«Вера, касат ды кармат артисткакс!» – истя кортыльть велень ломантне вишка тейтернентень, кона апак лотксе эрьва косо морсесь. Васенце сценакс ульнесь велень лавкась, ков сон чийниль малав эрьва чистэ. Лавкась аштесь кудост эйстэ маласо, секскак обед шкане тосо ютыльть концерткеть. Микшницясь Гена лелясь каванясь вишка артистканть конфеткадо, лия ваныцятне-рамсицятне мельспаросо цяпасть. Морсесь эрьва кодат морот, сехте пек ломантне вечксть кунсоломо военной моротнень. Покшсто касозь, Вера алкукскак кармась артисткакс. Кортамось моли Вера Балаевадо, кона уш 46 иеть важоди театрасо. Эйстэст 33 иеть – Эрзянь ды мокшонь национальной драмтеатрасо. Течи Вера Николаевна – минек инженек.
Людмила Степановна ды Николай Иванович Суродейкинтнэнь семиясо чачсть-кассть колмо тейтерть: Валентина, Нина ды Вера. Сынь эрясть Покш Игнатбуень Ташто Селища велесэ. Семиясост морамонть вечксть весе, аваст ульнесь пек мазый вайгелезэ. Кудосост эрьва кенярксчистэ гайгсть морот. Вера ледстни, кода Троицянень велень ломантне якильть покш чинть тешкстамо вирень кужос.
Ташто Селищасо Вера прядызе 8-це классонть, мейле весе класснэк яксесть ялго Покш Игнатовав, тосо прядынзе 9-10-це класстнэнь, тонавтнесь парсте, изнякшнось эрьва кодамо олимпиадасо. Седе тов, тетянзо-аванзо мелест коряс, мольсь тонавтнеме Саранскоень медицинской училищав. Сеске чарькодсь – те аволь сонзэ тевесь. Саинзе документэнзэ ды мольсь музыкальной училищав. Приемось уш прядовсь, ансяк сонзэ кунсолызе содавикс тонавтыцясь Р.М. Беспалова. Вера морызе «Вниз по Волге-реке» моронть, бажась невтемс морамонь весе виензэ. «Апак кавтолдо эряви саемс!» – яволявтсь педагогось. Истя Вера кармась тонавтнеме Саранскоень музыкальной училищасо.
– Тонавтсь монь Раиса Макаровна Беспалова. Сон – Мордовиянь васенце народной артистка, лемдсть эйсэнзэ Мордовиянь цековокс. Чевте седей ломань, сэтьме обуця, пек паро тонавтыцяль. Яла кортыль тень: «Вера, зярдояк иля емавто визьксчить». Ламо мезес тонавтсь монь те превей ды паро авась, те шкас лембестэ сонзэ ледстнян ды евтан сюкпря, – корты Вера Николаевна.
Музыкальной училищасо сон тонавтнесь 1975–1979 иетнестэ. Сонзэ прядомадо мейле направлениянь коряс кучизь важодеме И.М. Яушев лемсэ Музыкальной театрань хорс. Мезе парось, училищасо тонавтнемстэ, сыненст ветясть «сценической движениянь» ды «актерской мастерствань» предметтнэнь. Секскак режиссертнэ кармасть тердтнемензэ морамо операв, опереттав ды налксеме музыкальной комедиясо. Сэрей, мазый, раужо кувака черь марто од тейтересь марясь прянзо эсензэ таркасо.
– Сцена удало, нама, ули талнома. Ансяк зярдо лисят сцена лангс – весемесь еми, весемеденть стувтат, арсят ансяк рольденть. Мезе илязо тееве, кодат пря потсот ды оймесэть ризкст авольть уле, эряви пурнамс вийтнень ды теемс теветь сцена лангсо. Те принципенть коряс важодян нейгак, – евтни Вера Николаевна.
Музыкальной театрасо важодемстэ ламо превс путомат тензэ макссь Е.С. Бажанова актрисась. Иень коряс сон савтовсь тензэ авакс, теевсть жо паро ялгакс. Тесэ сон налксесь Н.Римскиень-Корсаковонь «Царская невеста», Ф.Легаронь «Цыганская любовь» ды лия спектаклятнесэ.
– 90-це иетнестэ «Масторава» эрзянь-мокшонь раськень вейсэндявксонь промкссо теевинь содавиксэкс Нацтеатрань сестэнь прявтонть А.И. Пудин марто. Сон евтаськак, кода пек эрявить национальной кадрат, вешнесь ломанть. Пек энялдсь самс. Сон муинзе актертнэнь Виктор Гудожниковонь, Николай Храмовонь, Мария Плотниковань, Тамара Весеньевань, мейле юткозост сынь монгак. Истя понгинь важодеме Национальной театрав, сестэ театранок ульнесь Эрзянь ды мокшонь раськень культурань музеень зданиясо, сонзэ подвалсо. А.И. Пудин марто путнинек ансяк эрзянь ды мокшонь кельсэ спектаклят. Те: К.Абрамовонь «Эрьванть эсензэ ормазо», «Кавалонь пизэ», В.Малягинэнь «Пьяна лей лангсо», К.Петровань «Ташто койсэ», Ж.Мольерэнь «Шумбрат, Сганарель», Г.Меркушкинэнь «Сенем валда», В.Шукшинэнь «Латось сыргась» ды ламо-ламо лият.
Покш мельспаросо лиснинек сцена лангс. А зяро сакшныльть ваныцят! Кода сынь учость тиринь кельсэ путовкстнэнь! Мельсэнь ашти, кода ардтнинек районга-велева. Ташто автобуссо-пазиксэ, якшамодонть понань лембе кемсэ, шальсэ тапарязь. Велень клубтнеяк аволь весе уштовсть. Ломантне озыльть стул ды эзем лангс, стядояк аштильть, шапкасот-варьгасот. А минь сцена лангсо уш налксинек кайсезь, чова оршамопельсэ, истя, кода эряви. Киськенек сэньшкадыть якшамодонть. Сеть шкатнестэ кодамояк шоу-бизнес арасель. Ломантне паро мельсэ веленек сыльть ваномо, те ульнесь сынст туртов покш событиякс. Залтнэ свал пешксельть. Туильть мартост велень казнеть: ловсо, алт, прякат. Мольсть 90-це иетне, шкатне пек стакальть, эрсесь, пельие эзть пандо зарплата. Минь натой районсто рамилинек кши, сал. Покш лезкс макссть тетянок-аванок, конат эрясть велесэ. Ошонь ломантненень жо пек стакаль цидярдомс. Мезе ускилинь велестэ, бажинь максомс лиятнененьгак, кой-кить пек пиштевтсть, – ледстни Вера Николаевна.
Вера Балаева зярыя иень перть ве шкане кенерсь важодеме кавто театрасо: музыкальнойсэ ды национальнойсэ. Мейле кадовсь эрзянь ды мокшонь театрасонть.
2007 иестэ покш кенярксокс кармась Эрзянь-мокшонь национальной театранть эсензэ зданиянь панжомась. Тесэ В.Н. Балаева налксесь Л.Толстоень «Власть тьмы», Х.Вуолийокинь «Юстина» путовкстнэсэ ды нейгак налкси А.Галинэнь «Ретро», К.Абрамовонь «Эрьванть эсензэ ормазо», «Пургаз», К.Петровань «Ташто койсэ», Н.Птушкинань «Рождественские грезы», Р.Томонь «Дом в глуши», А.Гринэнь «Алые паруса», А.Островскиень «Бесприданница» ды лия спектаклятнесэ.
– Монень пек вечкеви налксемс эрзянь ды мокшонь кельсэ путовкстнэсэ. Те – седеень витевкс. Эрьва ролентень моли покш анокстамо. Весементь нолдат седееть пачк. Те – апак удо веть, мелявтат налксеманть кисэ. Секскак весе рольтне монень вечкевить. Кадык косояк вишка ролесь, ялатеке эряви теемс тевенть парсте. Мелезэнь тукшны «Рождественские грезы» лирической комедиясь, сонзэ путызе Д.С. Крюков режиссерось. Мон тосо налксян Софья Ивановна сыре аванть. Налксетяно ниленек: Алексей Егранов, Наталья Русяйкина ды Татьяна Биушкина. Ломантне пейдитькак, сельведесткак лисить, – корты актрисась.
Весе неть иетнень перть Вера Балаева ламоксть ульнесь гастрольсэ, театрань раськеютконь фестивальсэ. Эрзянь ды мокшонь свадьбань коенть невтнесть Сызраньсэ, Московонь ВДНХ-со. Сон свал налксесь Масторавань, Родина-Авань, Лидия Руслановань рольтнень. Зярдояк а пельксты, ков кучсызь налксеме – тов моли. Сыктывкарсо театрань фестивальсэ улемстэ, «Бесприданница» спектаклясо налксеманзо жюрись паро валсо тешкстызе башка. Тосо сон налкси Ефросинья Потаповнань.
Меельце иетнестэ Нацтеатрась ламо ардтни гастрольга лия регионга. Ды теньсэ покш путовксозо театрань прявтонть С.И. Дорогайкинань. Театрав важодеме састь ламо од ломанть. Бути сынь пшкалить Вера Николаевнанень превс путома мельга, свал лезды.
Ламо иень перть театральной искусствасо парсте важодеманть кисэ Вера Балаева казезель «МР-нь культурань заслуженной важодиця» лемсэ, тешкстазель РФ-нь Культурань министерстванть пельде Почетной грамотасо.
Зярдо Вера Николаевна налкси сцена лангсо, сонзэ спектаклятнень ваномо свал сакшныть малавиксэнзэ – Людмила тейтерезэ ды Екатерина нуцьказо. Кадык сынь эзть туе аваст-бабаст киява, эзизь кочка эрямонь тевекс культуранть, ялатеке пек вечкить театрань искусстванть, а менстить вейкеяк премьера, сакшныть цецяпусмо марто. Спектаклянь ваномадо мейле евтасызь мелесткак, сынь – васенце критикензэ.
Татьяна Маторкина