Тедеде эрзянь поэтэнть Илья Петрович Кривошеевень чачома чистэнзэ саезь топодить 125 иеть. Тенень алтазь творческой васенце вастовомась ютась Ицялонь средней общеобразовательной школасо. Тесэ писателесь важодсь тонавтыцякс ды школань прявтокс малав 25 иеть. Теде башка, тонавтсь педучилищасояк. Тесэ сон пурнакшнось литературань кружок, театра, косо путнесть классиктнень произведенияст.
Вастовоманть ветясть нуцьказо – РФ-нь Писателень союзонь членэсь Анжелика Горбунова, ды «Навигатор детства» федеральной проектэнь Ицялбуень координаторось Наталья Зубова.
Илья Кривошеевень (Илька Морыцянь) ловить эрзянь литературань ушодыцякс. Сонзэ уцясказо а шождаль. Поэтэсь чачсь Саратовань губерниясо, ней те – Пензань ёнксонь Камешкирской район. Авазо – Ефимия Петровна – эрзянь содавикс сказительница. Эрясть сынь покш нужачисэ. Тень лангс апак вано, вишка Илька прядсь церковно-приходской школа, мейле – Рузонь Камешкирсэ кавто классонь школа. 1913-1917 иетнестэ тонавтнесь Казанень инородческой учительской семинариясо, тосо теевсь содавиксэкс М. Е. Евсевьев учёноенть марто. Эрямонзо перть ледстнесь Евсевьевень, кона ульнесь алкуксонь педагогокс, сонзэ ловсть тиринь тетякс, истя ламо лембе макссь од ломантненень. Мейле саизь армияв. Тонавтнесь Казанень военной училищасо, макссть тензэ прапорщикень лем. Гражданской войнань иетнестэ служась Якстере Армиясо. Седе тов важодсь школасо. 1927 иестэ прядызе Н. Г. Чернышевский лемсэ Саратовань государственной университетэнь педагогической факультетэнть.
1937 иестэ масторсонок ушодовсть репрессиятне, учёнойтнень, врачтнень, педагогтнень, робочейтнень стяконь кисэ пекстамотне ды маштоматне. Кривошеевтнень кудоскак сась зыянось. Илья Петрович кавто иеть аштесь тюрьмасо. Семиязо ламо пиштевтсь.
Вастовомантень сакшнось поэтэнть тонавтницязо, поэтессась ды общественной деятелесь Т. А. Ивлева.
– Сон ульнесь чевте седей ломанекс. Пек вечксь эйкакшт. Школань тонавтницятне ды студенттнэяк сонзэ вечкилизь. Кудонь кенкшензэ свал панжадольть весенень. Мон тонавтнинь вишка классо, сон ульнесь школань прявтокс. Весть, переменасто, тулкадимизь ды кедем пицевсь голландкантень. Сельведень тусть. Сон сась малазон ды оймавтымим. Зярдо учительтнестэ кияк эзь саво урокс, сестэ Илья Петрович сонсь полавтылизе ломаненть. Уроконь перть ловныль эйкакштненень стихть. Эли жо седиль вишка гармониясо, – ледстнесь икелень тонавтыцясь Татьяна Александровна. Сон ловнызе эсензэ стихензэ, конась алтазь Кривошеевнень ды сёрмадозь А. М. Доронинэнь ледстнеманзо коряс.
Поэтэнть лиссть малав комсь книганзо, косо пачти тиринь ёнксонтень вечкемадо, эрямодо, покш мель яви эйкакштненень. Школань тонавтницятне анокстасть казне. Сынь ловность И. П. Кривошеевень эрзянь кельсэ стихензэ. Тейтернетне натой оршнесть мазый палят – невтсть тундо, кизэ, сёксь, теле.
Лембе валт инжетненень ёвтась МР-нь Писателень союзонь правлениянь прявтось Т. П. Швецова.
И. П. Кривошеев – поэт, педагог, СССР-нь Писателень союзонь член, МАССР-нь школань заслуженной учитель, эрзянь литературань ушодыця. Поэтэнть ламо произведениянзо совавтозь учебникс ды хрестоматияс. Кой-кона стихензэ лангс сёрмадозь музыка ды сынь теевсть народной морокс.
Ицялбуесэ а стувтнить сонзэ лементь. Поэтэсь тусь эрямосто 1967 иень сентябрянь 11-це чистэ, калмазь Ицялсо, косо стявтозь тензэ кеврунго ды вейке куринкась кандтни лемензэ. Теде башка, сеедьстэ ютавтовить сонзэ ледстнемга литературань вастовомат.
Татьяна Маторкина