Медьковонь 29-це чистэ эрзянь сказительницанть, морыцянть Серафима Марковна Люлякинань чачома чистэ топодсть
99 иеть. Ледстясынек сонзэ валдо лемензэ паро валсо.

Серафима Марковна Люлякина. Те лемесь кеместэ совась минек раськень ломантнень седейтнес, зярдояк ды мейсэяк сон ней а нардави. Серафима Марковна Люлякина истят ломантнень юткстоль, кинь эйстэ, кода палыця штатолонть эйстэ, мольсь валдо ды лембе. Пазось сонзэ казизе валдо оймесэ, эрямонтень вечкемасо, сёрмадомань ёрокчисэ, гайтев вайгельсэ. Те эрзянь аванть эрямонь кизэ пек а шождаль, мезде сказительницась ёвтни эсензэ ламо ёвтнемасо ды моры эсензэ моросо.

Сон чачсь 1922 иень медьковонь (июлень) 29-це чистэ Самара ёнксонь Похвистнева райононь Ягодной велесэ сокицянь-видицянь семиясо. Тетязо, Марк Павлович, важодсь сюпавонь кедьсэ. Свалшкань аразьчись эсензэ Симаньгак овсе вишка пингстэ кармавтызе важодеме. Кеменьшка иесэ яксесь кочкомо, тикшень пурнамо. Кассь моронь вечкицякс, ялга ютксо оймень-седеень кирвазтицякс, эрьва кодамо тевень сыргавтыцякс.

Истямо обуцясь тензэ сась а стяко. Сынст кудосо свал вечксть моронь морамо. Марковнань сырькаензэ, Анисия Ефимовнань, содылизь губерниянь келес. Сон маштыль вадрясто лайшеме, содыль ламо морот, ёвкст, одирьвань урнемат. Эрясь мик 105 иеть. Сонзэ пельде Серафима Марковна тонадськак тиринь келенть вечкеме, моронь ладсеме. Сонсь морсеськак эйсэст. Эрзянь келень гимнакс теевсь «Эрзянь кель» морось, конань сёрмадомсто Серафима Марковна путызе весе ойме лембензэ. Секс те моронть эряви тонавтнемс весе эрзятненень. А содамс те моронть – а вечкемс эсь келенть.
Домка тешкс С.М. Люлякина кадсь эрзянь литературасонть. Сонзэ стихтнесэ, ёвтамотнесэ, пьесатнесэ парсте маряви шканть лексемазо. Эрямонь ламо ёнкстнэнь авань сельмсэ неезь, сон весементь нолдась седеензэ пачк.

Эряви меремс, эрзянь литературасо Никул Эркайде мейле эйкакшонь туртов виев сёрмадыцят арасельть семс, зярс эзь са Люлякина. Эйкакштненень алтазь сёрмадовксонзо ульнесть ламо ёнксонь. Сон сёрмадсь морот, стихть, ёвкст, пьесат.

С.М. Люлякинань парсте содылизь школатнесэ. Сон сеедьстэ вастневсь тонавтницятнень марто, ловнось тенст од валморонзо, морась морот. Сынь пек тукшность эйкакштнень мельс.
Серафима Марковна ульнесь ломанень вечкицякс. Кие илязо пшкаде тензэ лезкс мельга, лездыль ков сатыльть виензэ. Сон зярдояк эзь покшкавтне. Ков аволизь кучо – молиль, ков аволизь терде – сыль. Кадык лиясто ёжозояк берянель, ялатеке сыргиль. Эзь кочксе паро-берянь таркат.

Кода сонзэ вечксть, кода учость эрьва велесэ, козонь пачколесь, козонь совсесь, кенярдсть! Сонзэ концертсэ залось зярдояк чаво арасель. Велесэ морыль – веленек чиильть, сыренек-однэк, эйкакшонь пес сыльть кунсоломонзо. Ледни мелезэнь, кода финнэнь-угрань раськетнень фольклоронь кенярксчистэнть весе инжетнень тердизь Орданьбуень Баева велев С.Д. Эрьзянень кеврунгонь панжомо. Чокшне ланга Орданьбуесэ невтезель концерт. Каня, ломантне сизекшнесть учомадонть, каня, лия тувталонь кувалма, ансяк залось таго-мекс пельсчаволь. Ды те сень лангс апак вано, кодат ансяк ды косто ансяк морыцят-киштицят эзть сакшно. Вана сценанть лангс лиссь Серафима Марковна. Кода свал, эрзянь оршамосо. Панаронзо-руцянзо палозь палсть, пильгес тонгоманзо кувтёлдозь кувтёлдсть. Кирьгаванзо каязь эрьгтнень-човалятнень, мештезэнзэ чочазь сюлгамонть лангс аволить варшта ды сельметне сынсь невтильть лангозост. Сон сюконязь ютась сценанть куншкас ды эзь кенере нолдамо вайгелензэ – косто-а косто пуромсть ломанть, залось нацяс пешкедсь тыц. Кода серьгедизе «Семеричка карть» моронзо, Орданьбуень клубось лепиясь цяпамотнес. Седеяк элякадсть ломантне, зярдо Марковна морынзе «Петра иредьстэ моли» ды «Молян мирденень» моронзо.

Эрямонь койтне, нать, истят: ломанесь масторлангс сакшны аволь свалшкас. Куломась сасызе Серафима Марковна Люлякинаньгак. Те лиссь 1993 иень январень 17-це чистэ. Тусь юткстонок минек Марковна. Эйкакштненень сон Сима патяль. Сонсь Серафима Марковна весенень пшкалесь истя: «сазорнэм», «сяткинем», левкскем», «сырнень покольнем», «дугинем», «тякинем».

Меельце ки лангов ильтямонзо сакшность ламо ученойть, писательть, студентт, эрзянь ды мокшонь журналсто ды газетасто редакторт ды журналистт ды, нама, сонзэ сехте питней оятне – эсензэ кондят морамо-киштеме вечкиця ялганзо. Кочкурбуень Мурань велестэ «Сюлгамо» ансамблянь аватне кувать лайшесть пряпесэнзэ. Куломадонзо икеле Марковна мерсь калмамс тозонь, косо чачсь. Меельце ки лангов «Келу» ансамблянь тейтертне ильтясть эйсэнзэ моро марто. Морызь «Вирь удало» сонзэ вечкема моронзо.


Раиса Щанкина