Н.П. Огарев лемсэ МГУ-сь важоди «Демография» национальной проектэнь «Содействие занятости» федеральной проектсэнть. Вузось ушодсь профессиональной одс анокстамонь ды квалификациянь кастомань дополнительной профессиональной программатнень тевс совавтомо, конатнесэ примить участия Мордовиянь эрицятне:
1. роботань вешницятне, конат пшкадсть занятостень службань органтнэс;
2. пенсияв туемадо икеле иень ломантне;
3. кинень 50 ды седе ламо иеть;
4. 3 иес эйкакш мельга якамонь отпусксо улезь аватне;
5. роботавтомо аватне, конат аштить сисем иес эйкакшост вакссо.
«Технический контроль качества продукции в машиностроении» васенце программась ушодовсь июнень 29-це чистэ. Сон ютавтовсь Россиянь грузовой подвижной составонь сехте покш нолдыцянть – «Рузхиммашонть» важодицятнень туртов.
«Рузхиммашонь» важодицятнень профессиональной тонавтнеманть минь аравтано васенце таркас. Федеральной проектэнть вельде ОТК-нь ведькемень ды седе ламо иесэ важодицятне получить дополнительной специальностть. Одс анокстамонть вельде одкстомтовить содамочитне, тейсызь роботанть седе лезэвекс, прявтось – вадрялгавтови нолдавиця продукциясь, те эряви кода нолдыцятненень, истя рамицятнененьгак. Теке шкастонть изнясынек кадровой кевкстемантькак», – толковизе управляющей директорось Валерий Владиславович Ларин.
«Технический контроль качества продукции в машиностроении» квалификациянь кастомань дополнительной профессиональной программанть арсизь Рузаевкань Машиностроениянь институтонь (Н.П. Огарев лемсэ МГУ-нь филиалось) ученойтне ды «Рузхиммашонь» специалисттнэ.
«Минек туртов те мелень явовтыця опыт. «Рузхиммашонь» инженертнэнь марто минь арсинек тонавтнемань истямо аравтлув, косо тонавтнемась малавгавтови башка участкань, башка цехень вешематненень. Мельс саеви се, минь тонавтано уш аволь од ломантнень. Ве ёндо – сынст ули важодемань покш опытэст, омбоце ёндо – улезэ вадря теоретической базасткак. Наукась а ашти ве таркасо, свал лисить од методт ды системат, конатнень эрявить содамс, штобу сынст лезэвстэ нолдамс эсь тевтеемасонть», – мерсь Рузаевкань Машиностроениянь институтонь директорось Владимир Николаевич Кечемайкин.
Весе «студенттнэ» – важодиця ломанть, секс сынст тонавтнемась ютавтови видьстэ предприятиясонть. Теоретической занятиятне ютавтовить аволь умок панжозь Содамочинь ды ёрокчинь фабрикасонть, практическойтне – важодема таркасо. Теде башка, кармить заданият, конатнень кунсолыцятне кармить топавтомо кудосо.
Тонавтнемась поладови августонть прядовомс. Аттестациядонть мейле программань участниктненень максовить квалификациянь кастомадо удостовереният.
«Рузхиммашось» – те, «васенце нармушка». «Работа в России» порталсонть невтезь Мордовиянь университетэнь 36 программат. Весе сынь сюлмавозь профессиональной стандарттнэнь марто, ладязь башка компетенциятнень теемантень, конатне кортазельть роботань максыцятнень марто эли тешкстазельть МР-нь Социальной защитань, важодемань ды эрицятнень занятостень министерствасо кода сехте эрявикстнэ.
Невтемакс, улить программат, конат сюлмавозь 1С, логистиканть, трудонь ванстоманть, од компетенциянь тееманть марто, истятнэ, кода «дополнительной образованиянь педагог» эли «специалист по управлению персоналом». Ули программа, кона сюлмавозь шукштнэнь коряс важодеманть марто. Те весе пек эряви Мордовиянь трудонь рынкасонть», – ёвтнесь республикасонть «Содействие занятости» федеральной проектэнь кураторось, Н.П. Огарев лемсэ МГУ-нь дополнительной образованиянь факультетэнь деканось Наталья Владимировна Жадунова.
2021 иестэ весе ёвтазь программатнень коряс Мордовиянь госуниверситетэсь арси тонавтомс республикань 219 эрицят. Башка ломантнень ды роботань максыцятнень туртов проектсэнть участиясь питневтеме.