Эрзянь-мокшонь раськень регионъютконь общественной вейсэндявксонь VIII-це Инекужонть ютавтома шкасто минь вастневинек ламо инже марто, мартост кортнинек эрямодо-аштемадо, тиринь келентень ды раськентень вечкемадо.
Татьяна Михайловна Панькина сась Саранск ошсто, ансяк сонзэ ундоксонзо Дубенка велестэ. Эрзянь авась важоди 119 № эйдень кужосо медсестракс ды «Эрзянь мастор» газетань правлениянь член. Тиринь раськень культурантень ды келентень мельваномась чачсь эйзэнзэ эйкакш пингестэ саезь ды, нать, совась эйзэнзэ покштянзо-бабанзо пельде. Кода ёвтни Татьяна Михайловна, аванзо ёндо покштязо, Матвей Павлович Малкин, высшей образования мартоль, важодсь корреспондентэкс районной газетасо, ульнесь «Сталинская правда» газетань прявт редакторокс. Ине Отечественной войнанть ушодовомсто сон эсь олясо тусь тюреме фашисттнэнь каршо ды 1943 иестэ чавовсь. Калмонзо муизь аволь умок, ды Татьяна Михайловна эрзянь оршамопельсэ роднянзо-раськензэ марто якась Воронежень областев сюконямо калмонзо лангс.
Омбоце покштязо вишкинестэ тонавтнесь церковно-приходской школасо ды ськамонзо туртов велень эрицятне сакшныльть сёрмань сёрмадовтомо. Те тевенть сон теилизе мазыйстэ, чарькодевиксстэ ды седейшкава, тень кувалма пек вечкилизь ды ваныльть мелензэ. Секскак, зярдо сон терявтсь пурнамс эрзянь авань хор, кияк каршо эзь моле, састь весе, кинь ладясь вайгелезэ. Те хоронть марто Татьяна Михайловнань покштязо изнясь та-кодамо олимпиадасо Московсо, арсетяно, те ульнесь 1957 иень Од ломанень фестивалесь. Покштязо-бабазо свал тонавтсть вишка Танянь Пазнэнь озномо, ломань ютксо ды семиясо прянь ветямо, а стувтнемс эрямонь алкуксонь питнейчитнень, конатнень тенек максынзе Пазось.
Школасо Таня эзь тонавтне эрзянь кель, ялатеке марясь эйсэнзэ кудосо, ульцясо ды секскак сон совась оймепотс. Татьяна Михайловна мельспаросо ашти, што сон – эрзява, ды тень свал невти эрьва косо. Ставтсь эстензэ пулай марто мазый оршамопель, викшнесь эрзянь тешкст, прязонзо анокстась мазыйдеяк мазый панго. Сваханзо марто кодасть сюлгамо сельмедемадо викшневкс марто, човалясто пурнасть эрьгекерькст, стасть а покшке юдмине, истя жо эрзянь раськень тешкс марто. Кода корты Панькина, те оршамопельсэнть сон мари прянзо седе ёроковокс, виевекс ды, нама, мазыекс. Эдь эрзянь авань викшневкстнэ лездыть сельмедемадо ды невтить аванть эрьва ёндо: лиссь сон мирденень эли эри ськамонзо, зяро эйдензэ ды зяро иензэ, сюпавонь родсто эли кажовонь. Вейкеяк ломань а юты эрзянь аванть мазый палянзо вакска апак дивсе!
Марина Девятова