Тундось – сехте учовикс ды вечкевикс шка. Сонзэ самонтень кенярдыть весе: покштнеяк, вишкинетнеяк. Кеняркшнозь, морсезь-киштезь вастсть сонзэ седикелеяк. Кезэрень шкасто саезь эрзятнень ульнесть тундонь вастомань эсест коест. Ламотне эйстэст, нама, ней стувтозь, кода, сайсынек, Эрьбань чиськак.
Те коенть а стувтомга «Ламзурь» ансамблясо морыцятне эрьва иестэ ютавтнить Тундонь вастомат. Тедеде сынь ульнесть апрелень 12-це чистэ «Луч» Культурань кудосо. Тундонть вастомо тердезельть Саранск ошонь эрицят, школасо тонавтницят ды тонавтыцят.
Седикеле тундонть вастсть кеняркшнозь ды моронь морсезь. Моротнесэ тердсть нармушкатнень велявтомс лембе масторсто мекев кудов, шнасть тундонть эйсэ. Ламо моротне ванстовсть нейгак. Ютксост позяратне. Сынст морсильть сестэ, зярдо сыргиль чадыведесь. Од ломантненень а косоль пурнавкшномс вейс. Сынь лиснильть лей чирес, стильть карадо-каршо: ве куринкань од ломантне арыльть вить чирентень, омбоцетне – каршонтень, ды ушодыльть позярань морсеме, моросо пелькстамо.
Истямо ладсо позяратне моразельть Тундонь вастома шкастонтькак. «Ламзурень» морыцятненень тень теемс лездасть залсо аштицятнеяк.
Теде мейле эйкакштне покш мельсэ ёвтнесть тундодонть валморот, валмеревкст, весе вейкень пес ютасть ломанень пирявксонть пачк, эрьвась «парязель» эрьбань тарадкесэ. Тень пингстэ эрьбицятне ёвтасть истят валт:
Эрьба, хлысть, хлысть, хлысть!
Орма, лиссть, лиссть, лиссть!
Виев, шумбра улезат,
Валдо превнес совазат!
Истямо ладсо ломаненть эйстэ паневить орматне-тармотне, апаро мельтне-арсематне, сон ванстови чопода вийтнеде, сельмедемадо.
Ледстязель эштё вейке паро коесь. Лемезэ – «Од толонь чи». Седикеле сонзэ истя жо ютавтнесть тунда, зярдо чись седе кувалгадыль, зярдо чипаесь седе манейгадыль ды лембелгадыль, ловось солыль, нармунтне ушодыльть пизэнь тееме, панжильть чувтонь лопатне, удомсто сыргозильть калтнэ ды весе унжатне, кудонь ракшатнень ливтилизь ваномо, эрзятне ютавтыльть покш чи. Сон алтавсь од толонь чачомантень. Се чистэнть велень кудотнесэ ведьсэ валылизь каштомтнесэ толонть. Мейле весе мирём лисильть веле ушов, козонь панилизь кудоракшаст. Ютавтыльть озкс. Секе таркасонть чувильть латко. Коське тарадонь ёзазь, кирвазтильть од тол. Сонзэ эйстэ витильть покш толбандя. Озксонь ютавтомадо мейле толбандястонть сёвонень чакшс саильть палыця тонолт, конатнень эйстэ, кудов велявтозь, каштомтнесэ кирвазтильть од тол.
Озксонь ютавтома таркасонть кавто ёнга витильть зярыя толбандят, сынст юткова панилизь кудо ракшатнень. Истя теевсь ормадо-тармодо, зыяндо-апародо ракшатнень ванстомаст кисэ.
Кезэрень пингестэ саезь эрзятнень туртов толось, сонзэ эйстэ молиця лембесь ды валдось лововсть апаро ды чопода зыянтнэнь паниця, ванськавтыця ды вейсэндиця виекс.
Те коесь невтезель киштеманть вельде, конань анокстызь «Пилигрим» ансамблясо киштицятне (прявтось Н. С. Храмова).
Тундонь вастомась поладозель мазый моросо, конатнень серьгедизь «Луч» Культурань кудосо морыцятне Людмила Савкина ды Мария Тортикова.
Раиса Щанкина