Четверг, декабря 02, 2021
Важное

Неть кизэнь маней ды лембе читнестэ тешкстызе эсензэ 95 иень юбилеензэ Отяжелень райононь Цёлпанова велень эрицясь Табаева (тейтерьксэнь фамилиязо Пугачёва) Екатерина Алексеевна.


Сон чачсь 1925 иень умарьковонь 20-це чистэ ды эри те эрзянь велесэнть, кеци эрьва чинтень, нейгак важоди кудоютконь тевсэ. Эрямонь весе стакачитнень лангс апак вано, Екатерина Алексеевна свал важодсь эсест велень колхозсо, мирдезэяк Табаев Павел Антонович ульнесь колхозсо скалонь выныцякс. Стака ормадонть сон 1986 иестэ кулось, секскак кудоютконь весе стака тевтне ды эйкакштнень пильге лангс стявтомась кадовсть аванть лангс. Эрямонзо перть кодат ансяк стакачить эзть юта сонзэ прява, ялатеке эзь сиве, кадовсь тевень вечкицякс, ломаннень эрьва тевсэ лездыцякс, паронь арсицякс, валдо превень максыцякс.

Екатерина Алексеевнань сисем эйкакшонзо – ниле тейтерть ды колмо цёрат: Мария, Надежда, Клавдия, Татьяна, Анатолий, Александр, Николай, конатнень сон весень тринзе-кастынзе, тонавтневтинзе ды ливтинзе вадря ды тевень вечкиця ломанекс, конатнень кувалма ней ансяк кецни. Ней сонзэ кавксо нуцьканзо, сисем правнуконзо, конатне пек вечксызь эсест сырькаест ды юткошкасто яла свал ардыть Цёлпановав сонензэ инжекс. Сон весень вастсынзе лембестэ, кецязь, кевкстнесынзе эсест тевдест, эрямодост, эрьванень муи лембе валт ды каванясынзе каштомсо пидезь ярсамопельде, конатнень нейгак яла сонсь эштё пиди-пани пек тантейстэ! Сыречинзэ лангс апак вано, Екатерина Алексеевна кадовсь вадря ломанекс, важодемань ды ваньксчинь вечкицякс. 95 иетнень лангс апак вано, сон лезды эйкакшонзо ды нуцьканзо туртов.

Цёлпанова велесэнтькак сонзэ содасызь, кода тевень вечкиця, кудоютконь ваньксстэ кирдиця, видечинь кис аштиця ломанекс, секскак велесэнть ланганзо кортыть ансяк вадря валсо, кода велень паро ломанде. Мартонзо эри Мария покш тейтерезэ, кона эрьва тевсэ лезды эсензэ тиринь аванстэнь кудоютконь тевтнень теемстэ. Авась свал сюкони тензэ ды ёвты покш сюкпря сень кисэ, што сон а кады эйсэнзэ, эдь сыречинть тулкадемс ськамот пек стака.

Весе эйкакштне, нуцькатне ды правнуктне кучить Екатерина Алексеевнань туртов лембе поздоровт 95 иетнень топодеманть кувалма, арсить тензэ кеме шумбрачи, покш уцяска ды кеняркс! Эштё тензэ весе арсить эрямс шумбрасто седе товгак, штобу вастомс весень марто вейсэ 100 иень юбилеенть!

Мила БОГАТОВА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».