уш колоньгемень иеть полады Анна Ивановнань тейтерезэ Наталья Алексеевна Дёмина. Шугуровань средней школанть прядомадо мейле, сон тонавтнесь Н. П. Огарёв лемсэ МГУ-нь филологиянь факультетсэ. 1994 иестэ вузонть прядомадо мейле сась важодеме тиринь Покш Березникень районов. Од специалистэнть васня кучизь важодеме шабра велев, Симкинав. Малав кемгавтово иеть Наталья Алексеевна тонавтсь эрзянь ды рузонь кельть ды литература предметтнэнень. Те велесэнть школанть пекстамодо мейле сон кармась важодеме Шугуровань средней школасо. Наталья Дёмина тонавтницянзо марто ютавтни эрьва кодат мероприятият тиринь келень ды литературань коряс, тейни панжадо урокт кода эсест школасо, истя районсояк. Сон сеедьстэ якси тонавтыцянь семинартнэс, эйкакштнень марто невтить ёрокчист эрьва кодат пелькстамотнесэ, школань, муниципальной ды республикань олимпиадатнесэ. Невтемакс, «Эрзянь келень сехте паро кабинет» конкурссонть (эсест школасо сон кабинетэнь прявт) совасть изницятнень юткс.

Нать, а стяко парсте важодемань кисэ Наталья Алексеевна казезь Мордовия Республикань Образованиянь министерствань Почётонь грамотасо, Российской Федерациянь Образованиянь ды наукань Почётонь грамотасо. Истя жо улить ламо лия казнензэ. Сонензэ, кода тонавтыцянтень, максозь васенце категориясь. Наталья Дёминань валонзо коряс, важодемасонзо сехте питнеесь – эйкакштнень тиринь келень ды литературань алкукс вечкеме тонавтомась, сынст сельместэ содамочитненень бажамонть редямось!

Валентина Юдин

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».