Неть читнестэ ютавтовсь Н.П. Огарёв лемсэ МГУ-нь тундонь прявт покш чись – «Сударушка» мазычинь пелькстамось. Те иестэ пелькстамонтень – 25 иеть! Неть иетнень перть полавтовкшнось ламось, ансяк аполавтовиксэкс свал ашти од порась, мазычись ды участницатнень ёрокчись!
Сехте вадря тарканть кисэ эсь ёрокчист невтсть университетэнь кемготово тейтерть. Участницатненень ды инжетненень пшкадемстэ Н.П. Огарёв лемсэ МГУ-нь ректорось Сергей Михайлович Вдовин, кона ульнесь жюринть прявтсо, тешкстызе, «Сударушка» пелькстамось вечкевикс ды мельстуиця студенчестванть ютксо ды сонензэ свал явить мель Саранск ошонь эрицятне ды инжетне.
Ёвтазель сеяк, 25-це пелькстамось ютавтови Мордовиянь Н.П. Огарёв лемсэ государственной университетэнь 90 иетнень тешкстамонь иестэнть. Сергей Михайлович ёвтась студенткатненень шожда пелькстамо ды тешкстызе, эрьва участницась ашти сехте покш питненть коряс.
Ледстясынек, эштё даволковсто «Мордовия Арена» стадионсонть ютавтозель пелькстамонь спортонь пельксэсь, косо тейтертне невтизь эсь физической анокстамонть, цидярдоманть ды ёрокчинть. Теде мейле Radisson Hotel & Congress Center Saransk центрасонть ульнесь интеллектуальной пелькстамо, косо участницатне невтизь эсь содамочитнень ды логической арсемань ёрокчинть. Теке марто мазыйкатне ульнесть алкуксонь актрисакс ды примасть участия «Подписаться на любовь» спектаклясонть, кона невтезель Мордовиянь Раськень драмань театрань сценанть лангсо. Неть пелькстамотнень коряс полуфиналс лиссть кемень участницат.
Полуфиналсонть тейтертне невтизь ёрокчист пролог-дефилесэнть, деловой дефилесэнть ды истя жо «Мой МГУ» пелькстамосонть, косо ёвтнесть эсь студенческой эрямонь кодамояк тевденть, университеттэнть. Ды неть ёвтнематне ульнесть лия ёнов а молицякс, творческойкс ды мельстуицякс. Киштемань пелькстамосонть тейтертне невтизь музыкань коряс киштемань ёрокчист, ритмань марямонть ды, нама, эсь мазый оршамотнень.
Сехте вадрякс кармась «Творческой выступлениясь». Тейтертне жюринтень невтсть эрьва кодат образт – рок-морыця, актриса, киштиця, модель, поэтесса ды натой мирдень экшсэ неень шкань ава.
Пелькстамонть коряс покш важодема ветявсь «ВКонтакте» социальной сетьсэнть, косо ульнесь эрьва номинациянть коряс вайгелень максомаяк.
Весементь коряс финалс лиссть вете мазыйкат. «Сударушкатне» невтизь эсь прянть коктейльной дефилесэнть. «Импровизация» пелькстамосонть, конань шкасто гайгсть валморот мазый тейтертнеде, участницатне тевс нолдасть сценань реквизиттнэнь, штобу невтемс зярыя образт. «Специальное задание» пелькстамосонть тейтертне кортасть содавикс кинофильматнесэ налксиця актёртнэнь вайгельсэ.
Весементь коряс, «Сударушка-2021» университетэнь миссэкс кармась экономической факультетэнь студенткась Валерия Сальникова.
I-це Вице-миссэсь – Юлия Могина (Раськень культурань институт), II-це Вице-миссэсь – Ксения Дураева (математикань ды информационной технологиянь факультет).
«Мисс Зрительских симпатий» номинациясонть сехте вадрякс ёвтазь Кристина Корнилова (Медицинской институт). «Мисс Медиа» номинациясонть изнясь Виктория Букарева (филологиянь факультет), «Мисс Признание» номинациясонть – Мария Прыткова (Физикань ды химиянь институт).
Юлия Еремина