Неень шкасто эрьва кодамо профессиятнеде лововить ламодояк ламо. Веенст чачсть овсе аволь умок, лиятне жо зярыя пингеде икеле. Эрьвась чарькоди, обществанть виевгадоманзо марто полавтовить тонавтомасо вешематне, важодемань рынкасо лувтне, секскак профессиятнень эрявиксчись касы, полавтови. Эрьва ие чачить од профессият. Ламот эрить вете-кеветее иеть, а мейле эли овсе емить, эли жо полавтыть чачост. Ансяк улить истят профессият, конатне эрить уш ламо пингень перть. Вейкесь эйстэст – тонавтыцянь тевесь, конантень минь алтатано течинь материалонть.
Отяжелень райононь Сабанцеле велень модась сюпав превей, ероков ды содавикс ломаньсэ, конат важодить эрьва кодамо тевсэ ды сферасо. Покш сюпавчикс тесэ ловить школасо тонавтыцятнень, педагогической трудонь ветерантнэнь, конат весе эрямост алтызь те а шожда, эрявикс ды вадря тевентень – эйкакштнень кастомантень ды тонавтомантень.
Истят тонавтыцятнень юткс апак кавтолдо кандовить Надежда Васильевна Бояркина, Татьяна Михайловна Логинова, Ефим Ефимович Палькин, Елена Петровна Учеваткина ды Галина Михайловна Суняйкина. Тонавтыцянь тевентень сынь максызь весе эрямост.
Эйкакштнень васенце ялгаст
Надежда Васильевна Бояркина – воспитаниянь коряс прявтонь советник ды эйкакшонь общественной вейсэндявкстнэнь марто важодиця.
Сонзэ чачома тарказо – Отяжелень райононь Трокс Кужо (Киржеманы) велесь. Зярдо тейтерьавась тонавтнесь М.Е. Евсевьев лемсэ МГПИ-нь начфаксо, сынст ялгацек колмонест кучизь Сабанцелев практикань ютамо. Практиканть ютызь ды весе колмонест кадовсть теске – венчасть тесэнь цератнень экшс, кармасть важодеме.
1990 иестэ Надежда Васильевнанень макссть васенце класс.
– Сабанцелесь истя тусь мелезэнь, эйкакштне весе мазыйть, статнойть, аккуратнойть. Свалшкас кадовить мелезэнь советской шкань тетятне-аватне. Сынь ульнесть сюкпрянь евтыцят, ломанькс путыцят. Сынст туртов мон ульнинь Учитель, – евтни Надежда Бояркина. – Ней тетятне-аватнеяк полавтовсть, эйкакштнеяк. Поколениясь лия. Теке марто весе выпускниктне а стувтнить школанть, минь каштанчисэ аштетяно сынст кувалма.
Надежда Васильевна нилеце ие топавты воспитаниянь коряс прявтонь советникень тевтнень. Сонзэ вановт ало весе ютавтовиця мероприятиятне, секскак кеме сюлмот кирди тетятнень-аватнень, школантень лездыцятнень марто. Истя жо сон ваны «Движение Первых», «Орлята России», «Навигаторы детства» ды лия вейсэндявкстнэнь отделениятнень важодемаст мельга. Школасонть сон эйкакштнень васенце ялгаст.
Неень шкане Надежда Васильевна вейсэ эйкакштнень марто ламо важоди специальной военной операциянь участниктненень лездамга. Сынь пурныть консервань банкат окопонь штатолтнэнь тееманть туртов, теить боецтнэнь туртов талисмант, пурныть гуманитарной лезкс. Лиякс меремс, лездыть мейсэ сатыть виест.
Вети биологиянь уроктнень
Татьяна Михайловна Логинова Сабанцелень школав важодеме сась 2001 иестэ, 2014 иестэ саезь важоди завучокс ды вети биология предметэнть.
Татьяна Логиновань чачома-касома тарказо – Дубенкань райононь Чиндянова велесь. Школадо мейле прядсь Ульяновскойсэ училища «лаборант пищевой промышленности» специальностень коряс. Дипломонть получамодо мейле тусь Саратовав, аламос роботась ды кармась тонавтнеме педагогической университетсэ. Васня тонавтнесь очна, мейле ютась заочной лувс.
Сень коряс, Сабанцелень школась ловови малокомплектнойкс, Татьяна Михайловна тонавты аволь ансяк биологиянть, истя жо вети технология.
– Нама, зярдо эйкакштнеде ламо, важодемаськак седе мельстуиця. Теке марто эрьва лувонть улить вадря ды берянь енксонзо. Зярдо эйкакштнеде аволь ламо, эрьвантень муеви шка, сынь прок индивидуальной занятиясот, – тешксты тонавтыцясь.
Татьяна Михайловна – ламо эйкакшонь ава. Логиновтнень семиясо колмо церат.
Касты спортонь вечкицят
Ефим Ефимович Палькин – физической культурань тонавтыця.
Школасо Ефим Ефимович важоди уш ниленьгемень нилеце ие. Сон чачсь-кассь теске, Сабанцелесэ. Школадо мейле тонавтнесь М.Е. Евсевьев лемсэ МГПИ-сэ (ней – университет) физической воспитаниянь факультетсэ. Вузсо тонавтнеманть прядомадо мейле, 1982 иестэ, сеске сась важодеме эсь тиринь велень школав. Ды весе те шканть перть Ефим Ефимович кастсь-анокстась 30 ламо спортсмент, спортонь мастерэкс кандидатт. Сон свал маштсь сыремтемс эйкакштнесэ спортонтень вечкеманть.
– Спортонть туртов минек школасо свал ульнесь весемесь. Минек школанть прядокшнызе, ды мейле ульнесь колхозонь председателекс, Дмитрий Петрович Горбунов. Сон эсь шкасто тонавтнекшнесь физвозсо ды кармась невтемакс ламонь туртов. Самай сонзэ мельга те факультетэсь минек велень школань прядыцятнень туртов кармась сехте кочкавикс. Монь ловомам коряс, физической воспитаниянь факультетэнть прядызь Сабанцелень школань 75 выпускникть. Ве иестэнть сеске кавксо ломанть поступакшность, – евтни тонавтыцясь.
Ефим Ефимович, физкультурань уроктнеде башка, вети спортонь секцияткак. Райононь ДЮСШ-нть пельде пондельникстэ, середасто ды пецясто спортонь вечкицятнень туртов ютавтовить занятият.
Ефим Ефимовичень васенце разрядозо шожда атлетикань коряс, сон казезь «Отличник физической культуры и спорта Российской Федерации» мештесэ кандтнемань тешкссэ, Мордовия Республикань Почетной грамотасо.
Седейлембест казить вишкинетненень
Елена Петровна Учеваткина ды Галина Михайловна Суняйкина – начальной классонь тонавтыцят.
Сабанцеленть марто Елена Петровнань сюлмавозь весе эрямозо. Тесэ чачсь-кассь, тонавтнесь, вастызе седейпельксэнзэ, нейгак эри ды важоди теске. Школасо эйкакштнень тонавты уш малав 40 иеть.
Тонавтыцянь профессиянть кочкизе а стяко. Нама, вишкинестэ, кода ламот тейтерькатнень, покш мелезэль улемс артисткакс. Аламодо касозь жо, бажамотне полавтовсть. Сон кемекстызе эсензэ туртов, карми начальной классонь тонавтыцякс, ды те меленть уш эзизе полавтокшно. Кочказь тевенть кувалма зярдояк эзь янксекшне, сон пек вечксы важодеманзо.
– Школадо мейле прядыя М.Е. Евсевьев лемсэ МГПИ-нть ды направлениянь коряс кучокшнымизь Темниковав. Курок эсенек школасо чамсь тарка, ды сестэнь прявтось Мария Ивановна Данилова хлопочимим тей. Отяжелень РОНО-нь прявтсоль Виктор Васильевич Тикшайкин, сон вейке чис тейсь приказ, молинь Институтонь деканатов, документэнь полавтызь, ды сынь важодеме тей, – евтни Елена Петровна.
Учеваткинтнэ трясть-кастсть кавто эйкакшт – Александр цераст ды Анастасия тейтерест. Елена Петровна пек бажась, штобу тейтерезэяк кочкавлизе тонавтыцянь тевенть. Ды весть тонась тензэ мерсь: «Авай, пек уш ламо кудов книгат-тетрадть кандтнемс».
– Сестэ весе плантнэ сермадовильть кедьвийсэ, компьютерт арасельть. Ды сон пек парсте неизе, зяро мон роботан кудосо. Секскак кочкизе улемс врачокс. Ансяк лиссь истя, врачтнененьгак кудов савкшны важодема коневт кандтнемс, – пейди Елена Петровна.
Кода тешкстынек седе вере, Сабанцелень школась уш зярыя иеть важоди кода малокомплектной. Начальной класстнэ вейсэндязь. Истя, Елена Петровна тонавты 1-це ды 4-це класстнэнь. Кавто класстнэсэ лововить кото эйкакшт, кавтотне якить 1-це классос.
– Начальной школасо важодемс монень пек вечкеви, ансяк а чарькодян, кие арсизе истямо лувонть, кода вишка класстнэнь вейсэндявомась. Нама, миненек, покштненень, программась маряви шожда, ансяк эйкакштнень туртов весемесь овсе лиякс ашти. Сыненст эряви эрьвантень весементь толковамс, эрьвантень явомс башка мель. Кода жо тень теемс, зярдо тонь икеле аштить 1-це классонь ды 4-це классонь тонавтницят. Веенстнэнь урокось моли 35 минутат, лиятнень – 45 минутат. Те шканть эште явома кавтов, косо-бути 22 минутат эрьва классонть лангс. Кода весементь кенеремс? Пек стака, – кемексты тонавтыцясь.
2-це ды 3-це класстнэнь тонавты Галина Михайловна Суняйкина.
Сабанцелень школасо сон важоди 1989 иестэ саезь, чачома тарказо – Орданьбуень райононь Пиксяська велесь. Галина Михайловна прядсь Ицялонь педагогической училища ды сась важодеме тей. Весе те шканть перть тонавты сехте вишкинетнень.
Тонавтыцякс бажась улемс вишкинестэ саезь, ялгацек налксильтькак яла школынесэ. Ды ялганзо марто кавонест, 8-це классонть прядомадо мейле, мольсть тонавтнеме Ицялонь педучилищав. Поступамо сыргасть тетявтомо-ававтомо. Кода тешкстызе Галина Михайловна, аватнень шкаст арасельть, роботасть. Экзаментнэнь максызь, ютызь практикаст ды кудов велявтсть уш студентэкс. Ульнесь покш мелест тонавтнемс, секскак кодаткак стакачить эзть маря. Тонавтнемань ниле иетне ливтясть курок ды важодема таркаткак муевсть сеске.
– Зярдо ушодынь роботамо, класстнэ явовильть кавтов, ульнесть «А» ды «Б» класст, эйкакштнеде ламольть. Шкань ютазь тонавтницятнеде кармасть яла седе аламо, класстнэнь вейсэндизь. Мон тонавтан 2-це ды 3-це класстнэнь. Нама, истямо лувсо важодемантень ней уш тонадовсь, – мерсь Галина Михайловна.
Ламо иень перть вадрясто важодеманть кисэ Галина Михайловна казезь эрьва кодамо грамотасо. Сон – трудонь ветеран.
Сабанцелень школасо важодить алкуксонь тонавтыцят. Сынь вечксызь эсь тевест, пек вечксызь эйкакштнень ды путыть оймест сынст вадрясто тонавтомантень.
Юлия Еремина
Фототне Егор Горинэнь.