Декабрянь 5-це чистэ эрзянь прозаикентень, Ине Отечественной войнань участникентень Пётр Васильевич Прохоровнень чачома чистэнзэ саезь топодсть сядо иеть. Сонзэ ледстнемга ютавтозельть мероприятият кода Саранскойсэ, истя жо чачома велесэнзэ.
П. В. Прохоров чачсь Отяжелень райононь Таразбуе велесэ сокицянь-видицянь семиясо. Средней школанть прядомадо мейле, 1941 иестэ, эсь олясо туекшнесь фронтов. Сонзэ боевой кизэ ютась Белорусской 1-це, мейле Белорусской 2-це фронттнэсэ ды прядовсь Германиясо. Казезель Отечественной войнань 2-це степенень орденсэ, Якстере Тештень колмо ордентнэсэ ды медальсэ. Войнадо мейле тонавтнесь Иркутскоень связень военной училищасо, В. И. Ленин лемсэ Военно-политической академиясо. Пётр Васильевичень весе эрямозо сюлмавозь Советской армиянть марто. 1974 иестэ полковникень званиясо лиссь запасс ды велявтсь Мордовияв. Куломазонзо важодсь Саранскойсэ КПСС-нь Мордовской обкомонь Марксизмань-ленинизмань университетэнь прявтокс.
«Штабонь начальник» васенце повестезэ лисекшнесь «Сятко» журналсо 1974 иестэ. Пек вадрясто невтезель войнань шкасто ломантнень апелемачист сонзэ кавто томсо «Цидярдома» ды «Стака изнямот» книгатнесэ. А вана «Генералдо повестьсэнть» писателесь ёвтни эрзядонть, генералдонть Пуркаевде, кона важодсь минек масторонь содавикс военачальниктнень ютксо. Неть: Жуков, Кирпонос, Баграмян, Рябышев, Тимошенко ды лиятне. А вана «Ракетный дивизион» повестезэ алтазь неень шкань армиянтень.
П. В. Прохоров эрямонь меельце иензэ перть важодсь неень шкань веленть мелявксонзо коряс. Тенень алтызе «Эрямонь лув» повестенть, конасонть авторось кепси велень ломантнень талновтыця кевкстематнень.
Пётр Васильевич Прохоров кулось 1985 иень июлень 10-це чистэ.
Сонензэ алтазь «Выстояли» литературной чокшнесь васняяк ютавтозель А. И. Полежаев лемсэ музейсэ. Тесэ истя жо важодсь «Стака изнямот» выставкась. Мероприятиянтень сакшность П. В. Прохоровонь малавиксэнзэ, сонзэ содыцятне, СУЗ-нь студентт ды общеобразовательной школань тонавтницят.
Теде мейле Отяжелень райононь Таразбуень средней школасо ютавтозель «Помним. Чтим. Гордимся» семинар. Литературной мероприятиясь, конась ютавтозель васоло велесэ, эрявиксчинь коряс ульнесь республиканскоекс, эдь эйсэнзэ важодсть аволь ансяк муниципальной районтнэстэ пурнавозь инжеть, истя жо ошстояк. Семинаронть программаськак пек сюпаволь. Сыця инжетнень вастсь школань прявтось Марина Алексеевна Атласова. Тесэнь азоравась весень содавтынзе педколлективенть ды школанть марто.
– Минек коллективсэнть – кемгавтово тонавтыцят, юткстост колмотнень улить высшей квалификационной категорияст, кавксотнень – васенце категорияст, вейкенть – 12-це, – ёвтнесь Марина Алексеевна. – Весе тонавтыцятне вечксызь эсь тевест, тонавтницятнень, важодить шканть марто ве эскелькссэ.
Школаванть ютавтозь экскурсиясь пек тусь пурнавозтнень мельс. Теде мейле ушодовкшность писателентень алтазь тевтне. Васняяк панжизь П. В. Прохоровнень алтазь мемориальной лазонть. Те почётной тевесь максозель Отяжелень муниципальной райононь прявтонтень Николай Константинович Николаевнень, писателенть нуцьканстэнь – Алексей Борисович Белоусовнень ды сонзэ цёранстэнь Владиславнень.
Седе тов мероприятиясь поладозель школань музейсэ. Тезэнь пурнавозтне ледстизь аволь ансяк П. В. Прохоровонь, истя жо те школанть прядыцятнень Александр Живаевень ды Николай Кузнецовонь лемест, конатне максызь эрямост тиринь масторонть кис. Эсь цёрадонзо ёвтнесь Л. В. Кузнецова.
Пурнавозтне мельспаросо кунсолость педагогической наукань докторонть, профессоронть Михаил Иванович Ломшинэнь кортамонзо, кона П. В. Прохоровонь 100 иетненень сёрмадызе «Пётр Васильевич Прохоров: жизнь и творчество» монографиянть. Учёноесь нурькинестэ ды, теке шкастонть, домкасто ёвтнесь эсь мельдензэ писателенть «Выстояли», «М. А. Пуркаев» ды лия произведениятнеде.
Мельстуевиксстэ кортась рузонь келень ды литературань тонавтыцясь Наталья Николаевна Абрамова. Сон ёвтнесь, кода пурнась Прохоровтнень кудораськеденть материал.
А. И. Полежаев лемсэ музеень научной сотрудникесь, МР-нь заслуженной поэтэсь Геннадий Сергеевич Гребенцов пачтясь военной писателенть шкинемадонзо. Сынст музейсэ ули «Штыком и пером» лемсэ зал, эйсэнзэ невтневиця экспозициятне ёвтнить писателенть эрямодонзо ды важодемадонзо, Пётр Прохоровонь эрзянь-мокшонь литературантень путовкстонзо. Геннадий Сергеевич ёвтнесь, кода Пётр Васильевич марто сакшность ловныцятнень марто вастовомас. Весень мельс пек тусь Г. С. Гребенцовонь «А муза не молчала…» фильмась, конань сон снимизе Таразбуесэ 1984 иестэ. Велень ламот ломантне неизь эсь пряст фильмастонть, зярдо эштё ульнесть тонавтницякс, ледстизь ветерантнэнь, Ине Отечественной войнань участниктнень.
Седе, кода А. С. Пушкин лемсэ Национальной библиотекань ловныцятне явить мель П. В. Прохоровонь книгатненень, кодамо важодема ветяви писателенть-фронтовикенть творчествадо, весенень пачтямга ёвтнесть те библиотекань раськень ды краеведениянь литературань отделэнь прявтось Надежда Владимировна Бочканова ды отделэнь прявт библиотекаресь Валентина Борисовна Бояркина.
Школань тонавтыцятне ды тонавтницятне невтсь пек паро концерт. Сынь морасть ды ёвтнесть стихть тиринь мастордонть, сонзэ пертьпельксэнь мазычитнеде. Весень мельс тусть школань прявтонть Марина Алексеевна Атласовань ды «Эрзяночка» ансамблянть седейстокиця вайгелест. Тонавтницятне ёвтнесть эсест арсевть эрзянь кельсэ стихест.
Торжественной мероприятиятнень лувсо ютавтозель «Патриотическое воспитание учащихся на уроках родной литературы» кругловой столь, конань ветясь Отяжелень муниципальной райононь администрациянь Образованиянь управлениянь кадрань кевкстематнень коряс консультантось Наталья Алексеевна Артамонова.
Семинаронь весе участниктнень ульнесь вейке мелест: мероприятиятне, конатне алтазельть писателентень-фронтовикентень П.В. Прохоровнень, ютасть пек вадрясто, сынь эрявикст кода покштненень, истя жо вишкинетнененьгак. Эдь Пётр Васильевич Отяжелень моданть каштанчизэ, сонзэ художественной произведениятне лововить эрзянь-мокшонь литературань сюпавчикс ды аштить невтемакс од ломантнень тиринь масторонтень вечкемасо кастомантень.
Надежда БОЧКАНОВА,
Валентина БОЯРКИНА,
А. С. Пушкин лемсэ Национальной библиотекань
важодицят.