И.Д. Воронин лемсэ краеведениянь музейсэ ютась «Сурская оборона. Ни шагу назад!» документальной фильмань невтема. Сонзэ ютавтсь МР-ва Россиянь военно-исторической обществань минек ёнксонь отделениясь. Те фильманть теизе Валерий Каланов. Сон алтави Сура лангсо оборонительной рубежень теемань 80 иетненень.

Рубежень теемась мольсь вейке пель марто ков, 1941 иенть прядовомсто саезь 1942 иень январьс. Пек якшамо шкане. Моданть чувсть эйкакшт, од тейтерть, ават ды сыре ломанть. Эрявсь теемс 80 вайгельпень рубеж. А нолдамс ятонть минек масторонть потс.
Вастовоманть панжизе Россиянь военно-исторической обществань минек ёнксонь отделениянь прявтось Г.А. Куршева. Сон пачтясь: фильманть лангсо важодсть «Куйгорож» творческой вейсэндявксось ды МР-нь Правительстванть юрсо Гуманитарной наукань НИИ-сь, лездась МР-ва Россиянь военно-исторической обществань минек ёнксонь отделениясь. Фильмантень совасть Сурань рубежде научной статьятне, сонзэ теицятнень ледстнемаст, ламо документт, фото- ды видеоматериалт. Теде башка, совавтозь рубежень теемань исторической реконструкциянь эпизодтнэ.

Весе ризнэзь вастызь кулянть – те иень февральстэ тусь эрямосто фильмань теицясь, тележурналистэсь ды историкесь Валерий Каланов. Чатьмонемань минутасо ледстязель валдо лемезэ. Сонзэ фильмась тешкстазель МР-нь Журналистэнь союзонь конкурссо.

«Сурская оборона. Ни шагу назад!» фильмасонть невтезь Г.С. Бодина, кона ульнесь рубеженть теемстэ, сон ледстнесь неть стака читнеде. Фильмась аволь покш, ансяк 15 минутат. Сон алтави ваномс весенень. Содамс, мезень пачк савсь ютамс минек ломантненень. Нама, эряви невтнемс школасо тонавтницятненень.

Те вастовомасонть вал сайнесть МР-нь Журналистэнь союзонь прявтось В.В. Назаров, МР-нь военной комиссарось, полковникесь И.В. Тихомиров, Чувашиянь Алатырь ошонь краеведениянь музеень прявтось Т.А. Борисова, «Сурань рубеж» военно-исторической клубонь прявтось С.А. Косынкин.

2021 иенть прядовомсто тагояк арсеви ютавтомс «Я на Сурском рубеже стою» военно-исторической реконструкция.
Татьяна Маторкина