Ольга Ивановна Налдеевань содасызь аволь ансяк минек республикасо, сонзэ томбалеяк. Сон покш учёной – лингвист.
Ламо теи эрзянь, мокшонь койтнень-кирдатнень, кельтнень ванстомасо. 1997 иестэ саезь важоди М. Е. Евсевьев лемсэ Мордовской государственной педагогической университетсэ, 2015 иестэ саезь – Филологиянь факультетэнь тиринь келень ды литературань кафедрань прявтокс.
Ольга Налдеева эйкакш шкасто саезь башка мель явсь тиринь мокшонь келенть тонавтнемантень. Кадык чачськак тейтересь аволь Мордовиясо, шабра Пензань областень Белинской райононь Киселева велесэ, эсь раськень келенть бажась содамс седе парсте. Ды те сонзэ лисиль а беряньстэ. Секскак школадо мейлеяк эстензэ кочкизе истямо тевенть, конась кеместэ сюлмавозь тиринь кельтнень тонавтнемаст марто.
1997 иестэ, Н. П. Огарёв лемсэ университетэнь филологиянь факультетэнть прядомадо мейле, Ольга Налдеевань эрямосо лиссть васенце полавтоматне, конатне зярыя шкань ютазь ёроков тейтеренть кеместэ сюлмизь науканть марто. Эсь важодемань кинзэ сон ушодызе М. Е. Евсевьев лемсэ МГПИ-сэ, кармась литературань кафедрань старшей преподавателекс. Истя важодсь зярыя иень перть.
2001 иестэ О. И. Налдеева кармась теке кафедрань доцентэкс ды те тевсэнть важодсь 2014 иес. Теке шкастонть, од учёноенть содамочитнень ды ёрокчинть неезь, 2004 иестэ сонзэ аравтызь Педагогической институтонь внеучебной тевтнень факультетэнь деканокс. Те факультетэнть прявтсо Ольга Ивановна важодсь аволь кувать, седеезэ бажась лиянтень, тиринь кельтнень тонавтомась сонзэ туртов ульнесь прявт тевекс ды сехте покш мелекс. Секскак теке иестэнть аравтызь филологиянь факультетэнь деканокс, косо важодемань вете иетнень перть сон тейсь пек ламо эрзянь ды мокшонь кельтнень тонавтнемасо. Эсь студенттнэнь марто ульнесь ламодояк ламо конференциясо, раськеютконь форумсо ды промкссо. Те шканть перть факультетэст ламоксть лиснесь изницякс эрьва кодамо пелькстамотнесэ ды тесэ тонавтницякс кармасть аволь вейке тёжа од ломанть аволь ансяк Мордовиясто, шабра регионтнэстэ ды Россиянь ламот оштнестэ.
Седе тов Ольга Ивановна ульнесь институтонь литературань ды литературантень тонавтомань методикань кафедрань старшей научной сотрудникекс. 2015 иестэ идизе докторской диссертациянть ды сонензэ максовсь профессоронь лемесь. Теке жо иестэ аравтовсь тиринь келень ды литературань кафедрань прявтокс, кона таркасонть сон важоди течинь чис.
М. Е. Евсевьев лемсэ МГПУ-со важодемань иетнень перть О. И. Налдеева сёрмадсь-анокстась грантонь ламодояк ламо проектт. Сынст ютксо кода ВУЗ-нь гранттнэ, истя федеральной министерстватнень ды ведомстватнень. Меельцесь ульнесь «Развитие образования» Россиянь Федерациянь государственной программань «Совершенствование управления системой образования» подпрограммань «Научно-методическое, методическое и кадровое обеспечение обучения русскому языку и языкам народов Российской Федерации» Россиянь Федерациянь Просвещениянь министерствань ведомственной целевой программань грантось.
Учёноенть пек ламо научно-методической важодевксэнзэ. Весе сынь, васняяк, раськень кельтнень ванстомадо ды виевгавтомадо.
Эряви меремс, весе неть гранттнэ пек лездыть тонавтнемань лувонть вадрялгавтомасо, студенттнэнь марто важодемасо неень шкань технологиятнень, од ёнкстнэнь совавтомасо. Эдь неень шкасто ВУЗ-со тонавтнемась те, васняяк, научной пельксэсь, мезентень явови пек покш мель.
Ольга Ивановна свал корты, течинь студенттнэнь марто эряви важодемс истя, штобу сынст улевель мелест аволь ансяк тонавтнемантень, улевель бажамост арсемс мезеяк од, теемс кодамо-бути панжовкс. Зярдо ули истямо важодема, кармить а берянь невтевксткак.
О. И. Налдеевань те весемесь лиси пек парсте. Сонзэ вечксызь студенттнэ, сон превень максыця ВУЗ-нь од преподавательтнень туртов. Секскак вадря важодеманть кисэ Ольга Ивановна ламоксть тешкстазь Почётонь грамотасо ды Сюкпрянь конёвсо, сон – Мордовия Республикань Высшей школань заслуженной роботник!
Вечкевикс Ольга Ивановна! Сась шкась, зярдо тон тешкстат пек мазый юбилей!. А арсевияк, ансяк мезе теят, эрямось а ашти таркасонзо.
Ольга Ивановна истямо ломанесь, конась эрьва чистэ важоди виень апак вансто. Свал сакшны важодеме весемеде икеле ды тукшны весемеде мейле.Сон эри коллективензэ марто ладязь, эрьва мелявксонть решасы-изнясы. Сонзэ вечксызь аволь ансяк коллективесь, студенттнэяк. Эрьва ломаненть марто муи кель-вал. Истяттнэде минек эрямосонть эрявольть бу седе ламо. Те ломанесь зярдояк а манятанзат, секскак минь свал кемтяно сонзэ лангс. Свал мелявты седе, штобу эрзянь, мокшонь, татаронь ды ламо лия кельтне а емавольть, секскак эрьва конференциясо, форумсо кепси неть кевкстематнень. Яки лия ёнга ды келень коряс весе кевкстематнень реши-теи эсь вийсэнзэ. Секскак коллективесь арси тензэ ды тейтерензэ, Верань туртов, шумбрачи, паро эрямо, эрьвачинь кемемат ды кеняркст. Ольга Ивановна, кемть, тонь коллективесь свал тонь кисэ! Кодат эрямосонть тувталт авольть уле, кемть, минь свал тонь вакссо!
М. Е. Евсевьев лемсэ МГПУ-нь
филологиянь факультетэнь тиринь
келень ды литературань кафедрань сотрудниктне
Неть читнестэ Ольга Ивановна тешксты чачома чинзэ, юбилеензэ! Минь, «Эрзянь правда» газетань теицятне, арсетяно тензэ кеме шумбрачи, уцяска, кадык изнявить весе стакачитне ды топавтовить мельтне-бажамотне, кадык вакссонк свал кармить сехте малавикс ломаненк, кемевикс ялганк.
ВУЗ-со важодемань иетнень перть тынь свалшкане невтядо эсь содамочинк, кемечинк ды ёрокчинк, мольтядо кемекстазь виде киява.
Паро мельть, лезэв тевть ды шожда ки Тенк!
Юлия Еремина