Ромодановань куншкакуросо таштыне кавто этажсо кудосонть «эрить» превень максыцятне ды оймень витицятне – книгатне. 1961 иестэ стявтозь кудынесэнть советской шкатнестэ ульнесь партшкола библиотекань апокш кабинет марто. Комсешка иень ютазь весе омбоце этажось кармась улеме библиотекакс. Мейле целанек кавто этажтне саезельть.
Бути чопавтемс седе васоло иетнес, муеви истямо сёрмадовкс: Саранскоень уездэнь Пензенской губерниянь Ромодановасо васенце ловнома кудось панжозель 1913 иестэ народной библиотекатнень реформированиядо мейле. Тензэ явозель башка кудо, козонь аравтозель вейке важодиця. Те саезь В. И. Никулинэнь «Пензенское земство» книгастонть, косо муевить истят цётавксткак: «1914 иестэ библиотекань фондсонть ульнесть 1445 книгат. Ловныцятнеде лововсть 436. Эйстэдест 101 (23,2%) 12 иеде седе вишкинеть, 139 (31,9%) – 12–16 иесэ, 196 (44,9 %) – 16 иеде седе покшт».
2006 иестэ библиотекась кармась кандтнеме Мордовия Республикань заслуженной поэтэнть Николай Лазаревич Иркаевень (Никул Эркаень) лемензэ, кона чачсь Ромодановань райононь Курилова велесэ. 2020 иес фондось кассь 30000 экземплярс, ловныцятнеде – 3352 ломанть.
Ней Никул Эркай лемсэ «Ромодановской центральной районной библиотека» МБУК-нь прявтокс важоди Любовь Николаевна Баранова. Роботамо сон ушодсь 1994 иестэ саезь эйкакшонь библиотекасо, конась сестэ аштесь башка – искусствань школасо. Мейле тосо тейсть витнемат-одкстомтомат ды 2020 иестэ библиотеканть ютавтызь тей, ды теезель эйкакшонь башка отдел.
– Кода сядо иеде икелеяк, течияк минек эрьва кодат ловныцянок – книга мельга сакшныть однэк-сыренек. Натой вете иесэ ловныцянок улить. Эйкакшонь отделсэ эрсить эрьва кодат курынеть, конатнес эйкакштне сакшныть аваст марто ды сайнить ловномс книгат. Теде башка, вишкинетнень марто ютавтневить эрьва кодат мероприятият. Эйдень кужотнева якатано минсь, школасо тонавтницятне сынсь тенек сакшныть, – ёвтни Любовь Николаевна.
Библиотекасонть улить зярыя отделт: абонементэнь, искусствань ды краеведениянь, эйкакшонь ды методической. Эрьва отделэнть эсензэ прявтозо ды библиотекарезэ. Важодема лувтнеяк явовить, ансяк прявт тевесь весень вейке – ловныцянтень эрявикс книганть муемась-явшемась.
Ромодановань райцентрась покш. Тесэ эйдень колмо кужот ды колмо покш школат. Ансяк 1-це № школасонть колмо васенце класст, весемезэ тонавтницятнеде тосо малав 800 эйкакшт. Районось сюпав. Ули эрьва кодамо инфраструктура кода покштненень, истя эйкакштнененьгак. Тешкстама, сехте покш сюпавчикс тесэнь эрицятне ловить содавикс ломанест, конатнень содасызь Мордовиянь томбалеяк. Неть: эрзянь сёрмадеесь Никул Эркай, морыцятне Раиса Беспалова ды Дмитрий Еремеев, художникесь Александр Мухин, поэтэсь Александр Скопцов, врачтне – Владимир Филатов офтальмологось, Владимир Поросенков больницянь прявтось, трудонь геройтне – Прасковья Елизарова, Василий Тягушев ды ламо лиятне.
Искусствань ды краеведениянь отделэнь прявтось Ольга Николаевна Ермакова пек вечксы эсь тевензэ, бажи молемс шканть марто велувсо. Мероприятиянь анокстамодо башка библиотекань сайтсонть сон вети Ромодановань содавикс ломантнеде лопа. Ольга Николаевна прядызе Орданьбуень культпросветучилищанть. 1998 иестэ саезь важоди краеведениянь отделэнть прявтокс. Течис те 25 иеть. Эсь важодемадо корты ёжомарязь ды тевень содазь:
– Сеедьстэ ютавттано минек содавикс ломантнень юбилейтнес тематической чокшнеть. Вейкесь эйстэдест – Курилова велесэ чачозесь, Мордовиянь заслуженной поэтэсь Николай Лазаревич Иркаев (Никул Эркай). Сонзэ содасызь поэманзо ды валморонзо коряс, истя жо школасо тонавтнемстэ «Алёшка», «Килей ведь», «Од роднят», «Моро Ратордо» повесттнень коряс. Вана уш 15 иень перть ютавттано сонзэ лемс алтазь эрьва кодат мероприятият ды эйзэст эрьва анокстамстонть сонзэ творчествасо панжтано эсенек туртов мезеяк од. Ванстовсть сонзэ рукописензэяк, конат ней аштить минек музейсэ. Сюкпря весе ломантнененьгак, сынь эсь кудосто тукшныть тенек эрьва кодат книгат, косо ули тешкстазь Никул Эркаень лемесь. Вана пандемиянь шкасто кандсть тенек «Прекрасен наш Союз» книга, конась сёрмадозь Писателень союзонть васенце промксонь материалтнэнь лангс нежедезь. Промксось ютавтозель Московсо, Никул Эркай жо ульнесь делегатокс. Те минек туртов питнейдеяк питней материал: фотографиятнень коряс редяви, кодамо ульнесь шкась, кодат делегатт сакшность те съездэнтень.
Вана семиянь библиотекасто кандозь лия книгась – «Мордовская кухня» (1977), конанень васень валонть сёрмадызе истя жо Никул Эркай. Пек «тантейстэ» эйсэнзэ сёрмадозь минек ярсамопельтнень анокстамодост. Ловномстост натой сельгеть нильнят…
Истя жо Ромодановской райононь, тагояк Куриловасто – Пазонь баславазь таркастонть – лиссть морыцятне Раиса Макаровна Беспалова ды Дмитрий Иванович Еремеев. Сынь аштить алкуксонь каштанчикс аволь ансяк Ромодановань, весе Мордовиянть туртов! Мелят искусствань школасо ютавтозель «Золотые голоса Мордовии» лем ало покш мероприятия, козонь сакшность ламо инжеть: музыкальной училищань важодицят, тонавтницят, сынст тетяст-аваст, родняст-раськест. Библиотекартне ёвтнесть инжетненень Ромодановань содавикс ломантнеде ды сынст шкинемадост. Эряви тешкстамс, од ломантнень ютксо нейгак улить талантливойть ды пек превейть.
Ольга Николаевна ёвтызе эштё вейке кенярксонзо: «Вана ютазь ковсто библиотекас совавтсть минек эштё вейке содавикс ломанде материал – МР-нь ды РФ-нь заслуженной артисттэнть Иван Павлович Мякишевде. 2025 иестэ сонензэ топодить 75 иеть, ды минь стамбаркине ушодтано анокставиця мероприятияс ланганзо материалонь пурнамо».
Вана истямо сон, библиотекаренть а шожда важодемазо – ёвтнемс ломантненень се питнейчиденть, конань кастызе-тризе тиринь модась, каямс тиринь ёнксонь вечкемадо видьметнень од ломантнень седейтнес, кастомс алкуксонь патриотт, марямс каштанчи эсь ёнксонть кувалма.
Марина Агафонова