Кизэ. Мольсь 1941 иесь. Кияк эзь арсе кодамояк берянь тевде, сельведень валомадо, вачочиде.
Тавла велесь шумбра чисэ, пейдемасо ды весёла моросо ютавтсь кудонь ды паксясо колхозонь тевтнень. Чокшне ланга марявсь гармониянь седямось ды васов гайгсть мазый моронь моразь тейтертнень вайгелест. Эйкакштне налксильть цецяв луга лангсо эсь эйкакшонь налксематнесэ.
Ансяк вана сась июнень 22-це чись. Минек велесь теке раужо паця оршась прязонзо. Чись лоткась веленть валдомтомо. Велентень пачкодсь берянь валось, раужо кулясь – война!
Весёла моротнень таркас кармасть марявомо лайшемань вайгельтне. Ушодсть ильтямо велень эрицятнень войнав.
Войнань васенце иетнестэ монень мольсь котоце ие. Тетям, Радайкин Василий Иванович, тусь войнав васенце иестэ. Кадовинек кудос: дедам, Радайкин Иван Матвеевич, бабам, Мария Фёдоровна, авам, кавто сазорон – Аня ды Настя (конась кулось кшнядо войнань омбоце иестэ) ды тетянь братозо, Антон Иванович. Дедань васенце иестэнть войнав эзизь саекшне, сонензэ ульнесть 46 иеть. Ансяк кода фашисттнэ састь Москов алов, кармасть саеме кинень арасть 50 иеть. Сон тусь войнав 1942 иестэ ды ёмась, кода мерить, кулявтомо. Эрьва чистэ учинек колмо уголсо сёрматнень тетянь ды дедань пельде. Бабам содыль сёрмас ды ловнылизе марявиксстэ эрьва сёрманть.
1943 иестэ туинь школав, васенце классос. Книгат ды тетрадкат арасельть. Ламо савкшнось сёрмадомс ташто книга ды газета лангс. Тонавтыцятне васенце классо келей кикс марто тетрадтнень линовасть седе теинестэ, штобу тетрадесь сатоволь седе кувать.
Вана карминь маштомо сёрмадомо ды ловномо. Фронтов сёрмань сёрмалеме ды тетянь пельде сазтнень ловномс савсь монень, кавксо иесэ эйкакшонтень. Велентень кармасть само чавовомадо конёвтне. Эрьва ёндо кайсевсть лайшемань вайгельть.
Пек стакальть войнань меельце иетне. Ютавтовсть кшинь, салонь, керосинэнь весе таштавкстнэ. Войнань эйкакштне а шкастонзо покшолгадсть. Савсь ламо роботамс аватнень, бабатнень марто. Эрьва тунда яксинек паксяв колозонь пурнамо, конань видьмекстнэстэ пидильть ям эли кедьвиень ведьгевнесэ яжавтылизь.
Тунда пиресэ моданть савкшнось чувномс коймесэ, истя жо яксилинек вирев лопа мельга, конатнестэ панильть кши. Луга ланга пурнылинек эльденачко лопат, конатнень эйстэ пидилинек ям.
Эсенек ульцясо ялгатнень марто кизна якилинек вирев пенге мельга. Тельня жо пенге мельга якилинек аванок ды бабанок марто. Кинь ульнесь кудосо скал, сеть ютавтызь войнань иетнень седе шождасто. Ловсось ванстынзе эйкакштнень вачочиде куломадонть. Ялатеке войнань иетнестэ ламо эйкакшт кулость педиця орматнеде ды вачочиде.
Велесэнть, кода масторонь келескак, ульнесь тердема: «Весемесь фронтонтень!». Аватне ды бабатне кодасть понань сурестэ варьгат, носкат. Куш модамаресь эстест ломантненень а сатныль, ялатеке фронтов костильть модамарть, конатнень ватксилизь, керсилизь чова палнэсэ, нолдылизь лакиведьс, а мейле жесть лангсо костилизь. Ды мейле кучилизь фронтов. Школатнесэ ульнесь пек якшамо, пенгетнень усксть салазкесэ, керосин арасель, штобу паловольть лампатне.
Школасо андсть ансяк вишка классонь тонавтницятнень. Од иень кузонь кенярксчистэнть явшильть ламбамо ведьсэ вадезь сюкорот, конатнень панильть тосонь важодицятне. Почтонть явилизе колхозось.
Вана сась 1945 иесь Маень 9-це чись. Паро кулясь вельмевтизе минек веленть, велень эрицятне кармасть кортамо кенярксовсто. Ушодсть велявтомо кудов войнав саезтне, нама, саезтнестэ малав пелест кадовсть тюремань паксятнес. Велявтсь войнасто пек стакасто ранявозь тетянь братозо Андрей Иванович.
Тетям велявтсь войнасто 1946 иень декабрясто. Сон ульнесь Западной фронтсо. Восточной Пруссиясто сынст корпусось саезель Япониянть марто тюреме. Зярдояк а стувтови се чись, кода тетям велявтсь кудов. Се кенярксось кадовсь эрямом перть.
Войнань шкань эйкакш Раиса РАДАЙКИНА
(1935 иень чачовт)
Раиса Васильевна Радайкина, неть ледстнематнень сёрмадыцясь, пек вечкилизе Ине Изнямонь кенярксчинть. Кулоськак 2022 иень те чистэнть.
Фотосонть Раиса Васильевна (куншкасо) Пакся Тавлань школасо (ней сон пекстазь) тонавтыцятнень марто, конатне сакшность 80 иень юбилеензэ тешкстамо.