Владимир Гудков марто минь теевинек содавиксэкс эштё школасо тонавтнемстэ. Те ёроков эрзянь цёранть марто васенцеде вастовинек Орданьбуень Культурань кудонь сцена лангсо. Ледстяса, васолонь 2010-2013 иетнень апрелень 1-це чистэ райононь школасо тонавтницятнень вейс пурнылинзе КВН-сэ налксемась.
Мелезэнь сы талай чокшнес сюпав программань анокстамось, сценась, ояксчинь ладямось, певтеме пейдематне ды вадря ёжось. Эряви меремс, од ломантненень КВН-сэ налксемась теевкшнесь паро коекс, конань ней мекс-бути стувтызь. Эдь сестэ сцена лангсо минь маринек прянок алкуксонь артистэкс. Эрьвась эйстэденек тенень салава кенярдсь.
Сась шка, школанть прядынек, туинек кие-ков, стувтовсть эйкакшчинь налксематне, ушодовсь покш ломанень эрямось. Ансяк ютксонок ялатеке кадовсть ломанть, конатне эзизь ёмавто артистизмаст, сцена лангсо налксемань ёрокчинть ды эрямонь тевекс кочкизь театранть. Неть ломантнень юткс сови Вова Гудковгак. Сон – МР-нь Някань государственной театрань артист-някань ветниця.
Цёранть чачома тарказо – Орданьбуень райононь Кеченьбуе (Кечушево) велесь. Тетязо-авазо велень эрзянь ломанть. Свал тевсэть, кирдить хозяйства, кастыть эмежпиреть ды, мейсэ маштыть, лездыть эйкакшост туртов.
– Монь лемдимизь покштянь лемсэ. Истя тетям-авам арсесть те лементь вельде кеместэ сюлмамс эрямом уцясканть марто. Арсян, сынст весемесь лиссь. Эштё эйкакш пингестэ сынь свал тонавтсть эйсэнь эрямо лиянь мель ды вал лангс апак вано, эсень превсэ. Сынь свал вакссон ды монь кисэ. А сёпан, малавиксэнь – монь нежем ды вием. Бути а сынь, ламо мезесь а лисевель. Тетям, Вячеслав Владимирович, важоди тувонь фермасо инженерэкс. Сонзэ кедензэ сырнень. Машты эрьва мезень тееме. Ломанесь сон пек харизматичной, ламот вечкить кунсоломо, кода тетям маштозь ёвтни пеедькшнемат. Кунсолыцятне свал туить кудов ракамонь сельведь марто. Машты налксеме гитарасояк, сон вадрясто марясы музыканть ды мазый вайгелезэ. Ламот кортыть, артистизмась сась тень сонзэ пельде. Авам жо пингензэ перть косо ансяк эзь важодекшне. Неень шкасто труди Отяжбуень сывелень комбинатсо. Сон дока ды превей ава. Арсян, сондензэ тантейстэ каваниця весе масторлангстонть а муят. Улить малавиксэнь ютксо шкинемав ломантькак. Андрей Кулаков, тетянь ёндо лелям – ёроков художник. Минек республикасо сонзэ лемезэ марсевкшни. Кадык мон а артан, ансяк роднянть кувалма кирдян покш каштанчи, – ёвтни Владимир.
Вова вишка пингестэ саезь арсесь улемс актёрокс. Ды стамбарнэ ютась те мелень топавтомантень. Школасо сонтемензэ а ютниль вейкеяк мероприятия.
– Приемной комиссияв сынек авань марто. Мельсэнекак арасель, што кись пурды а тона ёнов. Пачкодинек эрявикс таркантень, венстинек коневтнень МГУ-нь Национальной культурань институтонь столенть лангс. Арсинь кочкамс «Актёрское мастерство» ёнксонть, ансяк се шкане тов кочкамо арасель. Нама, ацирьгадынь. Каштмолезь саинь конёвон ды лисинь. Кода-бути сеске прязон сась мель молемс тонавтнеме филологиянь факультетэв. Ды вана эрявикс столенть вакссо аштемстэ, мерят, кие-бути тулкадимим, ды истя виевстэ, мон натой абунгадынь. «Ужо, кевкстьсынь эштё весть, паряк, Институтсонть улить кодаткак лия ёнкст, ков эрявить студентт»? Чевте вайгель авинетне кенярдовтымизь ды мерсть максомс конёвон «Руководство любительским театром (Режиссура)» направлениянтень. Марявсь, кецямонтень а ули пе, – ледстни цёрась.
Истя ушодовсь Вовань Институтсо тонавтнемань кизэ. Васняяк эрявсь максомс экзамен. Эйзэнзэ сон августонть перть анокстась а покш программа. Тонавтнесь Владимир Высоцкиень зярыя стихть, Василий Шукшинэнь прозасто саевкст, «Выйду ночью в поле с конём» моронть ды Иван Крыловонь баснянзо, тейсь вадря анализ «Три Богатыря» невтемантень ды паро мельсэ сась экзаменс. Тесэ цёранть эзизь талакавто сценась, тонавтыцятне ды сазь ялгатне. Институтонь стенатнесэ сон марясь прянзо теке кудосо. Секскак экзаменэсь максовсь шождасто. Ды седе тов тонавтнемаськак мольсь вадрясто. Тешкстасынек, уш колмоце курссо тонавтнемстэ цёрась кармась важодеме МР-нь Някань государственной театрасо. Нама, те тетрасонть важодемась а моли лиятнень ёнов, эдь тесэ сави роботамс аволь ансяк актёрокс, эряви улемс някань вадрясто ветиця специалистэкс. Някатнеде жо ламо. Вова важоди ростовой, марионетка, тростевой, перчаточной ды планшетной някатнень марто. Тевесь, нама, аволь шождатнестэ. Эряви маштомс полавтнемс вайгеленть, тонадомс вадрясто ветямс кедтнесэ ды някатнесэ. Ансяк, кода кортави, ёроков ломанесь – ёроков эрьва мейсэ. Ды те алкукс, аламонь-аламонь Вова весемес тонадсь ды вана уш 7-це ие цёрась важоди Някань театрасо ды тень кувалма мари прянзо уцяскавокс.
– Театрасо важодемань ким уставась интермедиясто. Минь Од иень оймсема читнень перть налксинек эйкакшонь ламо сценкат ды спектаклят. Ды ансяк 2018 иестэ МР-нь заслуженной артисткась ды Някань государственной театрань режиссёрось Оксана Постёвка тердимем налксеме эйкакшонь «Полянка» спектаклясо. Тосо мон налксинь ватракшонь, покш пря коршонь ды ведущеень рольтнень. Седе тов покш ёрокчи макссь Михаил Булгаковонь «Морфий» ды «Записки юного врача» ёвтнематнень коряс «За гранью» спектаклясонть прявт героенть Доктор Поляковонь ролесь. Те ульнесь монь васенце ды актёронь домка налксемам. Зярдо прядовсь спектаклясь, чарькодинь, важодемань яннэсь аламонь-аламонь шашты покш кинтенть, – корты Вова.
Сисем иетнень перть цёранть таштавсь репертуарозояк. Сон налкси кода эйкакштнень, истя жо покш ломантнень туртов спектаклятнесэ. Сехте вечкевикс ролензэ: «Вельветовый кролик» – сонсь нумолось; «Выходили бабки замуж» – Иван электрикесь; «Серебряное копытце» – цёрынесь ды «Дарёнка» няканть ветицясь; «Война» – омбоце немецесь ды заключенноесь; «Раскольников и наказание» – Раскольников; «Великий, непобедимый, православный – Ушаков» – сонсь Ф. Ф. Ушаков ды ламо-ламо лият.
Содави, штобу вадрясто налксемс те эли тона персонажонть, сценариенть содамодонзо башка, эряви аволь ансяк молемс героенть лангс. Саемга, зярдо Вова налксесь Федор Ушаков адмиралонть, сонензэ савсь кастомс черензэяк, ансяк бу седе вадрясто совамс ролентень. Ды весе неть рунгосо полавтоматнень лангс цёрась ваны мизолкс марто, эдь эрьва ролесь – те вишкине эрямо.
– Бути эряви, чертькак, сакалткак карман кастомо, ансяк спектаклясь туезэ ломантнень мельс. Эдь актёронть туртов паро ёжось, ды вийтне – те ваныцятне, – тешксты цёрась.
Оймсема шканзо жо, конась од актёронть эрси пек чуросто, алты стихень сёрмадомантень. Цёрась сёрмады куш мезде. Стихень сёрмадомань толнэсь кирвазсь сонзэ седейс школасо тонавтнемстэ. Вова сёрмады кода эрзянь, истя рузонь кельтнесэ. Эрьва стихесь – те домка ды мазый вановт минек эрямонть лангс. Весе сёрмадовксонзо цёрась путни социальной сетьсэ «Владимир Белка» лопазонзо. Ловныцятне кевкстить, мекс «Белка»? Тешкстасынек, Вованень пек вечкеви вирень те вишкине, ансяк пек эряза ракшинесь. Сёрмадомадо башка, цёрась яви мель книгань ловномантень, музыкань кунсоломантень. Самай сынст вельде Вова сюпалгавты эсь содамочинзэ ды налксемань ёрокчинзэ.
Алена Артемьева